2026 தமிழக சட்டப்பேரவைத் தேர்தலுக்கான அரசியல் களம் தற்போதே சூடுபிடிக்கத் தொடங்கிவிட்டது. இதுவரை அதிமுக மற்றும் என்டிஏ (NDA) ஆகிய இரு தரப்பிலும் பேச்சுவார்த்தை நடத்தி வந்த தேமுதிக, இறுதியில் ஆளுங்கட்சியான திமுகவுடன் கைகோர்க்க முடிவு செய்துள்ளது. இந்த அதிரடி நகர்வு திமுக கூட்டணிக்கு பெரும் பலத்தை அளித்துள்ளது. குறிப்பாக, தமிழக வெற்றிக் கழகத்தின் (TVK) வரவால் ஏற்படக்கூடிய வாக்குச் சிதறல்களைச் சமாளிக்கவும், ஆளுங்கட்சிக்கு எதிரான மனநிலையை ஈடு செய்யவும் பிரேமலதா விஜயகாந்தின் தேமுதிகவை உள்ளே இழுத்துள்ளது திமுக தலைமை. இந்த முடிவின் மூலம் கூட்டணிக்குள் இருக்கும் காங்கிரஸின் ‘பேரம் பேசும்’ வலிமையை திமுக மறைமுகமாகக் குறைத்துள்ளதாக அரசியல் விமர்சகர்கள் கருதுகின்றனர்.

இந்தக் கூட்டணியின் வருகை விசிக, கம்யூனிஸ்டுகள் மற்றும் மதிமுக போன்ற மற்ற கூட்டணிக் கட்சிகளுக்கும் ஒரு எச்சரிக்கை மணியாக அமைந்துள்ளது. கூடுதல் தொகுதிகள் கேட்டு நெருக்கடி கொடுக்கும் கட்சிகளுக்கு முற்றுப்புள்ளி வைக்கவே தேமுதிகவை திமுக உள்ளே கொண்டு வந்துள்ளது. புதிய உடன்படிக்கையின்படி, கமல்ஹாசனின் மக்கள் நீதி மய்யத்திற்கு 3 முதல் 5 தொகுதிகளும், தேமுதிகவுக்கு 7 முதல் 8 தொகுதிகளும் ஒதுக்கப்படலாம் எனத் தெரிகிறது. மேலும், பிரேமலதா விஜயகாந்துக்கு ஒரு ராஜ்ய சபா சீட் உறுதி செய்யப்பட்டுள்ளதாகத் தகவல்கள் வெளியாகியுள்ளன. இதன் மூலம், கடந்த முறை வழங்கிய தொகுதிகளையே இம்முறையும் மற்ற கூட்டணிக் கட்சிகளுக்கு வழங்கி, தனது மேலாதிக்கத்தைத் தக்கவைக்க திமுக திட்டமிட்டுள்ளது.

மறுபுறம், தேமுதிகவை வளைக்க முயன்ற அதிமுக பொதுச்செயலாளர் எடப்பாடி பழனிசாமிக்கு இது ஒரு பின்னடைவாகவே பார்க்கப்படுகிறது. தேமுதிக கேட்ட இரட்டை இலக்க தொகுதிகள் மற்றும் ராஜ்ய சபா சீட்டுக்கு அதிமுக தரப்பில் உறுதி அளிக்காததே இந்தக் கூட்டணி முறிவுக்குக் காரணமாகக் கூறப்படுகிறது. அதேபோல், தேமுதிகவின் 1 சதவீத வாக்கு வங்கி மிகக் குறைவு என்று சிலர் கருதினாலும், சுமார் 20 முதல் 30 தொகுதிகளில் அந்த வாக்குகள் வெற்றியைத் தீர்மானிக்கும் சக்தியாக உள்ளன. பாஜகவின் பல்வேறு கட்ட முயற்சிகளையும் மீறி தேமுதிக திமுக பக்கம் சாய்ந்தது என்டிஏ கூட்டணிக்கும் ஒரு ஏமாற்றமே.

தேமுதிகவின் இந்த முடிவு நடிகர் விஜய்யின் தமிழக வெற்றிக் கழகத்திற்கு மிகப்பெரிய ஷாக் கொடுத்துள்ளது. 234 தொகுதிகளிலும் தனித்துப் போட்டியிட வேட்பாளர்களைத் தேடி வரும் விஜய், கூட்டணியில் ஒரு சில கட்சிகளையாவது இணைத்துவிடலாம் என்று கணக்குப் போட்டிருந்தார். குறிப்பாக, தேமுதிகவை தனது பக்கம் இழுக்க விஜய் ஆர்வம் காட்டினார். ஆனால், பிரேமலதாவின் இந்த நகர்வு விஜய்யின் கூட்டணிக் கனவில் இடியை இறக்கியுள்ளது. "விஜயகாந்த் மன்னிக்க மாட்டார்" என்று தவெக நிர்வாகி நிர்மல்குமார் புலம்புவதிலிருந்தே தவெக எந்த அளவுக்கு விரக்தியில் உள்ளது என்பது தெளிவாகிறது. மொத்தத்தில், 2026 தேர்தலில் தேமுதிக ஒரு முக்கிய 'கேம் சேஞ்சராக' உருவெடுத்துள்ளது.