இந்த விபத்தில் மொத்தம் மூன்று F-15E ஸ்ட்ரைக் ஈகிள் விமானங்கள் விழுந்த போதிலும், அவற்றில் இருந்த 6 வீரர்களும் பத்திரமாக உயிர் தப்பியுள்ளனர். குவைத் மக்கள் இவர்களைக் கண்டறிந்து, முதலுதவி அளித்து, பின்னர் அதிகாரிகளிடம் ஒப்படைத்தனர். அந்தப் பெண் விமானி ஒரு சிவிலியன் வாகனத்தில் அமர்ந்து பாதுகாப்பாக அழைத்துச் செல்லப்படும் காட்சிகள், இரு நாடுகளுக்கும் இடையிலான உறவின் ஆழத்தைப் பிரதிபலிப்பதாகப் பலரும் கருத்து தெரிவித்து வருகின்றனர். அமெரிக்க சென்ட்காம் (CENTCOM) வெளியிட்டுள்ள அறிக்கையில், மீட்கப்பட்ட அனைத்து வீரர்களும் தற்போது மருத்துவமனையில் நலமாக இருப்பதாகத் தெரிவிக்கப்பட்டுள்ளது.

குவைத் பாதுகாப்பு அமைச்சகம் இந்தச் சம்பவம் குறித்து அமெரிக்காவுடன் இணைந்து தீவிர விசாரணை நடத்தி வருகிறது. ஈரானின் ட்ரோன்கள் மற்றும் ஏவுகணைகளை இடைமறிக்கும் பரபரப்பான சூழலில் இந்தத் தவறு நடந்ததாகக் குவைத் ஒப்புக்கொண்டுள்ளது. ஒருபுறம் போர் தீவிரமடைந்து வரும் நிலையில், மறுபுறம் உயிருக்கு அச்சுறுத்தல் ஏற்பட்ட நிலையிலும் ஒரு அமெரிக்க வீரரை குவைத் குடிமகன் இன்முகத்துடன் வரவேற்று "எங்களுக்கு உதவியதற்கு நன்றி" என்று கூறியது, தற்போதைய பதற்றமான அரசியல் சூழலில் ஒரு மனிதாபிமான அடையாளமாகப் பார்க்கப்படுகிறது.