இலங்கையின் தெற்கு கடற்பரப்பில் ஈரானுக்குச் சொந்தமான 'ஐரிஸ் டெனா' (IRIS Dena) என்ற போர் கப்பல் மூழ்கடிக்கப்பட்ட சம்பவத்தில், இதுவரை சுமார் 80 ஈரானிய மாலுமிகளின் உடல்கள் மீட்கப்பட்டுள்ளதாக இலங்கை வெளிவிவகார அமைச்சு தெரிவித்துள்ளது. இந்தியப் பெருங்கடலில் சர்வதேச கடல் எல்லைக்குள் பயணித்துக் கொண்டிருந்த இந்தக் கப்பல் மீது அமெரிக்காவின் அணுசக்தி நீர்மூழ்கிக் கப்பலில் இருந்து ஏவப்பட்ட டார்பிடோ (Torpedo) ஏவுகணை தாக்கியதால் இந்த விபத்து நேர்ந்துள்ளது. ஈரானில் நிலவும் போர்ச் சூழலுக்கு மத்தியில், இந்தியப் பெருங்கடல் பிராந்தியத்தில் ஒரு போர் கப்பல் மூழ்கடிக்கப்பட்டது சர்வதேச அளவில் பெரும் அதிர்ச்சியை ஏற்படுத்தியுள்ளது.
இந்தச் சம்பவம் குறித்து அமெரிக்கப் பாதுகாப்புச் செயலாளர் பீட் ஹெக்செத் (Pete Hegseth) உறுதிப்படுத்துகையில், "சர்வதேச கடல் எல்லைக்குள் பாதுகாப்பாக இருப்பதாகக் கருதிய ஈரானியப் போர் கப்பலை அமெரிக்க நீர்மூழ்கிக் கப்பல் வெற்றிகரமாகச் சுட்டு வீழ்த்தியுள்ளது" என்று தெரிவித்துள்ளார். ஈரானின் கடற்படை வலிமையைச் சிதைப்பதற்கான அமெரிக்காவின் புதிய வியூகத்தின் ஒரு பகுதியாக இந்தத் தாக்குதல் பார்க்கப்படுகிறது. இந்தக் கப்பலில் சுமார் 180 மாலுமிகள் இருந்ததாகக் கூறப்படும் நிலையில், மீதமுள்ளவர்களின் கதி என்ன என்பது குறித்துத் தொடர்ந்து தேடுதல் பணிகள் நடைபெற்று வருகின்றன.
இலங்கைக் கடற்படை மற்றும் விமானப்படை இணைந்து காலி (Galle) கடற்பரப்பில் பாரிய தேடுதல் மற்றும் மீட்புப் பணிகளை முன்னெடுத்து வருகின்றன. இதுவரை 32 மாலுமிகள் உயிருடன் மீட்கப்பட்டு காலி கராப்பிட்டிய போதனா மருத்துவமனையில் அனுமதிக்கப்பட்டுள்ளனர். காயமடைந்தவர்களில் சிலரது நிலைமை கவலைக்கிடமாக உள்ளதாக மருத்துவமனை வட்டாரங்கள் தெரிவிக்கின்றன. இந்தியாவிலுள்ள விசாகப்பட்டினத்தில் நடைபெற்ற சர்வதேசக் கடற்படை அணிவகுப்பில் (IFR 2026) பங்கேற்றுவிட்டுத் தாயகம் திரும்பிக் கொண்டிருந்த போதே இந்தக் கப்பல் தாக்குதலுக்கு உள்ளானது குறிப்பிடத்தக்கது.
ஈரானின் 'மௌட்ஜ்' (Moudge) ரகத்தைச் சேர்ந்த இந்த அதிநவீன போர்க்கப்பல் மூழ்கடிக்கப்பட்டது ஈரானியக் கடற்படைக்கு ஏற்பட்டுள்ள மிகப்பெரிய பின்னடைவாகக் கருதப்படுகிறது. ஏற்கெனவே மத்திய கிழக்கில் நிலவும் போர்ச் சூழல் இப்போது இந்தியப் பெருங்கடல் பிராந்தியத்திற்கும் பரவியிருப்பது அண்டை நாடுகளிடையே பதற்றத்தை உருவாக்கியுள்ளது. மீட்புப் பணிகளை இலங்கை அரசு முன்னின்று நடத்தி வரும் அதேவேளை, உயிரிழந்தவர்களின் உடல்களை ஈரான் தூதரகத்தின் ஊடாகத் தாயகத்திற்கு அனுப்பும் நடவடிக்கைகள் மேற்கொள்ளப்பட்டு வருகின்றன.