சென்னை பசுமை வழிச்சாலையில் உள்ள அதிமுக பொதுச்செயலாளர் எடப்பாடி பழனிசாமியின் இல்லத்தில் பிப்ரவரி 16, 2026 அன்று மாலை இந்தச் சந்திப்பு நடைபெற்றது. மத்திய இணை அமைச்சர் எல். முருகன் மற்றும் தமிழக பாஜக தலைவர் நயினார் நாகேந்திரன் ஆகியோர் எடப்பாடி பழனிசாமியைச் சந்தித்து சுமார் ஒரு மணி நேரம் தீவிர ஆலோசனையில் ஈடுபட்டனர். வரவிருக்கும் சட்டமன்றத் தேர்தலில் தேசிய ஜனநாயகக் கூட்டணியின் (NDA) பலத்தை அதிகரிப்பது மற்றும் தேர்தல் பணிகளை ஒருங்கிணைப்பது குறித்து இந்தச் சந்திப்பில் விவாதிக்கப்பட்டதாகத் தெரிகிறது.

மார்ச் 1-ம் தேதி பிரதமர் நரேந்திர மோடி மதுரைக்கு வருகை தர உள்ள நிலையில், அந்தப் பொதுக்கூட்டத்தில் கூட்டணியில் உள்ள அனைத்துத் தலைவர்களையும் பங்கேற்கச் செய்வது மற்றும் புதிய கட்சிகளை இணைப்பது குறித்து விரிவாக ஆலோசிக்கப்பட்டுள்ளது. மேலும், சட்டமன்ற பட்ஜெட் கூட்டத்தொடரில் மக்கள் நலப் பிரச்சினைகளில் அதிமுக மற்றும் பாஜக இணைந்து செயல்படுவது குறித்தும், ஆளுங்கட்சிக்கு எதிராகக் கூட்டாகப் போராட்டங்களை முன்னெடுப்பது குறித்தும் பேசப்பட்டதாகத் தகவல்கள் வெளியாகியுள்ளன. தொகுதிப் பங்கீடு தொடர்பான முதற்கட்ட பேச்சுவார்த்தைகளும் இதில் தொடங்கப்பட்டுள்ளதாகக் கூறப்படுகிறது.

சந்திப்பிற்குப் பின் செய்தியாளர்களிடம் பேசிய நயினார் நாகேந்திரன், "இது ஒரு மரியாதை நிமித்தமான சந்திப்பு மட்டுமே" என்று கூறித் தவிர்த்தார். எனினும், தேர்தல் தேதி அறிவிக்கப்படுவதற்கு முன்பாகவே தொகுதிப் பங்கீட்டை நிறைவு செய்ய பாஜக விரும்புவதால், இந்தத் திடீர் சந்திப்பு முக்கியத்துவம் பெறுகிறது. விஜய்யின் தமிழக வெற்றிக் கழகத்தின் வருகையினால் வாக்கு வங்கியில் ஏற்படக்கூடிய மாற்றங்களை எதிர்கொள்ளவும், வலுவான கூட்டணியை அமைக்கவும் இரு கட்சிகளும் திட்டமிட்டு வருகின்றன.

இந்தச் சந்திப்பின் போது, நடிகர் விஜய்யை விமர்சிக்க நடிகை திரிஷாவின் பெயரை நயினார் நாகேந்திரன் பயன்படுத்திய விவகாரம் குறித்தும், அதற்குத் திரிஷா தரப்பிலிருந்து வந்த கண்டனங்கள் குறித்தும் எடப்பாடி பழனிசாமியிடம் நயினார் நாகேந்திரன் விளக்கமளித்ததாகச் சொல்லப்படுகிறது. தமிழக அரசியலில் அடுத்தடுத்த நகர்வுகள் மிக வேகமாக நடைபெற்று வரும் சூழலில், அதிமுக - பாஜக தலைவர்களின் இந்தச் சந்திப்பு எதிர்க்கட்சிகள் மத்தியிலும் உன்னிப்பாகக் கவனிக்கப்பட்டு வருகிறது.