அமெரிக்கப் புலனாய்வு அமைப்பான எப்.பி.ஐ (FBI) மற்றும் நீதித்துறை (DOJ) பிப்ரவரி 2026-ல் வெளியிட்ட 30 லட்சம் பக்கங்கள் கொண்ட 'எப்ஸ்டீன் கோப்புகளில்' (Epstein Files) இந்த அதிர்ச்சித் தகவல்கள் இடம்பெற்றுள்ளன. 2019-ம் ஆண்டு ஜூன் மாதம் ஸ்டீவ் பானன் மற்றும் ஜெப்ரி எப்ஸ்டீன் இடையே பரிமாறிக்கொள்ளப்பட்ட குறுஞ்செய்திகளில், வத்திக்கான் மற்றும் போப் பிரான்சிஸை பலவீனப்படுத்துவது குறித்து விவாதிக்கப்பட்டுள்ளது. "போப் பிரான்சிஸை வீழ்த்துவோம்" (Will take down Francis) என்று பானன் ஒரு செய்தியில் குறிப்பிட்டுள்ளார். வத்திக்கானின் ரகசியங்களை அம்பலப்படுத்தும் ஆவணப்படம் ஒன்றைத் தயாரிக்க இவர்கள் திட்டமிட்டதும் இதன் மூலம் தெரியவந்துள்ளது.

ஸ்டீவ் பானன் தீவிர வலதுசாரி மற்றும் தேசியவாதக் கொள்கைகளைக் கொண்டவர். போப் பிரான்சிஸ் முன்னெடுத்து வரும் அகதிகள் ஆதரவு, காலநிலை மாற்றம் குறித்த கவலைகள் மற்றும் எல்ஜிபிடிகியூ (LGBTQ) சமூகத்தினருக்கான வெளிப்படையான அணுகுமுறை போன்றவை பானனின் சித்தாந்தத்திற்கு எதிராக இருந்தன. இதனால்தான், வத்திக்கானில் உள்ள ஊழல்கள் மற்றும் ஓரினச்சேர்க்கை தொடர்பான சர்ச்சைகளை மையமாக வைத்து எழுதப்பட்ட 'இன் தி கிளோசெட் ஆஃப் தி வத்திக்கான்' (In the Closet of the Vatican) என்ற புத்தகத்தை அடிப்படையாகக் கொண்டு படம் எடுத்து, போப்பைச் சிக்க வைக்க பானன் முயன்றுள்ளார். இந்தப் படத்திற்கு எப்ஸ்டீனை நிர்வாகத் தயாரிப்பாளராக இருக்குமாறு அவர் கேட்டுக்கொண்டுள்ளார்.

இந்த ஆவணங்கள் குறித்துக் கருத்துத் தெரிவித்துள்ள போப் பிரான்சிஸின் வாழ்க்கை வரலாற்று ஆசிரியர் ஆஸ்டின் ஐவெரி, "இது திருச்சபையைத் தூய்மைப்படுத்துவதாகக் கூறிக்கொண்டு, ஆன்மீக அதிகாரத்தை அரசியல் லாபத்திற்காகப் பயன்படுத்த பானன் மேற்கொண்ட முயற்சி" என்று விமர்சித்துள்ளார். மேலும், எப்ஸ்டீன் தனது மின்னஞ்சல்களில் போப் மற்றும் வத்திக்கான் நிதி நிர்வாகம் குறித்து மிகவும் அவதூறான கருத்துகளைப் பகிர்ந்துள்ளார். 2015-ம் ஆண்டு போப் அமெரிக்கா வந்திருந்தபோது, அவரைத் தனது வீட்டிற்கு வருமாறு அழைக்கப்போவதாகக் கூறி எப்ஸ்டீன் கிண்டல் செய்துள்ளதும் ஆவணங்களில் வெளிப்பட்டுள்ளது.

வத்திக்கானின் நிதி வெளிப்படைத்தன்மைக்காகப் போப் பிரான்சிஸ் மேற்கொண்ட சீர்திருத்தங்கள் மற்றும் ஆயிரக்கணக்கான சந்தேகத்திற்குரிய வங்கிக் கணக்குகளை அவர் முடக்கியது போன்றவை எப்ஸ்டீன் போன்றவர்களுக்கு எரிச்சலை ஏற்படுத்தியிருக்கலாம் எனச் சந்தேகிக்கப்படுகிறது. ஏற்கனவே பாலியல் குற்றச்சாட்டுகளில் சிக்கி 2019-ல் உயிரிழந்த எப்ஸ்டீனுடன் பானன் போன்ற உயர்மட்ட அரசியல்வாதிகள் இவ்வளவு நெருக்கமான மற்றும் ஆபத்தான தொடர்பில் இருந்தது கத்தோலிக்கத் திருச்சபை மற்றும் அமெரிக்க அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.