இந்த குளோப்மாஸ்டர் விமானங்கள் மூலம் அதிநவீன ஏவுகணைகள், கவச வாகனங்கள் மற்றும் போர் விமானங்களுக்குத் தேவையான உதிரிப் பாகங்கள் ஜோர்டான், கத்தார் மற்றும் குவைத் ஆகிய நாடுகளில் உள்ள அமெரிக்கத் தளங்களுக்குக் கொண்டு செல்லப்பட்டுள்ளன. ஏற்கனவே லண்டனிலிருந்து சுமார் 24 எப்-15இ (F-15E Strike Eagles) ரக போர் விமானங்கள் ஜோர்டானில் உள்ள முவாஃபக் சால்டி (Muwaffaq Salti) விமானத் தளத்திற்கு மாற்றப்பட்டுள்ளன. இவற்றுடன் எப்-35 மற்றும் ஏ-10 ரகத் தாக்குதல் விமானங்களும் தயார் நிலையில் வைக்கப்பட்டுள்ளன.
அதிபர் டொனால்ட் ட்ரம்ப் ஈரானுக்கு 10 முதல் 15 நாட்கள் வரை மட்டுமே கெடு விதித்துள்ள நிலையில், இந்தப் பிரம்மாண்ட ராணுவக் குவிப்பு ஈரானை ஒரு புதிய அணுசக்தி ஒப்பந்தத்திற்கு அடிபணிய வைப்பதற்கான 'அதிகபட்ச அழுத்த' (Maximum Pressure) தந்திரமாகக் கருதப்படுகிறது. ஒருவேளை வரும் வியாழக்கிழமை ஜெனீவாவில் நடைபெறவுள்ள பேச்சுவார்த்தை தோல்வியடைந்தால், ஈரானின் அணுசக்தி மையங்கள் மீது வான்வழித் தாக்குதல்களை நடத்த அமெரிக்கா திட்டமிட்டுள்ளது. இதற்காகவே 2003 ஈராக் போருக்குப் பிறகு இல்லாத அளவிற்கு மிகப்பெரிய அளவிலான வான்வழித் தளவாடங்களை அமெரிக்கா தற்போது நிறுத்தியுள்ளது.
அமெரிக்காவின் இந்த ராணுவக் குவிப்பிற்கு ஈரான் கடும் எதிர்ப்புத் தெரிவித்துள்ளது. அமெரிக்கா ஏதேனும் ஆக்கிரமிப்பில் ஈடுபட்டால், இப்பிராந்தியத்தில் உள்ள அனைத்து அமெரிக்கத் தளங்களும், கப்பல்களும் தங்களது ஏவுகணைகளுக்கு இலக்காகும் என ஈரான் ராணுவம் எச்சரித்துள்ளது. மேலும், ரஷ்யா மற்றும் சீனாவுடன் இணைந்து ஈரான் கடல்சார் போர் பயிற்சிகளையும் மேற்கொண்டு வருவதால், மத்திய கிழக்கு பிராந்தியம் ஒரு பெரும் போரின் விளிம்பில் நிற்கிறது. சர்வதேசச் சந்தையில் கச்சா எண்ணெய் விலை உயரத் தொடங்கியுள்ளது உலக நாடுகளிடையே கவலையை ஏற்படுத்தியுள்ளது.