ஜப்பானின் இந்த அறிவிப்பு சீனாவுக்குப் பெரும் ஆத்திரத்தை ஏற்படுத்தியுள்ளது. "இது பிராந்திய அமைதியைக் குலைக்கும் செயல்" என்று சாடியுள்ள சீனா, ஜப்பானிய நிறுவனங்கள் மீது புதிய ஏற்றுமதித் தடைகளை விதித்துள்ளது. ஏற்கனவே ஜப்பானியப் பிரதமர் சானே தகைச்சி (Sanae Takaichi), "தைவான் மீதான சீனாவின் தாக்குதல், ஜப்பானின் பாதுகாப்பிற்கு விடுக்கப்படும் நேரடி அச்சுறுத்தல்" என்று கூறியிருந்தார். இந்தத் தொடர் மோதல்களால் இரு நாடுகளுக்கும் இடையிலான ராஜதந்திர உறவு கடந்த பல ஆண்டுகளில் இல்லாத அளவிற்கு மிகவும் மோசமான நிலையை எட்டியுள்ளது.
யோனகுனி தீவில் நிலைநிறுத்தப்பட உள்ள ஏவுகணைகள் 'டைப்-03' (Type-03) ரகத்தைச் சேர்ந்தவை. இவை எதிரி நாட்டுப் போர் விமானங்கள் மற்றும் ஏவுகணைகளை இடைமறித்து அழிக்கும் திறன் கொண்டவை. சுமார் 100-க்கும் மேற்பட்ட ராணுவ வீரர்களுடன் அமைக்கப்பட உள்ள இந்தத் தளத்தில், அதிநவீன ரேடார் கருவிகளும் பொருத்தப்பட உள்ளன. சீனா தனது கடற்படையைத் தைவான் நீரிணை பகுதியில் பலப்படுத்தி வரும் சூழலில், ஜப்பான் தனது தென்மேற்குத் தீவுகளில் இத்தகைய ஏவுகணைகளை நிறுவுவது சீனாவின் கடல்வழி ஆதிக்கத்தைத் தடுக்கும் ஒரு வியூகமாகப் பார்க்கப்படுகிறது.
தைவான் விவகாரத்தில் அமெரிக்காவுடன் இணைந்து ஜப்பான் செயல்பட்டு வருவது, ஆசியப் பகுதியில் ஒரு மிகப்பெரிய ராணுவக் கூட்டணியை உருவாக்கியுள்ளது. அதேசமயம், ஜப்பானின் இந்த ராணுவ மயம் சீனாவுடனான பொருளாதார உறவுகளையும் பாதித்துள்ளது. சீன சுற்றுலாப் பயணிகள் ஜப்பானுக்குச் செல்வதைக் குறைத்துள்ளதோடு, ஜப்பானியக் கடல் உணவுகளுக்கும் சீனா தடை விதித்துள்ளது. பொருளாதாரத் தடைகள் மற்றும் ஏவுகணை மிரட்டல்கள் என இரு நாடுகளும் மாறி மாறி மோதிக்கொள்வது, ஆசியக் கண்டத்தில் ஒரு தற்செயலான ராணுவ மோதல் (Accidental Conflict) ஏற்படுமோ என்ற அச்சத்தை உலக நாடுகளிடையே ஏற்படுத்தியுள்ளது.