ஈரானிய அரசியலமைப்பின் 111-வது பிரிவின்படி, உச்ச தலைவர் பதவி காலியாகும் போது, ஒரு தற்காலிகக் குழு ஆட்சியை வழிநடத்த வேண்டும். அதன்படி, தற்போதைய அதிபர் மசூத் பெசெஷ்கியன் (Masoud Pezeshkian), நீதித்துறைத் தலைவர் கோலம்-ஹொசைன் மொஹ்சேனி-எஜேய் மற்றும் கார்டியன் கவுன்சிலைச் சேர்ந்த ஒரு மதகுரு ஆகியோர் அடங்கிய மூவர் குழு ஈரானை தற்காலிகமாக ஆட்சி செய்யும். இருப்பினும், பாதுகாப்பு மற்றும் வெளியுறவு விவகாரங்களில் அலி லாரிஜானியே தற்போதைய 'நிஜமான' (de facto) தலைவராகச் செயல்படுகிறார். லாரிஜானி ஒரு மதகுரு அல்ல என்பதால் அவரால் நிரந்தர உச்ச தலைவராக முடியாது என்றாலும், அடுத்த தலைவரைத் தேர்ந்தெடுப்பதில் அவரது முடிவே இறுதியானதாக இருக்கும் எனக் கருதப்படுகிறது.

அலி லாரிஜானி ஈரானின் மிகவும் செல்வாக்கு மிக்க அரசியல் குடும்பத்தைச் சேர்ந்தவர். இவரது சகோதரர்கள் நீதித்துறை மற்றும் நாடாளுமன்றத்தின் தலைவர்களாகப் பணியாற்றியவர்கள். கடந்த சில மாதங்களாகவே, உள்நாட்டுப் போராட்டங்கள் மற்றும் போர் அச்சுறுத்தல்களைக் கையாள்வதற்கான முழு அதிகாரத்தையும் கமேனி, லாரிஜானியிடமே ஒப்படைத்திருந்ததாக நியூயார்க் டைம்ஸ் (NYT) போன்ற சர்வதேச ஊடகங்கள் செய்தி வெளியிட்டுள்ளன. குறிப்பாக, ஈரானின் புரட்சிகர பாதுகாப்புப் படை (IRGC) மற்றும் முக்கிய மதகுருமார்களிடையே இவருக்கு இருக்கும் நெருக்கமான தொடர்பு, இந்த இக்கட்டான நேரத்தில் ஈரானின் ஸ்திரத்தன்மையைப் பாதுகாக்க உதவும் என எதிர்பார்க்கப்படுகிறது.

ஈரானின் அடுத்த உச்ச தலைவராக யார் வருவார்கள் என்ற கேள்வி தற்போது உலகளவில் எழுந்துள்ளது. கமேனியின் மகனான முஜ்தபா கமேனி (Mojtaba Khamenei) மற்றும் ஹசன் கொமேனி (Hassan Khomeini) போன்ற பெயர்கள் அடிபட்டாலும், அசெம்பிளி ஆஃப் எக்ஸ்பர்ட்ஸ் (Assembly of Experts) எனும் மதகுருமார்களின் குழுவே இறுதி முடிவை எடுக்கும். அமெரிக்கா மற்றும் இஸ்ரேலின் தாக்குதலால் ஆத்திரமடைந்துள்ள லாரிஜானி, இந்தத் தாக்குதலுக்கு 'மறக்க முடியாத பாடம்' புகட்டப்படும் என எச்சரித்துள்ளார். ஈரானின் அணுசக்திப் பேச்சுவார்த்தைகள் மற்றும் பிராந்தியப் பாதுகாப்பு விவகாரங்களில் நீண்ட அனுபவம் கொண்ட லாரிஜானி, ஈரானை இந்த இமாலய நெருக்கடியிலிருந்து எவ்வாறு மீட்கப் போகிறார் என்பதே தற்போதைய சர்வதேச அரசியலின் முக்கிய பேசுபொருளாக உள்ளது.