கொழும்பு, அக்குரெகொட (Akuregoda) பகுதியில் உள்ள ஒரு பல்பொருள் அங்காடிக்கு அருகே இன்று (பிப்ரவரி 13, 2026) மாலை ஒரு வழக்கறிஞரும் அவரது மனைவியும் மர்ம நபர்களால் சுட்டுக்கொல்லப்பட்டனர். உயிரிழந்தவர் பாதாள உலகக் குழுவின் முக்கிய புள்ளியான "கரந்தெனிய சுத்த" (Karandeniya Sudda) என்பவருக்காக நீதிமன்றங்களில் ஆஜராகி வந்த வழக்கறிஞர் மல்லவாரச்சி (Mallawarachchi) என அடையாளம் காணப்பட்டுள்ளார். பித்திகல பகுதியைச் சேர்ந்த இவர்கள், தங்கள் காரில் அமர்ந்திருந்தபோது மற்றொரு காரில் வந்த இனந்தெரியாத இரு ஆயுததாரிகள் சரமாரியாகத் துப்பாக்கியால் சுட்டுவிட்டுத் தப்பிச் சென்றனர்.

முதற்கட்ட விசாரணைகளின்படி, இந்தப் படுகொலைக்குப் பின்னால் "கரந்தெனிய சுத்த" இருக்கலாம் எனப் காவல்துறை பலத்த சந்தேகம் கொள்கிறது. தனது ரகசியங்களையும் தகவல்களையும் வழக்கறிஞர் மல்லவாரச்சி, எதிரிக் குழுவான "லோகு பட்டி" (Loku Patty) தலைமையிலான கும்பலுக்குக் கசியவிட்டதாகச் சுத்த சந்தேகித்ததே இந்தப் படுகொலைக்குக் காரணமாகக் கூறப்படுகிறது. தனது சொந்த வழக்கறிஞரே தனக்கு எதிராகச் செயல்படுகிறார் என்ற சந்தேகத்தில், பாதாள உலகத் தலைவன் சிறையிலிருந்தோ அல்லது மறைவிடத்திலிருந்தோ இந்தக் கொலைக்கான உத்தரவைப் பிறப்பித்திருக்கலாம் என அஞ்சப்படுகிறது.

இலங்கையின் தெற்குப் பகுதி மற்றும் கொழும்புப் பகுதிகளில் அண்மைக்காலமாக பாதாள உலகக் குழுக்களுக்கிடையிலான மோதல்கள் தீவிரமடைந்துள்ளன. கடந்த சில வாரங்களில் "கரந்தெனிய சுத்த" என்பவரின் உறவினர்கள் மற்றும் நெருங்கிய கூட்டாளிகள் இலக்கு வைக்கப்பட்டுப் படுகொலை செய்யப்பட்டனர். அதன் தொடர்ச்சியாக இப்போது அவரது வழக்கறிஞரே கொல்லப்பட்டிருப்பது, இந்த மோதல் வழக்கறிஞர்கள் மற்றும் சட்ட வல்லுநர்களையும் குறிவைக்கும் அளவிற்குத் தரம் தாழ்ந்துள்ளதைக் காட்டுகிறது.

சம்பவம் நடந்த இடத்தில் இருந்து சிசிடிவி (CCTV) காட்சிகளைச் சேகரித்துள்ள போலீசார், கொலையாளிகள் தப்பிச் சென்ற வாகனத்தை அடையளம் காணும் முயற்சியில் ஈடுபட்டுள்ளனர். அக்குரெகொட மற்றும் அதனைச் சுற்றியுள்ள பகுதிகளில் பலத்த பாதுகாப்பு போடப்பட்டுள்ளது. இந்த இரட்டைப் படுகொலை தொடர்பாக விசாரணைகளை மேற்கொள்ள நான்கு சிறப்புப் புலனாய்வுக் குழுக்கள் நியமிக்கப்பட்டுள்ளதாக மேல் மாகாண காவல்துறை தலைமையகம் தெரிவித்துள்ளது.