இந்த விவகாரம் குறித்து 'பில் மற்றும் மெலிண்டா கேட்ஸ் அறக்கட்டளை' (Bill & Melinda Gates Foundation) வெளியிட்டுள்ள அறிக்கையில், எப்ஸ்டீன் உலகளாவிய சுகாதாரத் திட்டங்களுக்கு நிதி திரட்டித் தர முடியும் என்று நம்பியதாலேயே அவருடன் ஒரு சில ஊழியர்கள் மற்றும் பில் கேட்ஸ் தொடர்பு கொண்டதாகத் தெரிவித்துள்ளது. இருப்பினும், அறக்கட்டளை அவரிடமிருந்து எந்த நிதியையும் பெறவில்லை என்றும், எப்ஸ்டீனுக்கு எந்தவித ஊதியமும் வழங்கப்படவில்லை என்றும் தெளிவுபடுத்தியுள்ளது. "பெண்கள் மற்றும் சிறுமிகளின் பாதுகாப்பு எங்களது அறக்கட்டளையின் முக்கிய கொள்கை; எப்ஸ்டீன் போன்ற ஒருவருடன் எங்களது ஊழியர்கள் தொடர்பு கொண்டது வருத்தத்திற்குரியது" என்றும் அந்த அறிக்கை கூறுகிறது.
நீதித்துறை வெளியிட்ட ஆவணங்களில், எப்ஸ்டீன் தனது ஊழியர்களுக்கு எழுதிய சில வரைவு மின்னஞ்சல்களில் பில் கேட்ஸ் குறித்த சர்ச்சைக்குரிய தகவல்கள் இடம்பெற்றிருந்தன. குறிப்பாக, பில் கேட்ஸ் ஒரு பெண்ணுடன் தொடர்பில் இருந்ததாகவும், அதனை மறைக்கத் தான் உதவியதாகவும் எப்ஸ்டீன் அதில் குறிப்பிட்டுள்ளார். ஆனால், இந்தத் தகவல்களைப் பில் கேட்ஸின் செய்தித் தொடர்பாளர் முற்றிலுமாக மறுத்துள்ளார். எப்ஸ்டீன் தன்னைத் தற்காத்துக்கொள்ளவும், மற்றவர்களை மிரட்டவும் இத்தகைய பொய்களைப் பரப்பியிருப்பதாக அவர் விளக்கம் அளித்துள்ளார்.
எப்ஸ்டீன் விவகாரத்தில் எழுந்துள்ள இந்தத் தொடர் சர்ச்சைகளால், பில் கேட்ஸ் தனது பொது நிகழ்வுகளைத் தவிர்த்து வருகிறார். குறிப்பாக, சமீபத்தில் இந்தியாவில் நடைபெற்ற ஜி20 ஏஐ (AI) உச்சி மாநாட்டில் அவர் வழங்கவிருந்த முக்கிய உரையை ரத்து செய்தார். இந்த விவகாரம் தனது அறக்கட்டளையின் நற்பெயருக்குக் களங்கம் விளைவிக்கக் கூடாது என்பதற்காகவே அவர் இத்தகைய முடிவுகளை எடுத்து வருவதாகக் கூறப்படுகிறது. பில் கேட்ஸின் முன்னாள் மனைவி மெலிண்டாவும், இந்த விவகாரத்தில் பல மர்மங்கள் நீடிப்பதாகவும், அவற்றுக்குக் கேட்ஸ் பதிலளிக்க வேண்டும் என்றும் தெரிவித்துள்ளார்.