தமிழக வெற்றிக் கழகம் சார்பில் நேற்று மாலை மாமல்லபுரத்தில் நடைபெற்ற மகளிர் தின விழாவில் அக்கட்சியின் தலைவர் விஜய் பங்கேற்று, மகளிருக்கான வாக்குறுதிகள் மற்றும் திட்டங்களை அறிவித்தார். இந்த நிலையில், இந்த விழாவையும், அதன் பின்னணியில் உள்ள அரசியல் நடவடிக்கைகளையும் இயக்குநர் அமீர் தனது வாட்ஸ்அப் ஸ்டேட்டஸ் மூலம் கடுமையாக விமர்சித்துள்ளார். "மனைவி மற்றும் மகளை வீட்டில் இருந்து விரட்டிவிட்டு, மகளிர் தின விழா எனும் கேவலமான அரசியல் நிகழ்ச்சியை நடத்துவதா?" என்று கேள்வி எழுப்பியுள்ள அமீர், தமிழகத்தில் ஒரு 'ஹிட்லர்' உருவாவதாகக் குறிப்பிட்டுள்ளார். அவரது இந்தப் பதிவு சமூக வலைதளங்களில் பெரும் விவாதத்தை ஏற்படுத்தியுள்ளது.

நடிகர் விஜய் மற்றும் அவரது மனைவி சங்கீதா இடையேயான விவாகரத்து விவகாரம், கடந்த சில வாரங்களாகவே திரைத்துறையிலும் அரசியல் வட்டாரத்திலும் பெரும் பேசுபொருளாக இருந்து வருகிறது. இது தொடர்பாகத் தொடரப்பட்ட வழக்கு மனுவில், விஜய் மீது பல்வேறு தனிப்பட்ட குற்றச்சாட்டுகள் முன்வைக்கப்பட்டுள்ளதாகத் தகவல்கள் வெளியாகின. இந்தச் சூழலில், சமீபத்தில் நடைபெற்ற ஒரு குடும்ப நிகழ்ச்சியில் விஜய் மற்றும் ஒரு முன்னணி நடிகை இணைந்து பங்கேற்றது, இந்த விவகாரத்தை மேலும் தீவிரப்படுத்தியது. குடும்பம் தொடர்பான இத்தகைய சர்ச்சைகள் நீடிக்கும் நிலையில், தவெக சார்பில் மகளிர் தின விழா நடத்தப்படுவது தார்மீக அடிப்படையில் தவறு என்று பலரும் சமூக வலைதளங்களில் கருத்து தெரிவித்து வருகின்றனர்.

இயக்குநர் அமீரின் இந்தக் கடுமையான விமர்சனத்திற்குத் தவெக ஆதரவாளர்கள் மத்தியில் பெரும் அதிருப்தி எழுந்துள்ளது. பொதுவாழ்வில் இருக்கும் ஒரு தலைவர், தனது தனிப்பட்ட வாழ்க்கை குறித்த சர்ச்சைகளுக்குப் பதில் அளிக்காமல் இத்தகைய அரசியல் நிகழ்வுகளை முன்னெடுப்பது ஏற்புடையதல்ல என்று அமீர் போன்றோர் விமர்சிக்கும் அதே வேளையில், தவெக ஆதரவாளர்கள் இது விஜய்யின் தனிப்பட்ட விவகாரம் என்றும், இதனை அரசியலோடு இணைத்துப் பார்ப்பது முறையற்றது என்றும் வாதிடுகின்றனர். இருப்பினும், தேர்தல் நெருங்கும் இந்த வேளையில், விஜய் எதிர்கொள்ளும் இத்தகைய தனிப்பட்ட விமர்சனங்கள் அவருக்குப் பெரும் சவாலாக மாறியுள்ளன.

பெண்களின் பாதுகாப்பையும் உரிமைகளையும் மையப்படுத்தி தவெக அரசியல் செய்து வரும் சூழலில், அதன் தலைவரின் குடும்ப விவகாரங்கள் வெளிச்சத்திற்கு வந்துள்ளதும், அதற்கு எதிராகத் திரைத்துறையைச் சேர்ந்தவர்களே குரல் எழுப்புவதும் அந்த அரசியல் கட்சியின் பிம்பத்திற்குப் பின்னடைவாகக் கருதப்படுகிறது. இத்தகைய விமர்சனங்கள், எதிர்க்கட்சியினர் விஜய் மீதான தாக்குதல்களைத் தீவிரப்படுத்த ஒரு கருவியாகப் பயன்படுத்தப்பட்டு வருகின்றன. சர்ச்சைகளுக்கு மத்தியில், விஜய் தனது அரசியல் பயணத்தை எப்படித் தொடரப்போகிறார் என்பதும், இந்தத் தனிப்பட்ட குற்றச்சாட்டுகள் குறித்த உண்மையை எப்போது வெளிப்படுத்தப்போகிறார் என்பதும் அனைவரின் எதிர்பார்ப்பாக உள்ளது.