ஈரான் மீதான 'ஆபரேஷன் எபிக் பியூரி' (Operation Epic Fury) இராணுவ நடவடிக்கை தொடங்கப்பட்டு 100 மணிநேரங்கள் கடந்துள்ள நிலையில், அமெரிக்க மத்திய கட்டளை மையம் (CENTCOM) போரின் தீவிரத்தை விளக்கும் வகையில் புதிய வீடியோ காட்சிகளை வெளியிட்டுள்ளது. இந்த வீடியோவில் ஈரானின் ஏவுகணை ஏவுதளங்கள், ட்ரோன் மையங்கள் மற்றும் இராணுவக் கட்டமைப்புகள் துல்லியமாகத் தாக்கி அழிக்கப்படும் காட்சிகள் இடம்பெற்றுள்ளன. "நாங்கள் இந்தப் போரைத் தொடங்கவில்லை, ஆனால் இதனை முடித்து வைப்போம்" என்ற செய்தியுடன், அமெரிக்காவின் வான்வழி மற்றும் கடல்வழி ஆதிக்கம் ஈரானின் தற்காப்பு அரண்களைச் சிதைத்து வருவதாகத் தெரிவிக்கப்பட்டுள்ளது.

கடந்த நான்கு நாட்களில் மட்டும் அமெரிக்க மற்றும் இஸ்ரேலியக் கூட்டுப் படைகள் ஈரானுக்குள் சுமார் 2,000-க்கும் மேற்பட்ட இலக்குகள் மீது துல்லியமான குண்டுகளை (Precision Munitions) வீசித் தாக்குதல் நடத்தியுள்ளன. இதன் விளைவாக ஈரானின் ஏவுகணை ஏவும் திறன் 86 சதவீதமும், ட்ரோன் தாக்குதல்கள் 73 சதவீதமும் குறைந்துள்ளதாகச் சென்காம் தளபதி அட்மிரல் பிராட் கூப்பர் தெரிவித்துள்ளார். குறிப்பாக, ஈரானின் ஆழமான பகுதிகளில் உள்ள மறைவிடங்களைக் கண்டறிந்து அழிப்பதில் பி-2 (B-2) மற்றும் பி-1 (B-1) ரக போர் விமானங்கள் முக்கியப் பங்காற்றி வருகின்றன.

கடற்படை ரீதியாகவும் ஈரானுக்குப் பெரும் பின்னடைவு ஏற்பட்டுள்ளது. கடந்த 100 மணிநேரத் தாக்குதல்களில் ஈரானியக் கடற்படைக்குச் சொந்தமான 20-க்கும் மேற்பட்ட கப்பல்கள் மற்றும் ஒரு நீர்மூழ்கிக் கப்பல் மூழ்கடிக்கப்பட்டுள்ளதாக அமெரிக்கா உறுதிப்படுத்தியுள்ளது. ஈரானின் இஸ்லாமிய புரட்சிகர பாதுகாப்புப் படை (IRGC) மற்றும் ஏனைய நிழல் இராணுவக் குழுக்களின் கட்டளை மையங்கள் ஒவ்வொன்றாகச் சிதைக்கப்பட்டு வருவதால், ஈரானியத் தலைமை கடும் நெருக்கடிக்கு உள்ளாகியுள்ளது. போரின் ஆறாவது நாளான இன்று, அமெரிக்கப் படைகள் ஈரானின் வான்பரப்பிற்குள் மேலும் ஆழமாக ஊடுருவித் தாக்குதல்களைத் தீவிரப்படுத்தியுள்ளன.

ஜனாதிபதி டொனால்ட் ட்ரம்பின் நேரடி உத்தரவின் பேரில் முன்னெடுக்கப்படும் இந்த நடவடிக்கை, ஈரானின் அணுஆயுதக் கனவை முற்றாக முடிவுக்குக் கொண்டு வருவதை நோக்கமாகக் கொண்டுள்ளது. வளைகுடா நாடுகளில் உள்ள அமெரிக்க நிலைகள் மற்றும் தூதரகங்கள் மீது ஈரான் பதிலடித் தாக்குதல்களைத் தொடர்ந்து வரும் போதிலும், அமெரிக்காவின் 'லேசர்-ஃபோக்கஸ்டு' (Laser-focused) வியூகம் ஈரானின் ஒட்டுமொத்தப் பாதுகாப்பு கட்டமைப்பையும் நிலைகுலையச் செய்துள்ளது. இந்தப் போர் இலக்குகள் எட்டப்படும் வரை தாக்குதல்கள் தொடரும் என அமெரிக்கப் பாதுகாப்புத் துறை அறிவித்துள்ளது.