அமெரிக்க நீதித்துறை பிப்ரவரி 2026-ல் வெளியிட்ட இந்த ஆவணங்களில், எப்ஸ்டீன் 2008-ம் ஆண்டு பாலியல் குற்றவாளியாக அறிவிக்கப்பட்ட பின்னரும், பல செல்வாக்கு மிக்க நபர்கள் அவருடன் நெருங்கிய தொடர்பில் இருந்தது அம்பலமாகியுள்ளது. குறிப்பாக, ஐரோப்பிய நாடுகளில் இந்த விவகாரம் பெரும் அரசியல் மாற்றங்களை ஏற்படுத்தியுள்ளது. நார்வே நாட்டின் முன்னாள் பிரதமர் தோர்ப்ஜோர்ன் ஜாக்லாண்ட் (Thorbjørn Jagland), எப்ஸ்டீனின் இல்லங்களில் தங்கியது மற்றும் அவருடன் நிதித் தொடர்புகள் வைத்திருந்ததாக எழுந்த புகாரைத் தொடர்ந்து, அவர் மீது 'ஊழல் வழக்கு' பதிவு செய்யப்பட்டுள்ளது. அதேபோல், நார்வே தூதர் மோனா ஜூல், எப்ஸ்டீன் தனது உயிலில் தனது குழந்தைகளுக்கு 10 மில்லியன் டாலர் தொகையை ஒதுக்கியது தெரிந்ததும் தனது பதவியை ராஜினாமா செய்துள்ளார்.

பிரிட்டனில், தொழிலாளர் கட்சியின் முக்கியத் தலைவரும், அமெரிக்காவிற்கான பிரிட்டன் தூதருமான பீட்டர் மண்டெல்சன் (Peter Mandelson) தனது பதவியிலிருந்து நீக்கப்பட்டுள்ளார். எப்ஸ்டீனிடம் இருந்து பணப் பலன்களைப் பெற்றது மற்றும் அரசாங்க ரகசியங்களைப் பகிர்ந்ததாக அவர் மீது குற்றச்சாட்டுகள் எழுந்துள்ளன. மேலும், பிரிட்டன் முன்னாள் இளவரசர் ஆண்ட்ரூ (Prince Andrew), எப்ஸ்டீனுடன் பக்கிங்ஹாம் அரண்மனையில் விருந்து நடத்தியது தொடர்பான மின்னஞ்சல்கள் வெளியாகி அவரது நற்பெயருக்கு மேலும் களங்கத்தை ஏற்படுத்தியுள்ளது. கிங் சார்லஸ் இந்த விவகாரத்தில் விசாரணைக்கு முழு ஒத்துழைப்பு வழங்கத் தயாராக இருப்பதாகத் தெரிவித்துள்ளார்.

ஹாலிவுட் மற்றும் வர்த்தகத் துறையிலும் இதன் தாக்கம் பலமாக உள்ளது. பிரபல ஏஜென்சி ஒன்றின் சிஇஓ கேசி வாஸர்மேன் (Casey Wasserman), எப்ஸ்டீனின் கூட்டாளி கிஸ்லெயின் மேக்ஸ்வெல்லுடன் தொடர்பு வைத்திருந்தது வெளிச்சத்திற்கு வந்ததைத் தொடர்ந்து, அவர் தனது நிறுவனத்தை விற்கப்போவதாக அறிவித்துள்ளார். இதேபோல், கோல்ட்மேன் சாக்ஸ் (Goldman Sachs) நிறுவனத்தின் முன்னாள் சட்ட அதிகாரி கேத்தி ரூம்லர் மற்றும் பால் வெயிஸ் நிறுவனத்தின் தலைவர் பிராட் கார்ப் ஆகியோரும் எப்ஸ்டீனுடன் சட்ட ரீதியான ஆலோசனைகள் மற்றும் தனிப்பட்ட உதவிகளைப் பரிமாறிக்கொண்ட மின்னஞ்சல்கள் வெளியானதால் தங்கள் பதவிகளிலிருந்து விலகியுள்ளனர்.

அமெரிக்காவைப் பொறுத்தவரை, அதிபர் டொனால்ட் டிரம்ப் மற்றும் முன்னாள் அதிபர் பில் கிளிண்டன் ஆகியோரின் பெயர்கள் ஆவணங்களில் ஆயிரக்கணக்கான முறை குறிப்பிடப்பட்டுள்ளன. கிளிண்டன் தம்பதியினர் இது தொடர்பாக நாடாளுமன்றக் குழு முன் சாட்சியமளிக்க ஒப்புக்கொண்டுள்ளனர். ஆவணங்கள் வெளியானபோது, பாதிக்கப்பட்ட பெண்களின் பெயர்கள் மற்றும் புகைப்படங்கள் சரியாக மறைக்கப்படாமல் (Redaction failure) கசிந்தது பெரும் மனித உரிமை மீறலாகப் பார்க்கப்படுகிறது. இந்த ஆவணங்கள் இன்னும் முழுமையாக ஆய்வு செய்யப்படாத நிலையில், வரும் நாட்களில் மேலும் பல அதிர்ச்சியூட்டும் உண்மைகள் வெளியாகக்கூடும் என்று எதிர்பார்க்கப்படுகிறது.