ஜார்க்கண்ட் மாநிலம் மேற்கு சிங்பூம் மாவட்டத்தில் உள்ள கலையா கிராமத்தில், பிப்ரவரி 17, 2026 அன்று இரவு அரங்கேறிய இந்தக் கொடூரச் சம்பவம் ஒட்டுமொத்த தேசத்தையும் உலுக்கியுள்ளது. 32 வயதான ஜோதி சின்கு என்ற பெண்மணி, தனது இரண்டு மாதக் கைக்குழந்தையுடன் வீட்டில் உறங்கிக் கொண்டிருந்தபோது, ஒரு கும்பல் அவரை வலுக்கட்டாயமாக வெளியே இழுத்து வந்தது. அந்தப் பெண்ணைச் ‘சூனியக்காரி’ என்று முத்திரை குத்திய அக்கும்பல், கிராமத்தில் நடந்த ஒரு மரணத்திற்கு அவரே காரணம் எனக் கூறி மிகக் கொடூரமாகத் தாக்கியுள்ளது.

கண்ணிமைக்கும் நேரத்தில், அந்த கும்பல் ஜோதி சின்கு மற்றும் அவர் கைகளில் இருந்த 2 மாதக் குழந்தை மீது மண்ணெண்ணெய் ஊற்றித் தீ வைத்தது. தன் குழந்தையைக் காப்பாற்ற அந்தத் தாய் போராடியும் பலனின்றி, இருவரும் ரத்த வெள்ளத்தில் துடிதுடிக்க உயிரிழந்தனர். தடுக்க முயன்ற ஜோதியின் கணவர் கோல்ஹான் சின்குவிற்கும் பலத்த தீக்காயங்கள் ஏற்பட்டன. அவர் எப்படியோ உயிர் தப்பி, மறுநாள் காலையில் காவல் நிலையத்தில் புகார் அளித்துள்ளார்.

இந்தச் சம்பவம் குறித்து வழக்குப் பதிவு செய்த குமர்துங்கி (Kumardungi) காவல்துறையினர், முதற்கட்ட விசாரணையில் இது முற்றிலும் மூடநம்பிக்கையின் அடிப்படையில் நடந்த திட்டமிட்ட கொலை என்பதை உறுதிப்படுத்தியுள்ளனர். இச்சம்பவத்தில் தொடர்புடையதாகக் கருதப்படும் உறவினர்கள் உட்பட நான்கு பேரை காவல்துறையினர் தற்போது கைது செய்துள்ளனர். உயிரிழந்த பெண்ணின் உடல் பிரேதப் பரிசோதனைக்கு அனுப்பப்பட்டுள்ளது. மேலும் தப்பியோடிய மற்ற நபர்களைக் காவல்துறையினர் தீவிரமாகத் தேடி வருகின்றனர்.

இந்தியாவின் பல கிராமப்புறப் பகுதிகளில் இன்னமும் வேரூன்றி இருக்கும் இந்த ‘சூனியக்காரி’ (Witch-hunting) கொடுமைக்கு ஆண்டுதோறும் பல அப்பாவிப் பெண்கள் பலியாகி வருகின்றனர். சட்டம் பலமுறை கடுமையாக்கப்பட்டாலும், கல்வியறிவின்மை மற்றும் மூடநம்பிக்கை காரணமாக இத்தகைய காட்டுமிராண்டித்தனமான செயல்கள் தொடர்வது சமூக ஆர்வலர்களிடையே பெரும் கவலையை ஏற்படுத்தியுள்ளது. இந்தப் படுபாதகச் செயலில் ஈடுபட்டவர்களுக்குக் கடுமையான தண்டனை வழங்கப்பட வேண்டும் என்று பல்வேறு தரப்பினரும் கோரிக்கை விடுத்து வருகின்றனர்.