எல் மெஞ்சோ கொல்லப்பட்ட செய்தி பரவிய சில மணி நேரங்களிலேயே, அவரது ஆதரவாளர்கள் மெக்சிகோவின் பல மாநிலங்களில் வன்முறையில் குதித்தனர். முக்கிய நெடுஞ்சாலைகளில் பேருந்துகள் மற்றும் லாரிகளைத் தீயிட்டு கொளுத்திப் போக்குவரத்தை முடக்கினர். இதுவரை சுமார் 250-க்கும் மேற்பட்ட சாலை மறியல் சம்பவங்கள் பதிவாகியுள்ளன. குறிப்பாக குவாடலஜாரா மற்றும் புவேர்ட்டோ வல்லார்ட்டா போன்ற முக்கிய நகரங்களில் கடைகள் மற்றும் வங்கிகள் மீது தாக்குதல் நடத்தப்பட்டுள்ளதால், அந்தப் பகுதிகள் போர்க்களம் போலக் காட்சியளிக்கின்றன. வன்முறை காரணமாகப் பல மாநிலங்களில் இன்று பள்ளிகளுக்கு விடுமுறை அளிக்கப்பட்டுள்ளது.
வன்முறை அதிகரித்துள்ள நிலையில், அமெரிக்கா, கனடா மற்றும் இந்தியத் தூதரகங்கள் தங்களது குடிமக்களுக்கு அவசர எச்சரிக்கையை விடுத்துள்ளன. சுற்றுலாப் பயணிகள் தங்கியிருக்கும் விடுதிகளை விட்டு வெளியே வரவேண்டாம் என்றும், பாதுகாப்பான இடங்களில் தஞ்சமடையுமாறும் (Shelter-in-place) அறிவுறுத்தப்பட்டுள்ளனர். புவேர்ட்டோ வல்லார்ட்டா விமான நிலையத்திற்குச் செல்லும் சாலைகள் துண்டிக்கப்பட்டுள்ளதால், ஏர் கனடா மற்றும் டெல்டா உள்ளிட்ட சர்வதேச நிறுவனங்கள் தங்களது விமானச் சேவைகளைத் தற்காலிகமாக ரத்து செய்துள்ளன. துப்பாக்கிச் சூடு சத்தம் கேட்டதால் விமான நிலையங்களில் பயணிகள் அலறியடித்து ஓடும் காட்சிகள் சமூக வலைத்தளங்களில் வெளியாகி அதிர்ச்சியை ஏற்படுத்தியுள்ளன.
இந்த வன்முறைச் சம்பவங்கள், இன்னும் நான்கு மாதங்களில் மெக்சிகோ, அமெரிக்கா மற்றும் கனடா இணைந்து நடத்தவுள்ள 2026 உலகக்கோப்பை கால்பந்து தொடருக்கான பாதுகாப்பு ஏற்பாடுகள் குறித்த கேள்வியை எழுப்பியுள்ளன. குறிப்பாக, உலகக்கோப்பை போட்டிகள் நடைபெறவுள்ள குவாடலஜாரா நகரம் வன்முறையால் அதிகம் பாதிக்கப்பட்டுள்ளதால், போட்டிகள் திட்டமிட்டபடி அங்கு நடைபெறுமா என்பதில் சந்தேகம் எழுந்துள்ளது. இருப்பினும், நிலைமையைக் கட்டுக்குள் கொண்டு வர ராணுவம் மற்றும் தேசிய பாதுகாப்புப் படையினர் தீவிர ரோந்துப் பணியில் ஈடுபட்டுள்ளதாகவும், விளையாட்டுப் போட்டிகளுக்கு எவ்வித பாதிப்பும் ஏற்படாது என்றும் மெக்சிகோ அரசு உறுதி அளித்துள்ளது.