உக்ரைன் போரில் ரஷ்ய ராணுவம் சந்தித்து வரும் வரலாறு காணாத உயிர்ச்சேதங்களை ஈடுகட்ட, ரஷ்ய அதிபர் விளாடிமிர் புதின் ஒரு புதிய "மறைமுக ராணுவத் திரட்டல்" (Secret Rolling Draft) திட்டத்தைத் தொடங்கியுள்ளதாகப் போர் ஆய்வாளர்கள் (ISW) தெரிவித்துள்ளனர். கடந்த சில வாரங்களில் மட்டும் ரஷ்யாவின் தன்னார்வ ராணுவச் சேர்க்கை கடுமையாகச் சரிந்துள்ள நிலையில், தற்போது ரிசர்வ் படையில் உள்ள 20 லட்சம் வீரர்களை வலுக்கட்டாயமாகப் போருக்குப் பயன்படுத்த ரஷ்யா சட்டம் இயற்றியுள்ளது. இது புதினின் ராணுவம் தற்போது ஒரு "பலவீனமான நிலையில்" (Place of Weakness) இருப்பதையே காட்டுவதாக அரசியல் வல்லுநர்கள் சுட்டிக்காட்டுகின்றனர்.

மேற்கத்திய உளவுத்துறையின் கணக்குப்படி, கடந்த ஜனவரி மாதத்தில் மட்டும் ரஷ்யா தனது ராணுவத்திற்குச் சேர்த்த வீரர்களை விட, போர்க்களத்தில் இழந்த வீரர்களின் எண்ணிக்கை 9,000 அதிகம் என்று கூறப்படுகிறது. உக்ரைனின் டிரோன் தாக்குதல்களால் ரஷ்யப் படைகளுக்கு மாதம் 30,000 முதல் 35,000 வரை உயிர்ச்சேதம் ஏற்படுவதாக உக்ரைன் பாதுகாப்புத் துறை தெரிவித்துள்ளது. இந்த இடைவெளியை நிரப்பவே, தற்போது சாதாரண குடிமக்களை மீண்டும் ராணுவத்தில் சேர்க்கும் நிலைக்கு ரஷ்யா தள்ளப்பட்டுள்ளது. 2022-ல் நடந்த நேரடி ராணுவத் திரட்டல் போது 9 லட்சம் இளைஞர்கள் நாட்டை விட்டு வெளியேறியதால், இம்முறை புதின் மிகவும் ரகசியமாகச் செயல்படுகிறார்.

புதினின் இந்த நடவடிக்கையை எதிர்க்கும் அல்லது விமர்சிக்கும் நபர்களைத் தண்டிக்க ரஷ்ய நாடாளுமன்றத்தில் (Duma) புதிய சட்டங்கள் கொண்டு வரப்பட்டுள்ளன. குறிப்பாக, 'டெலிகிராம்' (Telegram) போன்ற செயலிகள் முடக்கப்படுவது மற்றும் ராணுவச் சேவைக்கு வராதவர்களின் சொத்துக்களைப் பறிமுதல் செய்யும் நடவடிக்கைகள் தீவிரப்படுத்தப்பட்டுள்ளன. நாட்டின் பொருளாதாரத்தை விடப் போருக்கே அதிக முக்கியத்துவம் அளிக்கப்படுவதால், வரும் 2026-ம் ஆண்டின் இறுதியில் ரஷ்யாவின் பொருளாதாரமும், ராணுவத் தளவாடங்களின் இருப்பும் மிகப்பெரிய சரிவைச் சந்திக்கும் என 'Royal United Services Institute' (RUSI) எச்சரித்துள்ளது.

அமெரிக்காவில் தற்போது நடைபெற்று வரும் அமைதிப் பேச்சுவார்த்தைகளுக்கு மத்தியிலும், புதின் தனது பிடிவாதத்தைக் கைவிடாமல் இருப்பது போரை மேலும் நீட்டிக்கச் செய்யும் என அஞ்சப்படுகிறது. ரஷ்யா தனது 1967-ம் காலத்து பழைய டாங்கிகளையும், வடகொரியாவின் வெடிகுண்டுகளையும் நம்பிப் போரைத் தொடர்வது அதன் பலவீனத்தையே உலகிற்குப் பறைசாற்றுகிறது. உக்ரைன் தனது தாக்குதலைத் தீவிரப்படுத்தினால், புதின் தனது சொந்த நாட்டிற்குள்ளேயே மிகப்பெரிய மக்கள் கிளர்ச்சியைச் சந்திக்க வேண்டியிருக்கும் என ஆய்வாளர்கள் கணித்துள்ளனர்.