மத்திய ஆப்பிரிக்க நாடான கொங்கோ ஜனநாயகக் குடியரசின் கிழக்குப்பகுதியில் உள்ள ருபாயா (Rubaya) கோல்டன் சுரங்கப் பகுதியில் ஏற்பட்ட பயங்கர நிலச்சரிவில் சிக்கி, 200-க்கும் மேற்பட்டோர் உயிரிழந்துள்ளதாக அந்த நாட்டுச் சுரங்க அமைச்சகம் அதிகாரப்பூர்வமாக அறிவித்துள்ளது. கடந்த செவ்வாய்க்கிழமை பெய்த கனமழையைத் தொடர்ந்து ஏற்பட்ட இந்தச் சரிவில், சுரங்கத் தொழிலாளர்கள் மட்டுமன்றி அங்கிருந்த சிறு வியாபாரிகள் மற்றும் சுமார் 70 குழந்தைகளும் மண்ணுக்குள் புதையுண்டுள்ளதாகத் முதற்கட்டத் தகவல்கள் தெரிவிக்கின்றன.

வடக்கு கிவு (North Kivu) மாகாணத்தில் அமைந்துள்ள இந்த ருபாயா சுரங்கப் பகுதி, உலகின் மின்னணு சாதனங்களுக்குத் தேவையான 'கோல்டன்' (Coltan) தாதுவை வழங்கும் மிக முக்கியமான இடமாகும். கடந்த சில நாட்களாக இப்பகுதியில் பெய்து வரும் "அசாதாரண கனமழை" காரணமாக மலைச்சரிவுகளில் மண் தளர்வடைந்து இந்த விபத்து நேர்ந்துள்ளது. சுரங்கப் பாதைகள் மெதுவாகச் சரிந்து, சில நொடிகளிலேயே ஒட்டுமொத்தப் பகுதியையும் மண் மூடியதாக உயிர் பிழைத்தவர்கள் வேதனையுடன் தெரிவித்துள்ளனர்.

இந்தச் சுரங்கப் பகுதி தற்போது 'M23' என்ற கிளர்ச்சிக் குழுவின் கட்டுப்பாட்டில் இருப்பதால், அங்கு மீட்புப் பணிகளை முன்னெடுப்பதில் பெரும் சிக்கல் நிலவுகிறது. சுரங்க அமைச்சகம் ஏற்கனவே இந்தப் பகுதியை "சிவப்பு மண்டலம்" (Red Zone) என அறிவித்து, அங்குப் பணிகளை மேற்கொள்ளத் தடை விதித்திருந்தது. இருப்பினும், முறையான பாதுகாப்பு உபகரணங்கள் மற்றும் பொறியியல் வழிகாட்டுதல்கள் இன்றி ஆயிரக்கணக்கான தொழிலாளர்கள் அங்குத் தொடர்ந்து பணியாற்றி வந்ததே இவ்வளவு பெரிய உயிர்ச்சேதத்திற்கு முக்கியக் காரணமாகக் கருதப்படுகிறது.

கடந்த ஜனவரி மாதமும் இதே பகுதியில் ஏற்பட்ட சுரங்க விபத்தில் சுமார் 400 பேர் உயிரிழந்ததாகக் கூறப்படும் நிலையில், தற்போது மீண்டும் ஒரு பெரிய பேரிடர் நிகழ்ந்துள்ளது சர்வதேச அளவில் கவலையை ஏற்படுத்தியுள்ளது. காணாமல் போனவர்களைத் தேடும் பணி மிகக் கடினமான சூழலில் தொடர்ந்து நடைபெற்று வருகிறது. கொங்கோ அரசு இந்தக் கிளர்ச்சிக் குழுக்களின் சட்டவிரோத சுரங்கப் பணிகளே இத்தகைய விபத்துகளுக்குக் காரணம் எனக் குற்றம் சாட்டியுள்ள நிலையில், உயிரிழந்தவர்களின் குடும்பங்களுக்குப் போதிய நிவாரணங்களை வழங்க நடவடிக்கை எடுக்கப்பட்டு வருகிறது.