தமிழக சட்டமன்றத் தேர்தல் களம் சூடுபிடித்துள்ள நிலையில், நடிகர் விஜய்யின் தமிழக வெற்றிக் கழகம் (த.வெ.க.) எவ்வளவு வாக்குகளைப் பெறும் என்பது குறித்துப் பல்வேறு அரசியல் கணிப்புகள் வெளியாகி வருகின்றன. காங்கிரஸ் கட்சியின் தேர்தல் வியூக வகுப்பாளர் பிரவீன் சக்ரவர்த்தி மற்றும் பல ஊடகங்களின் கருத்துக்கணிப்புகள், த.வெ.க. தனித்து நின்றால் 18 முதல் 19.2 சதவீத வாக்குகளைப் பெற வாய்ப்புள்ளதாகத் தெரிவித்துள்ளன. இந்தச் சூழலில், இது குறித்துப் பாஜக முன்னாள் தலைவர் தமிழிசை சௌந்தரராஜன் தெரிவித்துள்ள கருத்து அரசியல் வட்டாரத்தில் விவாதத்தைக் கிளப்பியுள்ளது.

தனியார் ஊடகம் ஒன்றிற்குப் பேட்டியளித்த தமிழிசை சௌந்தரராஜன், "விஜயிடம் இருப்பது தற்போது வரை நிரூபிக்கப்படாத வாக்குகள் மட்டுமே. அவர் வரும் தேர்தலில் 15 சதவீத வாக்குகளை வாங்கினாலும், மற்றொரு பலமான கூட்டணியுடன் சேராமல் தனித்து நின்றால் அந்த வாக்குகள் பூஜ்ஜியமாகவே (Zero Value) கருதப்படும். இது எனது தனிப்பட்ட கருத்து மட்டுமல்ல, அரசியலில் அனுபவம் வாய்ந்த பலருடைய கருத்தும் இதுவே" என்று வெளிப்படையாகத் தெரிவித்துள்ளார்.

விஜய்யின் த.வெ.க. தனித்து நின்று வாக்குகளைப் பிரிப்பது, ஆளுங்கட்சியான திமுகவிற்கே சாதகமாக முடியும் என்று அரசியல் விமர்சகர்கள் கூறி வருகின்றனர். திமுகவிற்கு எதிரான வாக்குகள் சிதறினால், அது மீண்டும் திமுக ஆட்சிக் கட்டிலில் அமரவே வழிவகுக்கும் என்பதால், விஜய் அதிமுக - பாஜக போன்ற பெரிய கூட்டணிகளுடன் இணைந்தால் மட்டுமே அவரது வாக்குகளுக்கு ஒரு நிஜமான பலன் கிடைக்கும் என்பது தமிழிசையின் வாதமாக உள்ளது.

மேலும், ரஜினிகாந்தே அரசியலில் பெரிய மாற்றத்தை ஏற்படுத்த முடியாமல் பின்வாங்கிய நிலையில், விஜய்யின் தாக்கம் எந்த அளவிற்கு இருக்கும் என்பது கேள்விக்குறியே என்ற தொனியிலும் பாஜக தரப்பிலிருந்து விமர்சனங்கள் எழுந்துள்ளன. 234 தொகுதிகளிலும் தேர்தல் பணிகளைத் தீவிரப்படுத்தி வரும் த.வெ.க. தொண்டர்களுக்கு, தமிழிசையின் இந்த 'பூஜ்ஜியம்' (Zero) கமெண்ட் கடும் அதிருப்தியை ஏற்படுத்தியுள்ளது. விஜய்யின் அரசியல் நகர்வு கூட்டணி நோக்கியா அல்லது தனித்துப் போட்டியா என்பது வரும் நாட்களில் தெரிந்துவிடும்.