உக்ரைனின் சதித்திட்டம் அம்பலம்: ரஷ்ய ராணுவ உயர் அதிகாரிகளைக் குறிவைத்து நடத்தப்பட்ட படுகொலை முயற்சி!

ரஷ்ய ராணுவப் புலனாய்வு அமைப்பான ஜிஆர்யு (GRU) பிரிவின் துணைத் தலைவர் ஜெனரல் விளாடிமிர் அலெக்ஸியேவ் மீதான கொலை முயற்சி தொடர்பாக, மூன்றாவது நபரைக் கைது செய்துள்ளதாக ரஷ்யாவின் ஃபெடரல் பாதுகாப்பு சேவை (FSB) அறிவித்துள்ளது. மாஸ்கோவில் உள்ள தனது அடுக்குமாடி குடியிருப்பின் தாழ்வாரத்தில் வைத்து அலெக்ஸியேவ் சுடப்பட்ட சம்பவம் ரஷ்யாவில் பெரும் பரபரப்பை ஏற்படுத்தியுள்ளது. இந்தச் சதியின் பின்னணியில் உக்ரைன் உளவுத்துறை இருப்பதாக ரஷ்யா குற்றம் சாட்டியுள்ளது.

இந்த வழக்கின் முக்கியக் குற்றவாளியாக 65 வயதான லியுபோமிர் கோர்பா அடையாளம் காணப்பட்டுள்ளார். ஐக்கிய அரபு அமீரகத்தில் வைத்து ரஷ்யாவின் கோரிக்கையின் பேரில் கைது செய்யப்பட்ட இவர், கடந்த வார இறுதியில் மாஸ்கோவிற்கு அழைத்து வரப்பட்டார். தற்போது கைதாகியுள்ள மூன்றாவது நபர், கோர்பாவின் கூட்டாளியான விக்டர் வாசினின் மகன் பாவெல் வாசின் எனத் தெரியவந்துள்ளது. இவர்களது குழு ரஷ்ய ராணுவ அமைச்சகத்தின் பல உயர்மட்ட அதிகாரிகளைக் கண்காணித்து வந்ததாக எஃப்எஸ்பி தெரிவித்துள்ளது.

கைது செய்யப்பட்ட பாவெல் வாசின் அளித்துள்ள வாக்குமூலம் அதிரடித் தகவல்களை வெளிப்படுத்தியுள்ளது. உக்ரைன் உளவுத்துறையின் (SBU) வழிகாட்டுதலின்படி, ஜெனரல் அலெக்ஸியேவ் தவிர மேலும் இரண்டு உயர்மட்ட ராணுவ அதிகாரிகளை இந்தக் கும்பல் ரகசியமாகக் கண்காணித்து வந்துள்ளது. அவர்கள் மீது பயங்கரவாதத் தாக்குதல்களை நடத்தவும், நாசவேலைகளில் ஈடுபடவும் திட்டமிடப்பட்டிருந்தது பாவெல் வாசின் அளித்த தகவல்கள் மூலம் உறுதி செய்யப்பட்டுள்ளது.

இந்தச் சதித் திட்டத்திற்காகப் பாவெல் வாசின் நவீனக் கண்காணிப்புக் கருவிகளையும், வாகனங்களையும் தனது தந்தை மற்றும் கோர்பாவிற்கு வழங்கியுள்ளார். மேலும், இலக்காகத் நிர்ணயிக்கப்பட்ட அதிகாரிகள் பற்றிய தரவுகளை இணையம் வாயிலாகச் சேகரிக்கவும் அவர் உதவியுள்ளார். தாக்குதலுக்குப் பயன்படுத்தப்பட்ட துப்பாக்கியை ஒரு மறைவிடத்திலிருந்து எடுத்துச் செல்லவும் இந்தக் குழு வாகனங்களைப் பயன்படுத்தியுள்ளது. இந்தக் கொலைக்காக உக்ரைன் தரப்பில் இருந்து 30,000 டாலர்கள் தருவதாகத் தமக்கு வாக்களிக்கப்பட்டதாகக் கோர்பா ஒப்புக்கொண்டுள்ளார்.

நான்கு முறை சுடப்பட்ட ஜெனரல் அலெக்ஸியேவ் தற்போது மருத்துவமனையில் சிகிச்சை பெற்று வருகிறார். அவரது உடல்நிலை சீராக இருப்பதாகவும், அவர் நினைவுடன் பேசி வருவதாகவும் மருத்துவ வட்டாரங்கள் தெரிவிக்கின்றன. உக்ரைன் அரசு அமைதிப் பேச்சுவார்த்தையைச் சீர்குலைப்பதற்காகவே இத்தகைய தாக்குதல்களை முன்னெடுப்பதாக ரஷ்ய வெளியுறவுத்துறை அமைச்சர் செர்ஜி லாவ்ரோவ் கடுமையாகச் சாடியுள்ளார்.

அபுதாபியில் உக்ரைன் போர் தொடர்பாக ரஷ்யா, உக்ரைன் மற்றும் அமெரிக்கா ஆகிய நாடுகளுக்கு இடையே முத்தரப்புப் பேச்சுவார்த்தை நடைபெற்று வரும் நிலையில் இத்தாக்குதல் நடத்தப்பட்டுள்ளது குறிப்பிடத்தக்கது. இந்தப் பேச்சுவார்த்தையில் ரஷ்யக் குழுவிற்குத் தலைமை தாங்கும் அட்மிரல் இகோர் கோஸ்ட்யுகோவின் கீழ் பணியாற்றுபவர் தான் அலெக்ஸியேவ் என்பது குறிப்பிடத்தக்கது. எனினும், இந்தத் தாக்குதலில் தங்களுக்கு எவ்விதப் பங்கும் இல்லை என்று உக்ரைன் திட்டவட்டமாக மறுத்துள்ளது.