ஜெப்ரி எப்ஸ்டீன் மீது சுமத்தப்பட்ட பாலியல் கடத்தல் மற்றும் முறைகேடுகள் தொடர்பான 30 லட்சம் பக்கங்கள் கொண்ட ரகசிய ஆவணங்கள் பிப்ரவரி 2026-ல் வெளியிடப்பட்டன. இந்த ஆவணங்களில் எப்ஸ்டீனின் உதவியாளர்கள், அவருடன் தொடர்பில் இருந்த பிரபலங்கள் மற்றும் பாதிக்கப்பட்டவர்களின் பெயர்கள் இடம்பெற்றுள்ளன. இதில் ஒரு இந்தியப் பெண்ணின் பெயர் 'பாதிக்கப்பட்டவர்' (Victim) என்ற பட்டியலில் இடம்பெற்றிருப்பதாக தெரிவிக்கிறது. இந்தப் பெண் எப்ஸ்டீனின் சொகுசுத் தீவான லிட்டில் செயின்ட் ஜேம்ஸிற்கு (Little St. James) அழைத்துச் செல்லப்பட்டிருக்கலாம் என்று கூறப்படுகிறது.

வெளியிடப்பட்டுள்ள ஆவணங்களின்படி, எப்ஸ்டீன் தனது பாலியல் வலைப்பின்னலை விரிவுபடுத்தப் பல்வேறு நாடுகளிலிருந்து பெண்களை வரவழைத்துள்ளார். இதில் இந்தியாவைச் சேர்ந்த ஒரு பெண் எப்ஸ்டீனின் கூட்டாளிகளால் ஏமாற்றி அழைத்து வரப்பட்டிருக்கலாம் என்ற கோணத்தில் அமெரிக்கப் புலனாய்வு அமைப்பான எப்.பி.ஐ (FBI) விசாரணை நடத்தியுள்ளது. இருப்பினும், பாதிக்கப்பட்டவர்களின் தனியுரிமை மற்றும் பாதுகாப்பு கருதி, அந்தப் பெண்ணின் முழு விவரங்களை வெளியிட நீதிமன்றம் தடை விதித்துள்ளது. தொழில்நுட்பக் கோளாறு காரணமாகச் சில பெயர்கள் தற்காலிகமாகத் தெரிந்தாலும், தற்போது அவை திருத்தப்பட்டுள்ளன.

இது ஒருபுறமிருக்க, எப்ஸ்டீன் ஆவணங்களில் இந்தியத் தொடர்புடைய சில பிரபலங்களின் பெயர்களும் முன்னதாகக் குறிப்பிடப்பட்டிருந்தன. இந்திய வம்சாவளி திரைப்பட இயக்குநர் மீரா நாயர் (Mira Nair) மற்றும் ஆன்மிக குரு தீபக் சோப்ரா (Deepak Chopra) ஆகியோரின் பெயர்கள் ஆவணங்களில் இடம்பெற்றுள்ளன. ஆனால், இவர்கள் குற்றவாளிகளாகவோ அல்லது பாதிக்கப்பட்டவர்களாகவோ குறிப்பிடப்படவில்லை; மாறாக எப்ஸ்டீனுடன் மின்னஞ்சல் தொடர்பு அல்லது சாதாரணச் சந்திப்புகள் நிகழ்ந்ததன் அடிப்படையில் அவர்கள் பெயர்கள் ஆவணங்களில் இடம்பெற்றுள்ளதாகத் தெளிவுபடுத்தப்பட்டுள்ளது.

ஜெப்ரி எப்ஸ்டீன் 2019-ம் ஆண்டு சிறையில் தற்கொலை செய்துகொண்ட போதிலும், அவர் தொடர்பான ரகசியங்கள் இப்போதும் உலக நாடுகளை உலுக்கி வருகின்றன. இந்த ஆவணங்களில் அமெரிக்க முன்னாள் அதிபர்கள், அரச குடும்பத்தினர் மற்றும் உலகப் பெரும் பணக்காரர்களின் பெயர்களும் இடம்பெற்றுள்ளன. தற்போது ஒரு இந்தியப் பெண்ணின் பெயர் இதில் சிக்கியிருப்பது, எப்ஸ்டீனின் பாலியல் சுரண்டல் ஆசிய நாடுகளிலும் ஊடுருவி இருந்ததை உறுதிப்படுத்துவதாக மனித உரிமை ஆர்வலர்கள் கவலை தெரிவித்துள்ளனர்.