இந்தியா - பாகிஸ்தான் அரசியலால் T20 உலகக்கோப்பை கனவு கலையுதா?

எதிர்வரும் டி20 உலகக்கோப்பை தொடருக்காகத் தயாராகி வரும் இங்கிலாந்து அணிக்கு, இந்திய அரசாங்கத்தின் விசா நடைமுறைகளால் பெரும் பின்னடைவு ஏற்பட்டுள்ளது. இங்கிலாந்து அணியின் நட்சத்திர சுழற்பந்து வீச்சாளர்களான அடில் ரஷித் மற்றும் ரெஹான் அகமது ஆகிய இருவருக்கும் இந்திய விசா இன்னும் வழங்கப்படவில்லை. இவர்கள் இருவரும் பாகிஸ்தான் வம்சாவளியைச் சேர்ந்தவர்கள் என்பதால், இந்தியா - பாகிஸ்தான் இடையேயான அரசியல் மற்றும் ராஜதந்திர ரீதியிலான விரிசல்களே இந்தத் தாமதத்திற்கு முக்கியக் காரணம் எனக் கூறப்படுகிறது. இதனால் இந்த வார இறுதியில் இலங்கை செல்லும் இங்கிலாந்து அணியுடன் இவர்கள் இருவரும் பயணிக்க வாய்ப்பில்லை என்று தெரிகிறது.

இந்த விசா விவகாரம் இங்கிலாந்து கிரிக்கெட் வாரியத்திற்கு (ECB) புதிய ஒன்றல்ல. கடந்த காலங்களில் சோயிப் பஷீர் மற்றும் சாகிப் மஹ்மூத் போன்ற பாகிஸ்தான் வம்சாவளி வீரர்களும் இந்தியா வருவதற்கு இதுபோன்ற கடும் சோதனைகளை எதிர்கொண்டுள்ளனர். தற்போது அடில் ரஷித் தென்னாப்பிரிக்காவிலும், ரெஹான் அகமது ஆஸ்திரேலியாவிலும் லீக் போட்டிகளில் விளையாடி வருகின்றனர். அங்கிருந்து அவர்கள் நேரடியாக இலங்கை அல்லது இந்தியா வருவதற்குத் திட்டமிடப்பட்டிருந்தது. இருப்பினும், தற்போதைய தாமதத்தால் இங்கிலாந்து அணி தனது பயிற்சி ஆட்டங்களில் இன்றி விளையாட வேண்டிய கட்டாயத்திற்குத் தள்ளப்பட்டுள்ளது.

பிப்ரவரி 8-ம் தேதி மும்பையில் நேபாளத்திற்கு எதிரான ஆட்டத்துடன் இங்கிலாந்து தனது உலகக்கோப்பை பயணத்தைத் தொடங்குகிறது. அதற்கு முன்னதாக இலங்கையில் ஜனவரி 22 முதல் மூன்று ஒருநாள் மற்றும் மூன்று டி20 போட்டிகளில் இங்கிலாந்து விளையாடவுள்ளது. விசா சிக்கலால் இந்த இரு முக்கிய சுழற்பந்து வீச்சாளர்கள் இல்லையென்றால், கேப்டன் ஹாரி புரூக் பெரும் சவால்களைச் சந்திக்க நேரிடும். லியாம் டாவ்சன் மட்டுமே தற்போது அணியில் உள்ள ஒரே அனுபவமுள்ள சுழற்பந்து வீச்சாளர் என்பதால், ஜாக்ஸ் மற்றும் பெத்தேல் போன்ற பகுதிநேர பந்துவீச்சாளர்களையே இங்கிலாந்து நம்பியிருக்க வேண்டியுள்ளது.

மறுபுறம், இங்கிலாந்து கேப்டன் ஹாரி புரூக் மீதான ஒழுங்குமுறை நடவடிக்கை அணியின் சூழலை மேலும் பாதித்துள்ளது. கடந்த அக்டோபரில் நியூசிலாந்தில் உள்ள இரவு விடுதி ஒன்றில் பவுன்சர் ஒருவருடன் வாக்குவாதத்தில் ஈடுபட்டதற்காக, அவருக்கு இங்கிலாந்து கிரிக்கெட் வாரியம் சுமார் 30,000 பவுண்டுகள் (இந்திய மதிப்பில் சுமார் 32 லட்சம் ரூபாய்) அபராதம் விதித்துள்ளது. ஆஷஸ் தொடரில் 4-1 எனத் தோற்ற நிலையில், கேப்டன் புரூக் மற்றும் பயிற்சியாளர் பிரண்டன் மெக்கல்லம் ஆகிய இருவருக்கும் இந்த உலகக்கோப்பை ஒரு வாழ்வா சாவா போராட்டமாக அமைந்துள்ளது.

உலகக்கோப்பை நெருங்கும் வேளையில், வங்கதேச அணியும் பாதுகாப்பு காரணங்களைக் கூறி தனது போட்டிகளை இந்தியாவிற்கு வெளியே நடத்தக் கோரிக்கை விடுத்துள்ளது. ஏற்கனவே பாகிஸ்தான் விளையாடும் போட்டிகள் இலங்கைக்கு மாற்றப்பட்டுள்ளன. இத்தகைய அரசியல் மற்றும் பாதுகாப்பு சார்ந்த சிக்கல்களுக்கு நடுவே, டி20 உலகக்கோப்பை தொடர் திட்டமிட்டபடி நடக்குமா என்ற கேள்வி எழுந்துள்ளது. இங்கிலாந்து வீரர்கள் இருவருக்கும் விசா கிடைப்பதை உறுதி செய்ய அந்நாட்டு அரசாங்கம் தற்போது இந்திய அதிகாரிகளுடன் பேச்சுவார்த்தையில் ஈடுபட்டுள்ளது.