இலங்கை, தலங்கம - அக்குரேகொட பகுதியில் உள்ள பல்பொருள் அங்காடி ஒன்றின் வாகன நிறுத்துமிடத்தில் கடந்த வெள்ளிக்கிழமை (பிப்ரவரி 13) வழக்கறிஞர் ஒருவரும் அவரது மனைவியும் மர்ம நபர்களால் சுட்டுக்கொல்லப்பட்டனர். பட்டப்பகலில் நடந்த இந்த கொடூர இரட்டைக் கொலைச் சம்பவம் நாடு முழுவதும் அதிர்ச்சியை ஏற்படுத்தியது. இக்கொலை தொடர்பாக தீவிர விசாரணையில் இறங்கிய இலங்கை காவல்துறையின் 12 தனிப்படைகள், தற்போது இக்கொலையுடன் தொடர்புடைய முக்கிய நபர்களைக் கைது செய்துள்ளனர்.

இந்தக் கொலைச் சம்பவத்திற்குப் பயன்படுத்தப்பட்ட துப்பாக்கிகளைக் கடத்திச் சென்றதாகக் கருதப்படும் இரண்டு சகோதரர்கள், கடந்த 16-ம் தேதி கொட்டாவ பகுதியில் வைத்து மேல்மாகாண தெற்கு குற்றப்பிரிவினரால் கைது செய்யப்பட்டனர். கைதான இந்த சகோதரர்கள் இருவரும் இன்று (பிப்ரவரி 18) கடுவலை நீதவான் நீதிமன்றத்தில் ஆஜர்படுத்தப்பட்டனர். வழக்கை விசாரித்த நீதவான், இவர்களை வரும் மார்ச் மாதம் 4-ம் தேதி வரை விளக்கமறியலில் வைக்க உத்தரவிட்டுள்ளார்.

மேலும், இந்த வழக்கில் நேற்று கைது செய்யப்பட்ட மூன்றாவது சந்தேக நபரிடம் தீவிர விசாரணை நடத்த வேண்டியிருப்பதால், அவரை 72 மணிநேரம் தடுப்புக்காவலில் வைத்து விசாரணை செய்ய நீதிமன்றம் காவல்துறைக்கு அனுமதி வழங்கியுள்ளது. இக்கொலைச் சம்பவத்தின் பின்னணியில் திட்டமிட்ட குற்றச்செயல் கும்பல்கள் இருக்கலாம் என்ற கோணத்தில் விசாரணை முடுக்கிவிடப்பட்டுள்ளது. கொலைக்கு பயன்படுத்தப்பட்ட கார் எரிக்கப்பட்ட நிலையில் மீட்கப்பட்டது, இது ஒரு நன்கு திட்டமிடப்பட்ட சதி என்பதை உறுதிப்படுத்துகிறது.

ஆரம்பகட்ட விசாரணையில், இக்கொலைக்காகப் பயன்படுத்தப்பட்ட ஆயுதங்களை இடமாற்றம் செய்வதிலும், கொலையாளிகளுக்குப் பாதுகாப்பு வழங்குவதிலும் இந்தச் சகோதரர்கள் முக்கியப் பங்காற்றியது தெரியவந்துள்ளது. வழக்கறிஞர் தம்பதியினர் ஏன் இலக்கு வைக்கப்பட்டார்கள் என்பதற்கான உண்மையான காரணம் இன்னும் மர்மமாகவே உள்ளது. நிலத்தகராறு அல்லது அவர் கையாண்ட வழக்குகள் தொடர்பாக ஏதேனும் விரோதம் இருந்ததா என்ற ரீதியில் வாக்குமூலங்கள் பெறப்பட்டு வருகின்றன.

இலங்கை சட்டத்தரணிகள் சங்கம் இக்கொலைக்கு கடும் கண்டனம் தெரிவித்துள்ளதுடன், குற்றவாளிகளுக்குத் தகுந்த தண்டனை பெற்றுத்தர வேண்டும் என வலியுறுத்தியுள்ளது. இதற்கிடையில், இந்த வழக்கில் மேலும் சில முக்கிய புள்ளிகள் சிக்குவார்கள் என எதிர்பார்க்கப்படுகிறது. 72 மணிநேர தடுப்புக்காவலில் உள்ள மூன்றாவது நபர் அளிக்கும் தகவல்கள், கொலையின் பின்னணியில் உள்ள 'சூத்திரதாரியை' கண்டறிய உதவும் எனப் புலனாய்வுத் துறையினர் நம்புகின்றனர்.

தலைநகர் கொழும்பை ஒட்டியுள்ள பகுதிகளில் பாதுகாப்பு பலப்படுத்தப்பட்டுள்ள நிலையில், இந்த இரட்டைக் கொலைச் சம்பவம் பொதுமக்கள் மற்றும் சட்டத்துறையினர் மத்தியில் பெரும் அச்சத்தை ஏற்படுத்தியுள்ளது. பிடிபட்டுள்ள சகோதரர்களின் பின்னணி மற்றும் அவர்களுக்குப் பாதாள உலகக் கும்பல்களுடன் உள்ள தொடர்பு குறித்துத் தனிப்படையினர் தற்போது துருவித் துருவி விசாரணை நடத்தி வருகின்றனர்.