மத்திய கிழக்கில் அமெரிக்கா மற்றும் ஈரான் இடையே போர் தீவிரமடைந்துள்ள நிலையில், துபாயின் ஆடம்பர ஹோட்டல் ஒன்றில் தங்கியிருந்த ஐரிஷ் தொழிலதிபர் ஒருவர், தனது கண்முன்னே நிகழ்ந்த ட்ரோன் தாக்குதல் குறித்த அதிரவைக்கும் தகவல்களைப் பகிர்ந்துள்ளார். கடந்த சனிக்கிழமை இரவு துபாயின் பாம் ஜுமேரா (Palm Jumeirah) பகுதியில் உள்ள பிரபல 'ஃபேர்மாண்ட்' (Fairmont) ஹோட்டல் அருகே ஈரானிய ட்ரோன் ஒன்று விழுந்து வெடித்தது. இந்தச் சம்பவத்தின் போது ஹோட்டல் அறையில் இருந்த அந்தத் தொழிலதிபர், "நிலநடுக்கம் ஏற்பட்டது போலக் கட்டடம் குலுங்கியது, ஜன்னல் கண்ணாடிகள் சுக்குநூறாக உடைந்தன" என்று தனது பயங்கர அனுபவத்தை விவரித்துள்ளார்.

தாக்குதல் நடந்த போது ஏற்பட்ட பயங்கர சத்தத்தைக் கேட்டதும், அது ஏதோ பட்டாசு வெடிப்பது என்று முதலில் நினைத்ததாக அவர் குறிப்பிட்டுள்ளார். ஆனால், அடுத்த சில நொடிகளில் வானில் ஏவுகணைகள் இடைமறிக்கப்படுவதைக் கண்டதும் நிலைமையின் தீவிரத்தை உணர்ந்ததாகக் கூறினார். "அது ஒரு நரம்புகளைத் தளர்வடையச் செய்யும் (Nerve-wracking) அனுபவம். உயிரைக் கையில் பிடித்துக்கொண்டு ஹோட்டலின் அடித்தளத்தில் (Basement) உள்ள பாதுகாப்பு அறைக்கு ஓடினோம். அங்கு நூற்றுக்கணக்கான சுற்றுலாப் பயணிகள் அச்சத்துடன் தஞ்சம் புகுந்திருந்தனர்" என்று அவர் அந்த நிமிடங்களை நினைவு கூர்ந்தார்.

ஈரானின் இந்தத் திடீர் ட்ரோன் மற்றும் ஏவுகணைத் தாக்குதல்கள் துபாயின் இயல்பு வாழ்க்கையை முற்றாக முடக்கியுள்ளன. ஐரிஷ் தொழிலதிபர் தங்கியிருந்த ஹோட்டல் மட்டுமன்றி, துபாய் சர்வதேச விமான நிலையம் மற்றும் ஜேபல் அலி (Jebel Ali) துறைமுகப் பகுதிகளிலும் தாக்குதல் சிதறல்கள் விழுந்து தீ விபத்துகள் ஏற்பட்டுள்ளன. இந்தச் சம்பவத்தைத் தொடர்ந்து ஐக்கிய அரபு அமீரகத்தில் உள்ள நூற்றுக்கணக்கான ஐரிஷ் குடிமக்களைத் தாயகம் அழைத்து வர அயர்லாந்து அரசாங்கம் சிறப்பு விமானங்களை (Charter flights) ஏற்பாடு செய்துள்ளது. வான்பரப்பு மூடப்பட்டுள்ளதால், பல சுற்றுலாப் பயணிகள் அங்கேயே சிக்கித் தவிக்கின்றனர்.

மத்திய கிழக்கு பிராந்தியத்தில் 'ஆபரேஷன் எபிக் பியூரி' (Operation Epic Fury) போர் ஐந்தாவது நாளை எட்டியுள்ள நிலையில், துபாய் போன்ற பாதுகாப்பான நகரங்களும் இலக்கு வைக்கப்படுவது சர்வதேச அளவில் அதிர்ச்சியை ஏற்படுத்தியுள்ளது. ஐக்கிய அரபு அமீரகப் பாதுகாப்புப் படைகள் பெரும்பாலான ட்ரோன்களை வானிலேயே சுட்டு வீழ்த்திய போதிலும், அவற்றின் சிதறல்கள் விழுந்து பல இடங்களில் சேதங்கள் ஏற்பட்டுள்ளன. போர்ப் பதற்றம் காரணமாகத் துபாயில் உள்ள அனைத்துப் பொது இடங்களும் மூடப்பட்டுள்ளதுடன், மக்கள் பாதுகாப்பான இடங்களுக்குள் இருக்குமாறு அந்நாட்டு அரசு தொடர்ந்து அறிவுறுத்தி வருகிறது.