ஈரானின் இந்த இக்கட்டான நிலையில், அமெரிக்காவுடன் ரகசியப் பேச்சுவார்த்தைகளை நடத்திப் போரைத் தவிர்க்க முயற்சிக்கும் முக்கிய நபராக அலி லாரிஜானி (Ali Larijani) உருவெடுத்துள்ளார். ஈரானின் உச்ச தேசிய பாதுகாப்பு கவுன்சிலின் செயலாளராக இருக்கும் லாரிஜானி, கமேனிக்கு மிகவும் நெருக்கமானவர். ஒருவேளை கமேனிக்கு ஏதேனும் நேர்ந்தால், நாட்டை வழிநடத்தும் இடைக்காலத் தலைவராக லாரிஜானியே செயல்படுவார் எனத் தகவல்கள் தெரிவிக்கின்றன. இவர் தற்போது ஓமன் மற்றும் கத்தார் நாடுகளின் உதவியுடன் அமெரிக்கத் தூதர்களுடன் ரகசியப் பேச்சுவார்த்தைகளில் ஈடுபட்டு வருகிறார்.
அமெரிக்க அதிபர் டொனால்ட் ட்ரம்ப் ஈரான் மீது "மிக மோசமான விளைவுகள் ஏற்படும்" என எச்சரித்துள்ள நிலையில், ஈரான் தனது ஏவுகணைப் படைகளை ஈராக் எல்லை மற்றும் பாரசீக வளைகுடா பகுதிகளில் தயார் நிலையில் நிறுத்தியுள்ளது. ஒருவேளை பேச்சுவார்த்தை தோல்வியடைந்தால், ஈரானின் அணுசக்தி மற்றும் ராணுவ மையங்கள் மீது 'மின்னல் வேகத் தாக்குதல்' நடத்த அமெரிக்கா திட்டமிட்டுள்ளது. இதனை எதிர்கொள்ள, தனது அதிகாரிகளுக்குத் தெளிவான கட்டளைகளைப் பிறப்பித்துள்ள கமேனி, தகவல் தொடர்பு துண்டிக்கப்பட்டாலும் தன்னிச்சையாகச் செயல்பட ராணுவத்திற்கு அதிகாரம் வழங்கியுள்ளார்.
மறுபுறம், ஈரானின் முக்கிய நகரங்களில் அரசுக்கு எதிரான போராட்டங்கள் தீவிரமடைந்துள்ளன. ஜனவரி மாதம் நடந்த போராட்டங்களின் 40-வது நாள் நினைவேந்தலை முன்னிட்டு, மாணவர்கள் வீதிக்கு வந்து முழக்கமிட்டு வருகின்றனர். வெளிநாட்டுப் போர் அச்சுறுத்தல் ஒருபுறம், உள்நாட்டில் மக்கள் புரட்சி மறுபுறம் என ஈரான் அரசு இக்கட்டான நிலையில் உள்ளது. இந்தச் சூழலில், லாரிஜானி தலைமையிலான பேச்சுவார்த்தை ஒரு சுமுகமான முடிவை எட்டுமா அல்லது மத்திய கிழக்கு பிராந்தியம் ஒரு பெரும் போரைச் சந்திக்குமா என்பது வரும் நாட்களில் தெரிந்துவிடும்.