பாலியல் குற்றவாளி ஜெப்ரி எப்ஸ்டீன் தொடர்பான ரகசிய ஆவணங்கள் அமெரிக்காவில் வெளியாகி உலகையே அதிரவைத்து வரும் நிலையில், பிரிட்டிஷ் இளவரசர் வில்லியம் மற்றும் இளவரசி கேத்ரின் ஆகியோர் முதல்முறையாகத் தங்களின் மௌனத்தைக் கலைத்துள்ளனர். "தொடர்ச்சியாக வெளியாகும் இந்தத் திடுக்கிடும் தகவல்கள் தங்களுக்குப் மிகுந்த கவலையளிப்பதாகவும், தங்களின் எண்ணங்கள் அனைத்தும் பாதிக்கப்பட்டவர்களின் பக்கமே இருப்பதாகவும்" கென்சிங்டன் அரண்மனை செய்தித் தொடர்பாளர் மூலம் அவர்கள் அதிகாரப்பூர்வமாகத் தெரிவித்துள்ளனர். அரச குடும்பத்தின் மூத்த உறுப்பினர்கள் ஒரு பாலியல் ஊழல் குறித்து இவ்வளவு வெளிப்படையாகக் கருத்து தெரிவிப்பது இதுவே முதல்முறை என்பது குறிப்பிடத்தக்கது.

இளவரசர் வில்லியமின் இந்த அதிரடி அறிக்கை, அவரது சித்தப்பா ஆண்ட்ரூ (Andrew Mountbatten-Windsor) மீதான பிடியை மேலும் இறுக்கியுள்ளது. எப்ஸ்டீன் ஆவணங்களில் ஆண்ட்ரூ ஒரு பெண்ணின் மீது மண்டியிட்டு அமர்ந்திருப்பது போன்ற சர்ச்சைக்குரிய புகைப்படங்கள் வெளியாகியுள்ளன. அதுமட்டுமின்றி, பாதிக்கப்பட்ட பெண் விர்ஜினியா ஜூஃப்ரேயுடன் (Virginia Giuffre) ஆண்ட்ரூ இருக்கும் புகழ்பெற்ற புகைப்படம் போலியானது என அவர் கூறி வந்த நிலையில், அது உண்மையானதுதான் என்பதை உறுதிப்படுத்தும் ரகசிய மின்னஞ்சல்கள் தற்போது அம்பலமாகியுள்ளன. இதனால் ஆண்ட்ரூ தனது வின்ட்சர் இல்லத்திலிருந்து அவசர அவசரமாக வெளியேற்றப்பட்டு, சாண்ட்ரிங்ஹாம் எஸ்டேட்டுக்கு மாற்றப்பட்டுள்ளார்.

இந்த விவகாரத்தில் மற்றொரு பகீர் தகவலாக, ஆண்ட்ரூ இங்கிலாந்தின் வர்த்தகத் தூதராகப் பணியாற்றியபோது, மிக ரகசியமான அரசுத் தகவல்களை எப்ஸ்டீனுக்குக் கசியவிட்டதாகக் குற்றம் சாட்டப்பட்டுள்ளது. சிங்கப்பூர், ஹாங்காங் மற்றும் வியட்நாம் ஆகிய நாடுகளுக்கு அவர் மேற்கொண்ட அதிகாரப்பூர்வ பயணங்கள் மற்றும் முதலீட்டு வாய்ப்புகள் குறித்த ரகசிய விவரங்களை எப்ஸ்டீனின் மின்னஞ்சலுக்கு அவர் அனுப்பியதற்கான ஆதாரங்கள் கிடைத்துள்ளன. இது ஒரு நாட்டின் தூதராக இருந்து கொண்டு செய்த மிகப்பெரிய துரோகம் என்று அந்நாட்டு அரசியல் விமர்சகர்கள் கடுமையாகச் சாடி வருகின்றனர்.

மறுபுறம், 2010-ஆம் ஆண்டில் எப்ஸ்டீனால் அனுப்பப்பட்ட மற்றொரு பெண், ஆண்ட்ரூவின் இல்லத்தில் வைத்து பாலியல் ரீதியாகத் துன்புறுத்தப்பட்டதாக பிபிசி (BBC) செய்தி வெளியிட்டுள்ளது. இது தொடர்பாக தேம்ஸ் வேலி போலீஸார் தற்போது விசாரணையைத் தொடங்கியுள்ளனர். இளவரசர் வில்லியம் தனது சவுதி அரேபியா பயணத்திற்கு முன்னதாக இந்த அறிக்கையை வெளியிட்டதன் மூலம், குற்றச்சாட்டுகளுக்கு உள்ளான ஆண்ட்ரூவிடமிருந்து அரச குடும்பம் தன்னை முழுமையாகத் துண்டித்துக் கொள்வதை உறுதிப்படுத்தியுள்ளார். "இனி ஆண்ட்ரூவுக்கு அரச குடும்பத்தில் இடமில்லை" என்ற மறைமுக எச்சரிக்கையாகவே இது பார்க்கப்படுகிறது.