இருப்பதற்காகவோ நான் அரசியலுக்கு வரவில்லை" என்று மாமல்லபுரம் கூட்டத்தில் விஜய் பேசிய ஒற்றை வார்த்தை, அதிமுக வட்டாரத்தை நிலைகுலையச் செய்துள்ளது. தமிழகத்தின் இரு பெரும் திராவிடக் கட்சிகளுமே பாஜகவிடம் சரணடைந்துவிட்டதாகச் சாடிய விஜய், "அதிமுகவினர் நேரடியாக அடிமையாக இருக்கிறார்கள், ஆனால் திமுகவினரோ மறைமுகமாக அடிமையாக இருந்து கொண்டு நாடகமாடுகிறார்கள்" என அதிரடியாக முழங்கினார். விஜய்யின் இந்த நேரடித் தாக்குதலைச் சற்றும் எதிர்பார்க்காத எடப்பாடி பழனிசாமி தரப்பு, தற்போது அவருக்குக் கடுமையான பதிலடிகளைத் தரத் தொடங்கியுள்ளது.

நேற்று வரை தவெக தங்களது கூட்டணியில் இணையும் என்று கணக்குப் போட்டுக் கொண்டிருந்த அதிமுகவிற்கு, விஜய்யின் இந்தப் பேச்சு பேரிடியாக இறங்கியுள்ளது. "நாம் புதிய கட்சி, இவர்களுடன் யாரும் கூட்டணி வைக்க மாட்டார்கள் எனச் சிலர் நம்மைக் குறைத்து மதிப்பிடுகிறார்கள். ஆனால், மக்கள் நம்மைச் சரியாக மதிப்பிடுவதால் தான் உச்சத்தில் வைத்திருக்கிறார்கள்" என்று விஜய் குறிப்பிட்டது, தான் தனித்தே களம் காணத் தயார் என்பதைத் தெள்ளத்தெளிவாக உணர்த்தியுள்ளது. இதன் மூலம், விஜய்யை நம்பித் தனது அரசியல் வியூகங்களை வகுத்து வந்த அதிமுகவின் "பகல் கனவு" கலைந்துவிட்டதாக அரசியல் நோக்கர்கள் கருதுகின்றனர்.

செங்கல்பட்டு மாவட்டம் மாமல்லபுரத்தில் நடைபெற்ற இந்தச் செயல்வீரர்கள் கூட்டத்தில், தனது தொண்டர்களுக்கு உற்சாகமூட்டிய விஜய், "எனக்கு அழுத்தம் இருப்பதாக நினைக்கிறார்களா? அழுத்தத்திற்கு அடங்கும் ஆள் நான் அல்ல" என்று கர்ஜித்தார். ஆனால், அதே சமயம் மக்களுக்கு இருக்கும் அழுத்தத்தையே தான் தனது அழுத்தமாகக் கருதுவதாகவும் அவர் உணர்ச்சிவசப்பட்டுப் பேசினார். திமுகவின் தேர்தல் அறிக்கைகள் வெறும் கவர்ச்சிகரமான வேடங்கள் மட்டுமே என்றும், அவர்களின் உண்மை முகம் விரைவில் மக்கள் முன் கலைந்துவிடும் என்றும் அவர் கடுமையாக விமர்சித்தார்.

விஜய்யின் இந்தத் திடீர் அரசியல் பாய்ச்சல், அதிமுகவினரை நேரடியாக அவரைத் தாக்கத் தூண்டியுள்ளது. "பனையூர் பண்ணையார்" என்று விஜய்யைக் கிண்டலடித்த அதிமுகவினர், அவர் அரசியலுக்குப் புதியவர் என்பதால் எதை வேண்டுமானாலும் பேசுகிறார் என்று சாடி வருகின்றனர். இருப்பினும், விஜய்யின் இந்தப் பேச்சு 2026 சட்டமன்றத் தேர்தலில் ஒரு மிகப்பெரிய அரசியல் மாற்றத்திற்கு வித்திடும் என்று அவரது ஆதரவாளர்கள் நம்பிக்கையுடன் இருக்கிறார்கள். இனி தமிழக அரசியலில் விஜய் - அதிமுக இடையேயான மோதல் இன்னும் தீவிரமடையும் என்பது உறுதி.