அமெரிக்க நீதித்துறை சமீபத்தில் வெளியிட்ட மில்லியன் கணக்கான ஆவணங்களை ஆய்வு செய்ததில், 2014-ஆம் ஆண்டு எப்ஸ்டீன் தனது ஊழியர் ஒருவருடன் மேற்கொண்ட மின்னஞ்சல் பரிமாற்றம் கண்டறியப்பட்டுள்ளது. அதில், புளோரிடாவின் பாம் பீச் (Palm Beach) நகரில் உள்ள தனது இல்லத்தில் ரகசியக் கேமராக்களைப் பொருத்த எப்ஸ்டீன் உத்தரவிட்டுள்ளார். குறிப்பாக, "இயக்கத்தைக் கண்டறிந்து (Motion detected) பதிவு செய்யும் வசதி கொண்ட மூன்று ரகசியக் கேமராக்களைப் பொருத்தலாம்" என்று அவர் தனது உதவியாளருக்கு எழுதியுள்ளார்.

எப்ஸ்டீனின் உத்தரவிற்குப் பதிலளித்த அவரது உதவியாளர், "ஃபோர்ட் லாடர்டேலில் உள்ள ஸ்பை ஸ்டோரில் (Spy Store) இரண்டு கேமராக்களை ஏற்கனவே வாங்கிவிட்டேன். அவற்றைச் சார்ஜ் செய்துவிட்டு, எப்படிச் செயல்படுகிறது என்பதைச் சோதித்துக் கொண்டிருக்கிறேன். தற்போது அவற்றை திசுப் பெட்டிகளுக்குள் (Kleenex boxes) வைத்து மறைத்துப் பொருத்திக் கொண்டிருக்கிறேன்" என்று தெரிவித்துள்ளார். இந்த மின்னஞ்சல் ஆதாரங்கள், எப்ஸ்டீன் தனது இல்லத்திற்கு வந்த விஐபிகள் மற்றும் பாதிக்கப்பட்ட பெண்களை ரகசியமாகப் படம் பிடித்தார் என்ற நீண்டகாலச் சந்தேகத்தை உறுதிப்படுத்தியுள்ளன.

ஸ்கை நியூஸின் தரவு ஆய்வுக் குழுவினர் (Data & Forensics team), எப்ஸ்டீனின் புளோரிடா அலுவலகத்திலிருந்து மீட்கப்பட்ட ஆயிரக்கணக்கான வீடியோக் காட்சிகளையும் ஆய்வு செய்துள்ளனர். அதில், எப்ஸ்டீன் போன்ற தோற்றம் கொண்ட நபர் ஒரு அறையில் பெண்களுடன் பேசுவது மற்றும் ஒரு பெண் அவருக்கு அருகில் மண்டியிட்டுக் கிடப்பது போன்ற காட்சிகள் பதிவாகியுள்ளன. பாதிக்கப்பட்ட பெண்கள் ஏற்கனவே காவல்துறையிடம் அளித்த புகார்களில், தாங்கள் ரகசியமாகப் படம்பிடிக்கப்பட்டதாகப் பயந்ததாகக் குறிப்பிட்டிருந்தனர்; தற்போது அந்தப் பயம் உண்மையானது என்பது ஆதாரப்பூர்வமாகத் தெரியவந்துள்ளது.

இந்த விவகாரம் அமெரிக்க அரசியலிலும் பெரும் புயலைக் கிளப்பியுள்ளது. எப்ஸ்டீன் கோப்புகளை வெளியிடும் பொறுப்பில் உள்ள அமெரிக்க அட்டர்னி ஜெனரல் பாம் போண்டி (Pam Bondi), இந்த விவகாரம் குறித்து நாடாளுமன்றக் குழுவிடம் சாட்சியம் அளித்தார். அப்போது ஜனநாயகக் கட்சியினருக்கும் அவருக்கும் இடையே கடும் வாக்குவாதம் ஏற்பட்டது. பாதிக்கப்பட்ட பெண்களுக்கு இரக்கம் காட்டாமல், சில சக்திவாய்ந்த மனிதர்களைப் பாதுகாக்கும் நோக்கில் ஆவணங்களைத் தணிக்கை செய்து வெளியிடுவதாகப் போண்டி மீது குற்றம் சாட்டப்பட்டுள்ளது. எப்ஸ்டீன் ஒரு "அரக்கன்" என்று குறிப்பிட்ட போண்டி, ஆவணங்கள் வெளியீட்டில் ஏற்பட்ட தவறுகளுக்குத் தான் பொறுப்பல்ல என்று கூறியுள்ளார்.