CPJ-ன் 'நாங்கள் நரகத்திலிருந்து திரும்பினோம்' (We returned from hell) என்ற அந்த அறிக்கையில், சிறையில் இருந்த செய்தியாளர்கள் கடுமையாகத் தாக்கப்பட்டதாகவும், பட்டினி போடப்பட்டதாகவும் குறிப்பிடப்பட்டுள்ளது. குறிப்பாக, இரண்டு செய்தியாளர்கள் தாங்கள் பாலியல் வன்கொடுமைக்கு (Rape) உள்ளாக்கப்பட்டதாகத் தெரிவித்துள்ளனர். மேலும், பல செய்தியாளர்கள் அச்சுறுத்தல்கள், நிர்வாணப்படுத்தி அவமானப்படுத்துதல் மற்றும் கடுமையான உடல் ரீதியான வன்முறைகளை எதிர்கொண்டதாகத் சாட்சியமளித்துள்ளனர்.

சிறையிலிருந்து விடுவிக்கப்பட்ட ஊடகவியலாளர்களின் புகைப்படங்களை ஆய்வு செய்தபோது, அவர்கள் சராசரியாக 23.5 கிலோ எடையை இழந்திருப்பது உறுதி செய்யப்பட்டுள்ளது. பலரது உடலில் எலும்புகள் துருத்திக் கொண்டிருக்கும் அளவுக்கு அவர்கள் ஊட்டச்சத்துக் குறைபாட்டால் பாதிக்கப்பட்டுள்ளனர். காயங்களுக்குச் சிகிச்சை அளிக்கப்படாமல் 'மருத்துவ அலட்சியம்' (Medical Neglect) காட்டப்பட்டதாகவும், காயம் அடைந்த கால்களில் புழுக்கள் நெளிந்த கொடுமைகள் நடந்ததாகவும் சாட்சியங்கள் கூறுகின்றன.

கைது செய்யப்பட்ட 94 ஊடகவியலாளர்களில் 80 சதவீதத்திற்கும் அதிகமானோர் எவ்விதக் குற்றச்சாட்டுகளும் இன்றி 'நிர்வாகக் காவலில்' (Administrative detention) வைக்கப்பட்டிருந்தனர். இவர்கள் வழக்கறிஞர்களைத் தொடர்பு கொள்ளவும் அனுமதிக்கப்படவில்லை. இந்தச் சித்திரவதைகள் தனிப்பட்ட சம்பவங்கள் அல்ல, மாறாக செய்தியாளர்களை அச்சுறுத்தி அவர்களின் குரலை ஒடுக்க இஸ்ரேலிய அரசு மேற்கொண்ட திட்டமிட்ட நடவடிக்கை என CPJ குற்றம் சாட்டியுள்ளது.