காபூல் (பிப்ரவரி 22, 2026):ஆப்கானிஸ்தான் எல்லைக்குள் புகுந்து பாகிஸ்தான் போர் விமானங்கள் இன்று அதிகாலை நடத்திய சரமாரித் தாக்குதலில் பெண்கள் மற்றும் குழந்தைகள் உட்பட 17-க்கும் மேற்பட்ட பொதுமக்கள் உயிரிழந்துள்ளனர். பாகிஸ்தானில் சமீபகாலமாக அதிகரித்து வரும் தற்கொலைப்படைத் தாக்குதல்களுக்குப் பதிலடி கொடுக்கும் வகையில், ஆப்கானிஸ்தானின் நங்கர்ஹார் (Nangarhar) மற்றும் பக்திகா (Paktika) மாகாணங்களில் உள்ள 7 ரகசியத் தளங்களைக் குறிவைத்து இந்தத் தாக்குதல் நடத்தப்பட்டுள்ளது. நள்ளிரவில் மக்கள் தூங்கிக் கொண்டிருந்தபோது நிகழ்த்தப்பட்ட இந்தத் குண்டுவீச்சு, அப்பகுதியைச் சுடுகாடாக மாற்றியுள்ளது.

பாகிஸ்தானின் இஸ்லாமாபாத் மற்றும் பிற பகுதிகளில் கடந்த சில நாட்களில் நடந்த குண்டுவெடிப்புகளுக்கு ஆப்கானிஸ்தானில் தங்கியிருக்கும் தீவிரவாதக் குழுக்களே காரணம் எனப் பாகிஸ்தான் குற்றம் சாட்டியுள்ளது. "எங்கள் நாட்டு மக்களின் பாதுகாப்பே முக்கியம், தீவிரவாதிகள் எங்கிருந்தாலும் விடமாட்டோம்" எனப் பாகிஸ்தான் தகவல் தொடர்பு அமைச்சர் அதாவுல்லா தரார் தெரிவித்துள்ளார். ரமலான் மாதத்தில் நிகழ்த்தப்பட்ட இந்தத் தாக்குதல், இரு நாடுகளுக்கும் இடையே ஏற்கனவே இருந்த பதற்றத்தை மேலும் அதிகரித்துள்ளது.

பாகிஸ்தானின் இந்த நடவடிக்கையை 'சர்வதேச விதிகளுக்கு எதிரானது' என்று ஆப்கானிஸ்தான் தலிபான் அரசு கடுமையாகக் கண்டித்துள்ளது. "பாகிஸ்தான் ராணுவம் தனது நாட்டின் பாதுகாப்புத் தோல்விகளை மறைக்க அப்பாவி மக்களைக் கொன்று வருகிறது" என்று தலிபான் செய்தித் தொடர்பாளர் ஜபிஹுல்லா முஜாஹித் சாடியுள்ளார். மேலும், இதற்குப் பதிலடியாக ஆப்கானிஸ்தான் படைகளும் எல்லையில் உள்ள பாகிஸ்தான் ராணுவ நிலைகள் மீது துப்பாக்கிச் சூடு மற்றும் பீரங்கித் தாக்குதல்களைத் தொடங்கியுள்ளதால், எல்லையில் போர்ச் சூழல் நிலவுகிறது.

ஏற்கனவே 2025-ம் ஆண்டில் நடந்த மோதல்களைத் தொடர்ந்து கத்தார் நாட்டின் மத்தியஸ்தத்தில் போர்நிறுத்தம் ஏற்பட்டிருந்தது. ஆனால், இன்றைய தாக்குதல் அந்த அமைதி ஒப்பந்தத்தை முற்றிலுமாகச் சிதைத்துள்ளது. எல்லையோரக் கிராமங்களில் இருந்து ஆயிரக்கணக்கான மக்கள் பாதுகாப்பான இடங்களுக்கு இடம்பெயர்ந்து வருகின்றனர். இரு நாடுகளும் பேச்சுவார்த்தை மூலம் தீர்வு காண வேண்டும் என ஐக்கிய நாடுகள் சபை வலியுறுத்தியுள்ள போதிலும், எல்லையில் குண்டுகள் வெடிக்கும் சத்தம் குறைந்தபாடில்லை. எழும் கண்டனம் - தமிழர்தாயகம்.