கனடாவில் இரத்த ஆறு: பள்ளிக்குள் நுழைந்து மாணவ-மாணவிகள் மீது பெண் துப்பாக்கிச்சூடு - 10 பேர் பலியான கோரச் சம்பவம்!

கனடாவின் பிரிட்டிஷ் கொலம்பியா மாகாணத்தில் உள்ள டம்பிளர் ரிட்ஜ் (Tumbler Ridge) என்ற அமைதியான மலைப்பகுதி நகரம், நேற்று மதியம் ஒரு கோரமான துப்பாக்கிச்சூடு சம்பவத்தால் நிலைகுலைந்து போனது. அங்குள்ள டம்பிளர் ரிட்ஜ் மேல்நிலைப் பள்ளியில் (Tumbler Ridge Secondary School) மர்ம நபர் ஒருவர் புகுந்து நடத்திய வெறிச்செயலில், 9 அப்பாவி உயிர்கள் பறிபோயின. தாக்குதல் நடத்திய பெண்ணும் தன்னைத்தானே சுட்டு தற்கொலை செய்து கொண்டதாகத் தெரிவிக்கப்பட்டுள்ளது. இந்தச் சம்பவம் கனடா வரலாற்றின் மிக மோசமான பள்ளித் தாக்குதல்களில் ஒன்றாகப் பதிவாகியுள்ளது.

பிப்ரவரி 10, 2026 அன்று மதியம் சுமார் 1:20 மணியளவில், பள்ளியின் வளாகத்திற்குள் துப்பாக்கி ஏந்திய பெண் ஒருவர் நுழைந்துள்ளார். அவர் கண்ணில் பட்டவர்களையெல்லாம் நோக்கி சரமாரியாகச் சுடத் தொடங்கியதால், வகுப்பறையில் இருந்த 175-க்கும் மேற்பட்ட மாணவர்கள் மற்றும் ஆசிரியர்கள் அலறியடித்து ஓடினர். உயிருக்கு பயந்த மாணவர்கள் வகுப்பறை கதவுகளை மேஜைகளைக் கொண்டு தடுத்து (Barricade) உள்ளேயே முடங்கினர். தகவலறிந்த ராயல் கனடியன் மவுண்டட் போலீஸார் (RCMP) இரண்டு நிமிடங்களில் சம்பவ இடத்திற்கு விரைந்து வந்து மீட்புப் பணிகளை மேற்கொண்டனர்.

இந்தத் தாக்குதலில் பள்ளி வளாகத்திற்குள் ஆறு பேரும், ஒரு குடியிருப்புப் பகுதியில் இருவரும் என மொத்தம் 9 பேர் உயிரிழந்துள்ளனர். மேலும் ஒருவர் மருத்துவமனைக்குச் செல்லும் வழியில் உயிரிழந்ததாகத் தகவல் வெளியாகியுள்ளது. இவர்களில் மாணவர்கள் மற்றும் ஊழியர்கள் அடங்குவர். மேலும் 25-க்கும் மேற்பட்டோர் படுகாயமடைந்துள்ளனர், அவர்களில் இருவரின் நிலைமை கவலைக்கிடமாக உள்ளது. தாக்குதல் நடத்திய நபர் பழுப்பு நிற முடி கொண்ட, ஆடை அணிந்த ஒரு பெண் என காவல்துறையினரின் அவசர எச்சரிக்கை செய்தியில் குறிப்பிடப்பட்டிருந்தது.

இந்தத் துயரச் சம்பவத்தால் கனடா பிரதமர் மார்க் கார்னி தனது ஐரோப்பியப் பயணத்தை ரத்து செய்துள்ளார். "டம்பிளர் ரிட்ஜ் பகுதியில் நடந்த இந்தத் துயரம் என் இதயத்தை நொறுக்குகிறது. உயிரிழந்தவர்களின் குடும்பங்களுக்கு எனது ஆழ்ந்த இரங்கலைத் தெரிவித்துக் கொள்கிறேன்," என்று அவர் உருக்கமாகப் பதிவிட்டுள்ளார். பிரிட்டிஷ் கொலம்பியா மாகாண முதல்வர் டேவிட் எபி, இது "கற்பனை செய்ய முடியாத ஒரு பேரதிர்ச்சி" என்று வர்ணித்துள்ளார். இந்தப் பகுதி முழுவதும் தற்போது பலத்த பாதுகாப்பு வளையத்திற்குள் கொண்டு வரப்பட்டுள்ளது.

தாக்குதலுக்கான காரணம் என்ன? அந்தப் பெண் ஏன் பள்ளிக்குள் புகுந்து துப்பாக்கிச்சூடு நடத்தினார்? என்பது குறித்து இன்னும் மர்மம் நீடிக்கிறது. அந்தப் பெண் யாரையும் குறிவைத்துத் தாக்கினாரா அல்லது இது ஒரு திட்டமிட்ட பயங்கரவாதச் செயலா என்ற கோணத்தில் ராயல் கனடியன் மவுண்டட் போலீஸார் தீவிர விசாரணை நடத்தி வருகின்றனர். பள்ளிக்கு அருகிலுள்ள வீட்டில் கண்டெடுக்கப்பட்ட இரண்டு உடல்களுக்கும் இந்தச் சம்பவத்திற்கும் உள்ள தொடர்பு குறித்தும் ஆய்வுகள் தொடர்கின்றன. துப்பாக்கிச் சட்டங்கள் கடுமையாக உள்ள கனடாவில் இத்தகைய சம்பவம் நடந்தது அந்நாட்டு மக்களைப் பெரும் அதிர்ச்சியில் ஆழ்த்தியுள்ளது.