பிரேசில் நாட்டின் ரியோ டி ஜெனிரோ (Rio de Janeiro) நகரில் ஆண்டுதோறும் நடைபெறும் கார்னிவல் திருவிழா, கோடிக்கணக்கான சுற்றுலாப் பயணிகளைக் கவரும் ஒரு பிரம்மாண்ட நிகழ்வாகும். இவ்வளவு பெரிய கூட்டத்தைப் பயன்படுத்தி செல்போன் பறிப்பு மற்றும் சிறு திருட்டுகளில் ஈடுபடும் கும்பல்களைக் கையாளுவது போலீஸாருக்குப் பெரும் சவாலாக இருந்தது. இதனை முறியடிக்க, ரியோ சிவில் போலீஸார் இந்த ஆண்டு ஒரு விசித்திரமான வியூகத்தை வகுத்தனர். போலீஸார் சாதாரண உடையில் இல்லாமல், திருவிழாக் கூட்டத்தோடு ஒன்றாகக் கலக்கும் வகையில் கேப்டன் அமெரிக்கா, பேட்மேன் மற்றும் ஹாரர் பட கதாபாத்திரமான ஜேசன் வூர்ஹீஸ் (Jason Voorhees) போன்ற முகமூடிகளை அணிந்து 'சூப்பர் ஹீரோ'களாக வலம் வந்தனர்.

இந்த மாறுவேட ஆபரேஷனின் போது, சாண்டா தெரசா (Santa Teresa) பகுதியில் டிரோன் (Drone) மூலம் கூட்டத்தைக் கண்காணித்த போது ஒரு பெண், சுற்றுலாப் பயணியிடம் இருந்து லாவகமாகச் செல்போனைப் பறித்து தனது கூட்டாளியிடம் கொடுப்பதைக் கண்டுபிடித்தனர். உடனே அங்கிருந்த மாறுவேட போலீஸார், தங்களை வெளிக்காட்டிக் கொள்ளாமல் அந்த ஜோடியை நெருங்கிச் சென்று கையும் களவுமாகப் பிடித்தனர். கைதான அந்தப் பெண், போலீஸாரிடம் இருந்து தப்பிக்கத் தான் கர்ப்பமாக இருப்பதாகக் கூறி நாடகமாடினார். ஆனால், அவர்கள் இருவர் மீதும் ஏற்கனவே 30-க்கும் மேற்பட்ட குற்ற வழக்குகள் இருப்பது விசாரணையில் தெரியவந்தது.

இந்த அதிரடி சோதனையில் திருடப்பட்ட 5 விலையுயர்ந்த செல்போன்கள் மீட்கப்பட்டன. இவை அனைத்தும் உரியவர்களிடம் ஒப்படைக்கப்படும் என்று போலீஸார் தெரிவித்தனர். இது பிரேசில் அரசாங்கம் முன்னெடுத்துள்ள 'ஆபரேஷன் டிராக்கிங்' (Operation Tracking) எனும் பெரிய திட்டத்தின் ஒரு பகுதியாகும். இந்தத் திட்டத்தின் மூலம் இதுவரை 13,000-க்கும் மேற்பட்ட திருடப்பட்ட செல்போன்கள் கண்டறியப்பட்டு, சுமார் 4,400 போன்கள் உரிமையாளர்களிடம் திரும்ப வழங்கப்பட்டுள்ளன. திருவிழாக் கூட்டத்தில் 'மணி ஹீஸ்ட்' (Money Heist) சீரியல் உடையில் வந்த போலீஸார் திருடர்களைக் கைது செய்து அழைத்துச் சென்ற வீடியோ இப்போது இணையத்தில் வைரலாகி வருகிறது.

இதுபோன்ற மாறுவேட நடவடிக்கைகள் பிரேசிலுக்குப் புதிதல்ல; ஏற்கனவே சா பாலோ (Sao Paulo) நகரில் 'பவர் ரேஞ்சர்ஸ்' (Power Rangers) மற்றும் ஏலியன் (Alien) வேடங்களில் வந்து போலீஸார் திருடர்களைப் பிடித்துள்ளனர். இதேபோல் பெரு (Peru) நாட்டிலும் காதலர் தினத்தன்று 'டெடி பியர்' வேடத்திலும், கிறிஸ்துமஸ் சமயத்தில் 'சாண்டா கிளாஸ்' வேடத்திலும் சென்று போதைப் பொருள் கும்பல்களைப் பிடிப்பது வழக்கமாக உள்ளது. குற்றவாளிகள் சற்றும் எதிர்பார்க்காத வேளையில், அவர்களின் பாணியிலேயே சென்று பிடிப்பது இத்தகைய திருவிழாக் காலங்களில் நல்ல பலனைத் தருவதாகப் பாதுகாப்புத் துறையினர் தெரிவிக்கின்றனர்.