முன்னாள் அதிபர் பராக் ஒபாமா சமீபத்தில் அளித்த பேட்டி ஒன்றில், "ஏலியன்கள் இருப்பது உண்மைதான்" என்று தெரிவித்திருந்தார். இதற்குப் பதிலடி கொடுக்கும் வகையில் பேசிய ட்ரம்ப், ஒபாமா ரகசியத் தகவல்களைப் பொதுவெளியில் பகிர்ந்து பெரிய தவறு செய்துவிட்டதாகக் குற்றம் சாட்டினார். "அவர் செய்த தவறைச் சரி செய்யவும், மக்களுக்கு உண்மையைச் சொல்லவும் நான் இந்த ரகசியப் பட்டியலை நீக்குகிறேன்" என்று ட்ரம்ப் கிண்டலாகக் குறிப்பிட்டுள்ளார். இருப்பினும், ட்ரம்ப் தனது முதல் ஆட்சி காலத்தில் ஏலியன்கள் பூமிக்கு வந்ததற்கான எந்த ஆதாரத்தையும் தான் பார்க்கவில்லை என்று கூறியிருந்தது குறிப்பிடத்தக்கது.
நெவாடா பாலைவனத்தில் உள்ள 'ஏரியா 51' (Area 51) என்ற ரகசிய ராணுவ தளத்தில் வேற்றுகிரகவாசிகளின் தொழில்நுட்பங்களைப் பயன்படுத்தி அமெரிக்கா ரகசியப் பரிசோதனைகளைச் செய்து வருவதாகப் பல ஆண்டுகளாகக் கூறப்பட்டு வருகிறது. தற்போது ட்ரம்ப் பிறப்பித்துள்ள உத்தரவின் மூலம், அமெரிக்க விமானப்படை வீரர்கள் படம்பிடித்த மர்மப் பொருட்களின் வீடியோக்கள் மற்றும் ரேடார் தரவுகள் பொதுமக்களுக்குக் கிடைக்க வாய்ப்புள்ளது. இயற்பியல் விதிகளுக்கு அப்பாற்பட்டுச் செயல்படும் விண்கலங்கள் குறித்து பென்டகன் மறைத்து வைத்திருந்த உண்மைகள் இனி வெளிச்சத்திற்கு வரும் என எதிர்பார்க்கப்படுகிறது.
ட்ரம்பின் இந்த அறிவிப்பு அமெரிக்காவில் மட்டுமல்லாது இந்தியா உள்ளிட்ட உலக நாடுகள் அனைத்திலும் பெரும் பரபரப்பை ஏற்படுத்தியுள்ளது. அண்டவெளியில் மனிதர்களைத் தாண்டி அறிவுள்ள உயிரினங்கள் உள்ளனவா என்ற கேள்விக்கு இதன் மூலம் விடை கிடைக்கலாம் என விண்வெளி ஆர்வலர்கள் நம்புகின்றனர். ஒருவேளை இந்த ஆவணங்கள் ஏலியன்கள் இருப்பதை உறுதி செய்தால், அது மனித வரலாற்றின் மிகப்பெரிய கண்டுபிடிப்பாக அமையும். வரும் வாரங்களில் இந்த ஆவணங்களை ஒவ்வொன்றாக வெளியிடப் பாதுகாப்புத் துறைச் செயலர் பீட் ஹெக்செத்-க்கு (Pete Hegseth) ட்ரம்ப் அறிவுறுத்தியுள்ளார்.