மறைந்த பாப் பாடகர் மைக்ல் ஜாக்சன் மீது, அவரது முன்னாள் குடும்ப நண்பர்களான கசியோ (Cascio) குடும்பத்தினர் புதிய பாலியல் குற்றச்சாட்டுகளை சுமத்தி வழக்கு தொடர்ந்துள்ளனர். எட்வர்ட், டொமினிக், மேரி மற்றும் ஆல்டோ கசியோ ஆகியோர் தாக்கல் செய்துள்ள இந்த வழக்கில், தங்களுக்கு 7 அல்லது 8 வயதாக இருந்தபோது ஜாக்சன் தங்களை பாலியல் துஷ்பிரயோகம் செய்ததாகவும், போதைப்பொருள் கொடுத்து துன்புறுத்தியதாகவும் குற்றம் சாட்டியுள்ளனர். இந்த குற்றச்சாட்டுகள் ஹாலிவுட் வட்டாரத்தில் பெரும் அதிர்ச்சியை ஏற்படுத்தியுள்ளன.

ஜாக்சன் கசியோ குடும்பத்தினரின் நம்பிக்கையைப் பெறுவதற்காக அவர்களுக்குப் பரிசுகள் மற்றும் சொகுசு வாழ்க்கை வசதிகளை வழங்கியதாகவும், பின்னர் அவர்களை தனிமைப்படுத்தி துஷ்பிரயோகம் செய்ததாகவும் மனுவில் குறிப்பிடப்பட்டுள்ளது. இந்த சம்பவங்கள் சுவிட்சர்லாந்து மற்றும் இங்கிலாந்து போன்ற நாடுகளில் உள்ள பல்வேறு இடங்களில் நிகழ்ந்ததாக அவர்கள் தெரிவித்துள்ளனர். இந்த புதிய வழக்கு, ஜாக்சன் மீதான முந்தைய குற்றச்சாட்டுகளை விட மிகவும் தீவிரமானதாகப் பார்க்கப்படுகிறது.

இதற்கிடையில், மைக்ல் ஜாக்சனின் சொத்து நிர்வாகம் (Estate) இந்த குற்றச்சாட்டுகளை முழுமையாக மறுத்துள்ளது. கசியோ குடும்பத்தினர் ஜாக்சனை 25 ஆண்டுகளுக்கும் மேலாக பாதுகாத்து வந்த நிலையில், இப்போது பணத்திற்காக இத்தகைய குற்றச்சாட்டுகளை சுமத்துகிறார்கள் என்று அவர்கள் தெரிவித்துள்ளனர். இந்த வழக்கு ஒரு "பணத்திற்காக நடத்தப்படும் மோசடி" (money grab) என்றும், அவர்கள் தங்களுக்கு 200 மில்லியன் டாலர் இழப்பீடு கோருவதாகவும் சொத்து நிர்வாகத்தின் வழக்கறிஞர் மார்ட்டி சிங்கர் தெரிவித்துள்ளார்.

ஜாக்சனின் வாழ்க்கையை மையமாகக் கொண்டு தயாரிக்கப்படும் புதிய திரைப்படத்திற்கு இடையூறு விளைவிக்கும் நோக்கிலும் இந்த குற்றச்சாட்டுகள் எழுப்பப்பட்டிருக்கலாம் என்று கருதப்படுகிறது. ஜாக்சன் மீதான குற்றச்சாட்டுகள் மற்றும் அவரது மரணத்திற்குப் பிந்தைய சட்டப் போராட்டங்கள் தொடர்ந்து கொண்டே இருக்கின்றன. இந்த வழக்கு நீதிமன்றத்தில் என்ன மாதிரியான திருப்பங்களை ஏற்படுத்தும் என்பது இன்னும் சில நாட்களில் தெரியவரும்.