ஜடேஜா ஒரு 'பழமைவாத' (Conservative) வீரர்: தமிழக வீரர் அஸ்வின் குற்றச்சாட்டு..!

நியூசிலாந்துக்கு எதிரான சமீபத்திய ஒருநாள் தொடரில் இந்திய அணி 2-1 என்ற கணக்கில் தொடரை இழந்தது. இதில் இந்திய ஆல்-ரவுண்டர் ரவீந்திர ஜடேஜாவின் செயல்பாடு கடும் விமர்சனத்திற்கு உள்ளாகியுள்ளது. மூன்று போட்டிகளிலும் சேர்த்து அவர் ஒரு விக்கெட்டை கூட வீழ்த்தவில்லை என்பதுடன், பேட்டிங்கிலும் பெரிய தாக்கத்தை ஏற்படுத்தவில்லை. குறிப்பாக, நியூசிலாந்து பேட்டர்கள் ஜடேஜாவின் பந்துவீச்சை எளிதாக எதிர்கொண்டது அவரது எதிர்காலம் குறித்த கேள்விகளை எழுப்பியுள்ளது.

இதுகுறித்து தனது யூடியூப் சேனலான ‘ஆஷ் கி பாத்’ (Ash ki Baat) நிகழ்ச்சியில் பேசியுள்ள ரவிச்சந்திரன் அஸ்வின், ஜடேஜாவிற்கு ஒரு சகோதரனாக சில அறிவுரைகளை வழங்கியுள்ளார். ஜடேஜா எப்போதும் தனது பலத்திற்குள்ளேயே நின்று விளையாடும் ஒரு 'பழமைவாத' (Conservative) வீரர் என்று அஸ்வின் குறிப்பிட்டுள்ளார். "ஜடேஜாவிடம் அபாரமான திறமை உள்ளது, ஆனால் அவர் தனது கம்பர்ட் ஜோனை விட்டு வெளியே வரத் தயங்குகிறார். வலைப்பயிற்சியில் அவர் 'கேரம் பால்' போன்ற புதிய யுக்திகளை முயன்றாலும், போட்டிகளில் அதை வீச அவர் ரிஸ்க் எடுப்பதில்லை" என்று அஸ்வின் கூறியுள்ளார்.

தற்போது ஜடேஜாவிற்குப் போட்டியாக அக்சர் படேல் மிகச்சிறந்த ஃபார்மில் காத்திருப்பதைச் சுட்டிக்காட்டிய அஸ்வின், "பழைய பாணியிலேயே பந்துவீசி அணியிலிருந்து நீக்கப்படுவதை விட, புதிய விஷயங்களை முயற்சி செய்து பார்த்து தோல்வியடைந்தால் அதில் ஒரு மனநிறைவு இருக்கும். ஒருவேளை அந்த முயற்சி வெற்றியடைந்தால், அது உங்கள் கரியரையே அடுத்த கட்டத்திற்கு எடுத்துச் செல்லும்" என்று ஜடேஜாவை ஊக்கப்படுத்தியுள்ளார். ஜாம்பவானாகத் திகழும் ஜடேஜாவிற்கு இனி இழப்பதற்கு எதுவுமில்லை என்பதால் அவர் துணிச்சலாகச் செயல்பட வேண்டும் என்பதே அஸ்வினின் கருத்தாக உள்ளது.

மேலும், விராட் கோலி தனது பேட்டிங்கில் அவ்வப்போது செய்யும் மாற்றங்களைப் போல, ஜடேஜாவும் தன்னைத்தானே மறுசீரமைப்பு (Reinvent) செய்து கொள்ள வேண்டியது காலத்தின் கட்டாயம் என்று அஸ்வின் வலியுறுத்தியுள்ளார். ஜடேஜாவின் பேட்டிங்கில் ஸ்பின்னர்களுக்கு எதிரான குறைவான ஸ்ட்ரைக் ரேட் கவலையளிப்பதாக உள்ளதாகவும் அவர் குறிப்பிட்டுள்ளார். 37 வயதாகும் ஜடேஜாவிற்கு இது ஒரு முக்கியமான காலகட்டம் என்றும், ஐபிஎல் தொடரில் அவர் காட்டும் செயல்பாடே அவரது ஒருநாள் மற்றும் டி20 உலகக் கோப்பை வாய்ப்பைத் தீர்மானிக்கும் என்றும் அஸ்வின் கணித்துள்ளார்.

இந்த விமர்சனம் ஒரு நண்பராகவும், சக வீரராகவும் ஜடேஜாவின் நலன் கருதியே முன்வைக்கப்பட்டுள்ளதாக அஸ்வின் தெளிவுபடுத்தியுள்ளார். ஜடேஜா மற்றும் குல்தீப் யாதவ் போன்ற சீனியர் ஸ்பின்னர்கள் இன்னும் கொஞ்சம் 'கிரியேட்டிவ்' ஆக மாறினால் மட்டுமே நவீன கால கிரிக்கெட்டில் தாக்குப்பிடிக்க முடியும் என்பது அஸ்வினின் இறுதிச் செய்தியாக உள்ளது. வரும் ஐபிஎல் தொடரில் ஜடேஜா தனது பந்துவீச்சில் அந்த புதிய மாற்றங்களைக் கொண்டு வருவாரா என்பதைப் பொறுத்திருந்துதான் பார்க்க வேண்டும்.