விண்வெளியில் அவசரநிலை: Crew-11 குழுவை முன்கூட்டியே பூமிக்கு அழைக்கிறது நாசா!
சர்வதேச விண்வெளி நிலையத்தின் (ISS) வரலாற்றில் முதல்முறையாக, ஒரு விண்வெளி வீரரின் மருத்துவத் தேவைக்காக ஒட்டுமொத்த குழுவையும் அவசரமாகப் பூமிக்குத் திரும்ப அழைக்க நாசா (NASA) முடிவு செய்துள்ளது. கடந்த ஆகஸ்ட் மாதம் முதல் விண்வெளியில் ஆய்வுப் பணிகளில் ஈடுபட்டு வந்த 'SpaceX Crew-11' குழுவினர், திட்டமிட்ட காலத்திற்கு முன்பே பூமிக்குத் திரும்புவார்கள் என்று நாசா நிர்வாகி ஜாரெட் ஐசக்மேன் அதிகாரப்பூர்வமாக அறிவித்துள்ளார். நான்கு பேர் கொண்ட இந்தக் குழு அடுத்த மாதம் வரை விண்வெளியில் இருக்க வேண்டிய நிலையில், இந்த திடீர் முடிவு எடுக்கப்பட்டுள்ளது.
கடந்த ஜனவரி 7-ம் தேதியன்று விண்வெளி வீரர் ஒருவருக்கு உடல்நலக் குறைவு ஏற்பட்டதாகவும், தற்போது அவரது நிலை சீராக இருப்பதாகவும் நாசா தெரிவித்துள்ளது. இருப்பினும், விண்வெளியில் இருக்கும் வரையறுக்கப்பட்ட மருத்துவ வசதிகளைக் கொண்டு சிகிச்சை அளிப்பதை விட, பூமிக்கு அழைத்து வந்து அதிநவீன மருத்துவப் பரிசோதனைகளை மேற்கொள்வதே பாதுகாப்பானது என நாசா கருதுகிறது. தனிப்பட்ட பாதுகாப்பு மற்றும் அந்த வீரரின் அந்தரங்கம் கருதி, பாதிக்கப்பட்ட வீரர் யார் என்ற விவரத்தை நாசா வெளியிட மறுத்துவிட்டது.
இந்தக் குழுவில் நாசாவைச் சேர்ந்த ஜெனா கார்ட்மேன், மைக் ஃபின்கே, ஜப்பானின் கிமியா யுய் மற்றும் ரஷ்யாவின் ஒலெக் பிளாட்டோனோவ் ஆகியோர் உள்ளனர். இவர்கள் பயணிக்கும் விண்கலம் காலநிலை சாதகமாக இருக்கும் பட்சத்தில், கலிபோர்னியா கடற்கரை ஓரம் கடலில் இறங்கும் (Splashdown) வகையில் வழிமுறைகள் தயார் செய்யப்பட்டுள்ளன. இந்தப் பயணம் பாதியிலேயே நிறுத்தப்படுவதால், விண்வெளி நிலையத்தின் பராமரிப்புப் பணிகளில் தொய்வு ஏற்படாமல் இருக்க அடுத்த குழுவான 'Crew-12' விண்கலத்தை முன்கூட்டியே ஏவுவது குறித்தும் நாசா தீவிரமாக ஆலோசித்து வருகிறது.
தற்போது விண்வெளி நிலையத்தில் எஞ்சியிருக்கும் ரஷ்ய மற்றும் அமெரிக்க விண்வெளி வீரர்கள் நிலையத்தைப் பராமரிப்பார்கள். உக்ரைன் போர் காரணமாகச் சர்வதேச அளவில் அரசியல் பதற்றங்கள் நிலவினாலும், விண்வெளி ஆய்வில் நாசாவும் ரஷ்யாவின் ரோஸ்கோஸ்மோஸும் (Roscosmos) தொடர்ந்து இணைந்து செயல்பட்டு வருவது குறிப்பிடத்தக்கது. விண்வெளி வீரர்களின் பாதுகாப்பிற்கு முன்னுரிமை அளிக்கும் வகையில் எடுக்கப்பட்டுள்ள இந்த 'மருத்துவ வெளியேற்ற' (Medical Evacuation) நடவடிக்கை சர்வதேச விண்வெளித் துறையில் மிக முக்கியமான ஒன்றாகப் பார்க்கப்படுகிறது.