லண்டனின் ப்ரெண்ட் (Brent) பகுதியில் உள்ள 'கிங்ஸ்பரி ஹை ஸ்கூல்' (Kingsbury High School) வளாகத்தில், செவ்வாய்க்கிழமை  (பிப்ரவரி 10, 2026) அன்று மதிய வேளையில் இந்த அதிர்ச்சியூட்டும் சம்பவம் நடந்துள்ளது. பள்ளியின் மதில் சுவரைத் தாண்டி உள்ளே குதித்த 13 வயது சிறுவன் ஒருவன், அங்கிருந்த 12 மற்றும் 13 வயதுடைய இரு மாணவர்களைக் கத்தியால் சரமாரியாகக் குத்தியுள்ளான். படுகாயமடைந்த மாணவர்கள் இருவரும் தற்போது மருத்துவமனையில் உயிருடன் போராடி வருகின்றனர். தாக்குதல் நடத்திய சிறுவன் சம்பவ இடத்திலிருந்து தப்பிச் சென்ற நிலையில், சில மணி நேரத் தீவிரத் தேடுதல் வேட்டைக்குப் பிறகு போலீசாரால் கைது செய்யப்பட்டான்.

இந்தத் தாக்குதலின்போது அந்தச் சிறுவன் "அல்லாஹு அக்பர்" என்று உரக்கக் கூச்சலிட்டதாகச் சம்பவத்தை நேரில் பார்த்த சாட்சிகள் தெரிவித்துள்ளனர். இதன் காரணமாக, வழக்கைத் தீவிரமாகக் கருதிய லண்டன் பெருநகர போலீஸ் (Met Police), விசாரணையை உடனடியாக பயங்கரவாத எதிர்ப்புப் பிரிவிடம் (Counter-Terrorism Command) ஒப்படைத்துள்ளது. இருப்பினும், தற்போது வரை இது ஒரு 'பயங்கரவாதத் தாக்குதல்' என்று அதிகாரப்பூர்வமாக அறிவிக்கப்படவில்லை. தாக்குதலுக்கான பின்னணி மற்றும் அந்தச் சிறுவனின் நோக்கம் குறித்துப் பயங்கரவாதத் தடுப்புப் பிரிவு அதிகாரிகள் தீவிரமாக ஆராய்ந்து வருகின்றனர்.

இந்தக் கொடூரச் சம்பவத்தால் லண்டன் முழுவதும் பெரும் பதற்றம் நிலவுகிறது. "பள்ளி என்பது குழந்தைகள் பாதுகாப்பாக இருக்க வேண்டிய இடம், அங்கே இத்தகைய வன்முறை நிகழ்ந்திருப்பது நெஞ்சை உலுக்குகிறது" என்று பிரிட்டன் கல்விச் செயலாளர் பிரிட்ஜெட் பிலிப்சன் கவலை தெரிவித்துள்ளார். தாக்குதலுக்குப் பயன்படுத்தப்பட்ட ஆயுதம் மீட்கப்பட்டுள்ளதாகவும், கைதான சிறுவனிடம் தொடர்ந்து விசாரணை நடைபெற்று வருவதாகவும் டிடெக்டிவ் சீஃப் சூப்பரின்டென்டென்ட் லூக் வில்லியம்ஸ் தெரிவித்துள்ளார். இச்சம்பவத்தைத் தொடர்ந்து அந்தப் பள்ளி தற்காலிகமாக மூடப்பட்டுள்ளது