ரஷ்யாவின் பாஷ்கோர்டோஸ்தான் (Bashkortostan) குடியரசில் உள்ள உஃபா (Ufa) நகர மருத்துவப் பல்கலைக்கழக விடுதியில், கடந்த சனிக்கிழமை (பிப்ரவரி 7, 2026) 15 வயது சிறுவன் ஒருவன் கத்தியுடன் புகுந்து கோரத் தாக்குதல் நடத்தினான். இந்தத் தாக்குதலில் நான்கு இந்திய மாணவர்கள் உட்பட ஆறு பேர் படுகாயமடைந்தனர். தாக்குதலில் ஈடுபட்ட அந்தச் சிறுவன், தடை செய்யப்பட்ட 'NS/WP' எனும் நவ-நாஜி (Neo-Nazi) அமைப்பைச் சேர்ந்தவன் என்றும், அவன் இனவெறி மற்றும் யூதப்படுகொலை (Holocaust) தொடர்பான முழக்கங்களை எழுப்பிக்கொண்டே இந்தத் தாக்குதலை நடத்தியதாக முதற்கட்ட விசாரணையில் தெரியவந்துள்ளது.

இந்தச் சம்பவத்தின் மிகவும் கொடூரமான அம்சம் என்னவென்றால், அந்தத் தாக்குதல்காரன் பாதிக்கப்பட்டவர்களின் இரத்தத்தைப் பயன்படுத்தி விடுதிச் சுவரில் 'சுவஸ்திகா' (Swastika) சின்னத்தை வரைந்துள்ளான். மேலும், சிறுவன் தாக்குதல் நடத்திய காட்சிகளை தனது டெலிகிராம் பக்கத்தில் நேரலையாகப் (Live stream) பகிர்ந்ததுடன், காயமடைந்த மாணவர்களுடன் 'செல்பி' புகைப்படங்களையும் எடுத்துக்கொண்டது அதிர்ச்சியை ஏற்படுத்தியுள்ளது. "மனித உயிர்களுக்கு மதிப்பில்லை, நீங்கள் அனைவரும் உயிரியல் கழிவுகள் (Biowaste)" என்று எழுதியிருந்த குறிப்புகளையும் காவல்துறை கைப்பற்றியுள்ளது.

இந்தத் தாக்குதல் குறித்து டார்ஜிகிஸ்தான் மற்றும் இந்திய தூதரகங்கள் கடும் கண்டனம் தெரிவித்துள்ளன. ரஷ்ய அதிபர் மாளிகை இதனை ஒரு 'பயங்கரவாதச் செயல்' என்று வர்ணித்துள்ளது. தாக்குதலில் ஈடுபட்ட சிறுவன், கைது செய்ய முற்பட்ட இரண்டு காவல்துறை அதிகாரிகளையும் கத்தியால் குத்திவிட்டு, தன்னையும் காயப்படுத்திக்கொண்டான். தற்போது குறித்த நபர்  ஆபத்தான நிலையில் மருத்துவமனையில் அனுமதிக்கப்பட்டுள்ளான்.குறித்த சிறுவன் கடந்த சில ஆண்டுகளாகவே இணையதளம் வாயிலாக நவ-நாஜி சித்தாந்தங்களால் ஈர்க்கப்பட்டு தீவிரவாதியாக மாறியிருக்கலாம் என்று சந்தேகிக்கப்படுகிறது.