ரஷ்ய எதிர்க்கட்சித் தலைவர் அலெக்ஸி நவால்னி (Alexei Navalny), விஷத் தவளையிலிருந்து எடுக்கப்பட்ட ஒரு வகை உயிரி நச்சைப் (Dart Frog Toxin) பயன்படுத்தி ரஷ்யாவால் கொல்லப்பட்டதாகப் பிரிட்டன் மற்றும் அதன் நட்பு நாடுகள் குற்றம் சாட்டியுள்ளன. இது குறித்த புலனாய்வுத் தகவல்களைப் பிரிட்டன் அரசு அதிகாரப்பூர்வமாக வெளியிட்டுள்ளது.

2024-ஆம் ஆண்டு பிப்ரவரி மாதம் ரஷ்யச் சிறையில் நவால்னி மர்மமான முறையில் உயிரிழந்தார். அப்போது அவர் மாரடைப்பால் இறந்ததாக ரஷ்யா கூறியது. ஆனால், பிரிட்டனின் புதிய ஆய்வின்படி, அவரது உடலில் விஷத் தவளையின் நச்சு இருந்ததற்கான ஆதாரங்கள் கிடைத்துள்ளதாகக் கூறப்படுகிறது.

நவால்னியின் மரணம் ஒரு இயற்கையான மரணம் அல்ல; அது கிரெம்ளின் (ரஷ்ய அரசு) திட்டமிட்டு நடத்திய படுகொலை என்று பிரிட்டன் வெளியுறவுத்துறை தெரிவித்துள்ளது. குறிப்பாக, ரஷ்யாவின் உளவு அமைப்புகள் இந்த விசித்திரமான நச்சைப் பயன்படுத்தியிருக்கலாம் எனச் சந்தேகிக்கப்படுகிறது.பிரிட்டனின் இந்தக் கண்டுபிடிப்பிற்குப் பிரான்ஸ், ஜெர்மனி உள்ளிட்ட மற்ற ஐந்து ஐரோப்பிய நாடுகளும் ஆதரவு தெரிவித்துள்ளன. நவால்னிக்கு இழைக்கப்பட்ட அநீதிக்கு ரஷ்யா சர்வதேச அரங்கில் பதில் சொல்ல வேண்டும் என்று அவை வலியுறுத்தியுள்ளன.

வழக்கம் போல ரஷ்யா இந்தக் குற்றச்சாட்டுகளை முற்றிலும் நிராகரித்துள்ளது. இது ரஷ்யாவின் பிம்பத்தைச் சிதைக்கப் பிரிட்டன் மற்றும் மேற்கத்திய நாடுகள் நடத்தும் "பொய்ப் பிரச்சாரம்" என்று கிரெம்ளின் சாடியுள்ளது.

நவால்னியின் இரண்டாம் ஆண்டு நினைவு தினம் நெருங்கும் வேளையில் வெளியாகியுள்ள இந்தத் தகவல், சர்வதேச அரசியலில் பெரும் பரபரப்பை ஏற்படுத்தியுள்ளது.