ஒரே நேரத்தில் 250 ராக்கெட்டுகளை ஏவும் வடகொரியாவின் புதிய ஆயுதம் - நடுங்கும் உலக நாடுகள்!

வடகொரியாவின் ஆளும் தொழிலாளர் கட்சியின் 9-வது மாநாட்டை முன்னிட்டு, அந்நாட்டின் பாதுகாப்புத் துறை தொழிலாளர்கள் 50 புதிய 600 மிமீ ராக்கெட் லாஞ்சர்களை (Multiple Rocket Launchers) அதிபர் கிம் ஜாங் உன்னிடம் பரிசாக வழங்கினர். பியோங்யாங்கில் உள்ள கலாச்சார மைய சதுக்கத்தில் நடைபெற்ற இந்த பிரம்மாண்ட விழாவில், கிம் ஜாங் உன் அந்த ராக்கெட் வாகனங்களை நேரில் ஆய்வு செய்ததோடு, ஒரு வாகனத்தை அவரே ஓட்டிப் பார்த்தது அங்கிருந்தவர்களை வியப்பில் ஆழ்த்தியது.

இந்த விழாவில் பேசிய கிம் ஜாங் உன், "இந்த ஆயுதம் பயன்படுத்தப்பட்டால், எதிரிகள் கடவுளின் பாதுகாப்பை (God's protection) கூட எதிர்பார்க்க முடியாது. இது வெறும் பீரங்கி அல்ல, எதிரிகளின் ராணுவக் கட்டமைப்பு மற்றும் கட்டளை மையங்களை நொடிப்பொழுதில் சாம்பலாக்கும் வல்லமை கொண்டது" என்று ஆக்ரோஷமாகத் தெரிவித்தார். மேலும், இந்த ராக்கெட் லாஞ்சர்களில் செயற்கை நுண்ணறிவு (AI) தொழில்நுட்பம் மற்றும் நவீன வழிகாட்டுதல் அமைப்புகள் (Composite Guidance System) புகுத்தப்பட்டுள்ளதாகவும், இது நவீன போர்க்களத்தின் போக்கையே மாற்றிவிடும் என்றும் அவர் பெருமிதம் கொண்டார்.

உளவுத்துறை தகவல்களின்படி, இந்த 600 மிமீ ராக்கெட்டுகள் சுமார் 400 கிலோமீட்டர் தொலைவில் உள்ள இலக்குகளைத் துல்லியமாகத் தாக்கும் திறன் கொண்டவை. இதன் மூலம் தென்கொரியாவின் தலைநகர் சியோல் உள்ளிட்ட முக்கிய நகரங்கள் மற்றும் அமெரிக்க - தென்கொரிய கூட்டுப் படைத் தளங்கள் அனைத்தும் வடகொரியாவின் நேரடித் தாக்குதல் எல்லைக்குள் வந்துள்ளன. இந்த ராக்கெட்டுகள் அணு ஆயுதங்களைச் சுமந்து செல்லும் திறன் கொண்டவை (Nuclear-capable) என்பதால், இது பிராந்திய பாதுகாப்பிற்குப் பெரும் சவாலாக உருவெடுத்துள்ளது.

வடகொரியா தனது 9-வது கட்சி மாநாட்டிற்கு முன்னதாக இவ்வளவு பெரிய ஆயுதக் குவியலைக் காட்டியிருப்பது, வரும் ஆண்டுகளில் அதன் ராணுவ பலத்தை இன்னும் தீவிரமாக உயர்த்தப் போவதையே காட்டுகிறது. குறிப்பாக, ரஷ்யாவுடனான நெருக்கமான ராணுவ உறவு மற்றும் உக்ரைன் போரில் வடகொரிய ஆயுதங்கள் பயன்படுத்தப்படுவதாகக் கூறப்படும் குற்றச்சாட்டுகளுக்கு மத்தியில், இந்த புதிய 'மான்ஸ்டர்' ராக்கெட் லாஞ்சர்களின் அறிமுகம் உலக நாடுகளை உற்று நோக்க வைத்துள்ளது.