உக்ரைன் வான்பரப்பில் ரஷ்யாவின் 'ஷாஹெட்' (Shahed) ரக தற்கொலை படை ட்ரோன் ஒன்றை, உக்ரைனின் F-16 ரக போர் விமானம் வானிலேயே வழிமறித்துத் தாக்கி அழிக்கும் அதிரடி வீடியோ காட்சிகள் வெளியாகியுள்ளன. பனி படர்ந்த போர்க்களத்திற்கு மேலே சீறிப்பாய்ந்த அந்த ட்ரோன், போர் விமானத்தின் துல்லியமான தாக்குதலால் தீப்பிழம்பாக வெடித்துச் சிதறியது. இந்தத் தாக்குதலுக்குப் பிறகு, சிதறிய பாகங்கள் கீழே விழுந்தன. ரஷ்ய அதிபர் புதின் ஏவிய இந்த ஆளில்லா விமானம், இலக்கை அடையும் முன்பே உக்ரைன் விமானியால் வெற்றிகரமாக முறியடிக்கப்பட்டது.

உக்ரைன் மீது நடத்தப்படும் இந்தப் போரில், ரஷ்யா சமீபகாலமாக இத்தகைய தாக்குதல் ட்ரோன்களையே அதிகம் நம்பியுள்ளது. வெடிமருந்துகளைச் சுமந்து சென்று இலக்கின் மீது மோதி வெடிக்கும் வகையில் வடிவமைக்கப்பட்டுள்ள இந்த ட்ரோன்கள், உக்ரைனின் மின் உற்பத்தி நிலையங்கள், ராணுவ நிலைகள் மற்றும் மக்கள் வசிக்கும் பகுதிகளைக் குறிவைத்துத் தாக்கப் பயன்படுத்தப்பட்டு வருகின்றன. இத்தகைய இக்கட்டான சூழலில், அமெரிக்கத் தயாரிப்பான F-16 விமானங்கள் உக்ரைன் வான்பாதுகாப்பில் முக்கியப் பங்காற்றி வருகின்றன.

ரஷ்யா தற்போது ஒரு பிரம்மாண்டமான ஆளில்லா விமானப் படையை (Unmanned Systems Forces) உருவாக்கியுள்ளது. இந்தப் படையில் மட்டும் சுமார் 87,000 வீரர்கள் பணியாற்றுவதாகத் தகவல்கள் தெரிவிக்கின்றன. இது ஒட்டுமொத்த பிரிட்டிஷ் ராணுவத்தின் எண்ணிக்கையை (70,000 வீரர்கள்) விட அதிகம் என்பது குறிப்பிடத்தக்கது. ரஷ்யாவின் இந்த அசுர வளர்ச்சி, சர்வதேச அளவில் பாதுகாப்புத் துறையில் பெரும் கவலையை ஏற்படுத்தியுள்ளது.

ரஷ்யா தனது ட்ரோன் படையின்கீழ் ஏற்கனவே ஏழு ரெஜிமென்ட்டுகள், 25 பட்டாலியன்கள் மற்றும் மூன்று படைப்பிரிவுகளை உருவாக்கிவிட்டதாக அமெரிக்காவின் போர் ஆய்வு நிறுவனம் (ISW) தெரிவித்துள்ளது. நவீன போர் முறையில் ஆளில்லா விமானங்களின் ஆதிக்கம் அதிகரித்து வருவதையே ரஷ்யாவின் இந்த நடவடிக்கை காட்டுகிறது. இருப்பினும், உக்ரைன் தரப்பிலிருந்து நடத்தப்படும் இத்தகைய எதிர்த்தாக்குதல்கள் ரஷ்யாவிற்குப் பெரும் பின்னடைவை ஏற்படுத்தி வருகின்றன.