ஏற்கனவே நாடாளுமன்றில் ராகுல் காந்தி மற்றும் பிரியங்கா காந்தி ஆகியோர் அமெரிக்க விஷயம் தொடர்பாகத் தொடர்ந்து சர்ச்சையை கிளப்பி வரும் நிலையில், நாடாளுமன்றம் 2 தடவை ஒத்திவைக்கப்பட்டு, பின்னர் இழுபறி நிலையில் உள்ளது. இதேவேளை காங்கிரஸ் இந்தியத் தணிக்கை குழு தொடர்பாகவும் சர்ச்சையை எழுப்பத் தயாராகி வந்தார்கள். ஆனால் அதற்கும் முந்திக் கொண்ட தகவல் துறை அமைச்சகம், தற்போது அதிரடியாக ஒரு புதிய அறிவிப்பை வெளியிட்டுள்ளது. இத்தனை ஆண்டுகள் வெளியிடாத ஒரு அறிவிப்பு இது. அதாவது ஒரு படத்திற்குத் தணிக்கைச் சான்றிதழை 18 நாட்களுக்குள் வழங்க வேண்டும் என்பதுதான். தற்போது 48 நாட்கள் வரை இழுத்தடிக்க முடியும் என்ற சட்டம் அமுலில் உள்ளது. ஆனால் இன்னும் சில தினங்களில் புது சட்டம் வருகிறது. அதன் அடிப்படையில் 18 நாட்களில் தணிக்கைச் சான்றிதழை வழங்க வேண்டும்! 

புதுடெல்லி: இந்தியத் திரைப்படத்துறையினரின் நீண்ட நாள் கோரிக்கையை ஏற்று, திரைப்படங்களுக்குத் தணிக்கைச் சான்றிதழ் (Censor Certificate) வழங்கும் நடைமுறையில் மத்திய அரசு அதிரடியான மாற்றத்தைக் கொண்டு வந்துள்ளது. முன்னதாக ஒரு திரைப்படத்திற்குச் சான்றிதழ் பெற சுமார் 48 நாட்கள் வரை காத்திருக்க வேண்டிய சூழல் இருந்தது. ஆனால், தற்போது அறிமுகப்படுத்தப்பட்டுள்ள புதிய ஆன்லைன் சான்றிதழ் முறையின் மூலம், இந்த கால அவகாசம் வெறும் 18 வேலை நாட்களாகக் குறைக்கப்பட்டுள்ளது.

நாடாளுமன்றத்தில் எதிர்க்கட்சி எம்.பி.க்கள் எழுப்பிய கேள்விக்கு மத்திய தகவல் மற்றும் ஒளிபரப்புத் துறை இணை அமைச்சர் அளித்த பதிலில் இந்தத் தகவல் உறுதி செய்யப்பட்டுள்ளது. சினிமா தயாரிப்பாளர்கள் தங்கள் படைப்புகளை வெளியிடுவதில் ஏற்படும் காலதாமதத்தைத் தவிர்க்க இந்த நடவடிக்கை எடுக்கப்பட்டுள்ளது. அதேபோல், குறும்படங்களுக்கான (Short Films) தணிக்கைச் சான்றிதழ் வழங்கும் காலம் வெறும் 3 நாட்களாகக் குறைக்கப்பட்டுள்ளது குறிப்பிடத்தக்கது.

மத்திய திரைப்பட தணிக்கை வாரியம் (CBFC), திரைப்படச் சட்டம் 1952 மற்றும் 2024-ஆம் ஆண்டின் புதிய தணிக்கை விதிகளின் அடிப்படையில் இந்த மாற்றங்களைச் செய்துள்ளது. இந்தியாவின் இறையாண்மை, பாதுகாப்பு மற்றும் பொது ஒழுங்கு ஆகியவற்றிற்குப் பாதிப்பு ஏற்படாத வகையில் படங்கள் இருப்பதை உறுதி செய்த பிறகே சான்றிதழ்கள் வழங்கப்படும். தணிக்கை வாரியத்தின் முடிவுகளில் அதிருப்தி இருந்தால், உயர் நீதிமன்றத்தில் மேல்முறையீடு செய்யவும் சட்டத்தில் வழிவகை செய்யப்பட்டுள்ளது.

இந்த புதிய நடைமுறையினால் பெரிய பட்ஜெட் படங்கள் முதல் சிறு முதலீட்டுப் படங்கள் வரை அனைத்தும் திட்டமிட்ட தேதியில் திரைக்கு வர வழிவகை பிறந்துள்ளது. டிஜிட்டல் இந்தியா திட்டத்தின் கீழ் கொண்டு வரப்பட்ட இந்த ஆன்லைன் முறை, திரைப்படத் துறையில் நிலவி வந்த தேவையற்ற அலைச்சலையும், காலதாமதத்தையும் முற்றிலுமாக ஒழிக்கும் எனத் திரைத்துறையினர் வரவேற்பு தெரிவித்துள்ளனர்.