சவுதி அரேபியாவில் ஏவுகணைத் தாக்குதல்: இந்தியர் எவரும் உயிரிழக்கவில்லை - தூதரகம் உறுதி

சவூதி அரேபியாவின் அல்-கர்ஜ் (Al-Kharj) நகரில் உள்ள குடியிருப்புப் பகுதி மீது ஞாயிற்றுக்கிழமை மாலை நடத்தப்பட்ட ஏவுகணைத் தாக்குதலில், இந்தியர் எவரும் உயிரிழக்கவில்லை என்று சவூதி அரேபியாவிற்கான இந்திய தூதரகம் அதிகாரப்பூர்வமாகத் தெரிவித்துள்ளது. ஆரம்பத்தில் இந்தத் தாக்குதலில் ஒரு இந்தியர் மற்றும் ஒரு பங்களாதேஷ் நாட்டைச் சேர்ந்தவர் உயிரிழந்ததாகத் தகவல்கள் பரவியிருந்தன. இந்தத் தகவலை மறுத்துள்ள இந்தியத் தூதரகம், இது குறித்து மிகுந்த நிம்மதியடைவதாகவும், பாதிக்கப்பட்டவர்களுக்குத் தேவையான அனைத்து உதவிகளும் வழங்கப்பட்டு வருவதாகவும் தெரிவித்துள்ளது.

இந்தத் தாக்குதல் சம்பவத்தில் ஒரு இந்தியர் காயமடைந்துள்ளதாகவும், அவர் தற்போது அல்-கர்ஜ் நகரில் உள்ள அரசு மருத்துவமனையில் சிகிச்சை பெற்று வருவதாகவும் தூதரகம் உறுதிப்படுத்தியுள்ளது. காயமடைந்த இந்தியரை, இந்திய தூதரகத்தின் சமூக நலத்துறை அதிகாரி ஒய். சபீர் நேரில் சந்தித்து நலம் விசாரித்துள்ளார். தாக்குதலில் இரு பங்களாதேஷ் நாட்டவர்கள் உயிரிழந்துள்ளதாகவும், 11 பங்களாதேஷ் நாட்டவர்கள் காயமடைந்துள்ளதாகவும் சவூதி சிவில் பாதுகாப்புத் துறை இன்று காலை வெளியிட்ட திருத்தப்பட்ட அறிக்கையில் உறுதிப்படுத்தியுள்ளது.

மத்திய கிழக்கு பிராந்தியத்தில் ஏற்பட்டுள்ள அசாதாரண சூழல் மற்றும் அதிகரித்துவரும் மோதல்களைக் கருத்தில் கொண்டு, சவூதி அரேபியாவில் வசிக்கும் அனைத்து இந்தியர்களும் மிகுந்த எச்சரிக்கையுடனும், பாதுகாப்பாகவும் இருக்குமாறு இந்திய தூதரகம் அறிவுறுத்தியுள்ளது. உள்ளூர் அதிகாரிகளின் பாதுகாப்பு வழிகாட்டுதல்களைத் தவறாமல் பின்பற்றுமாறும், தூதரகத்தின் அறிவிப்புகளைத் தொடர்ந்து கவனிக்குமாறும் கேட்டுக்கொள்ளப்பட்டுள்ளது. சவூதியில் உள்ள இந்தியத் தூதரகம் மற்றும் ஜெட்டாவில் உள்ள துணைத் தூதரகம் தொடர்ந்து வழக்கம்போல் செயல்பட்டு வருவதாகவும், இந்தியர்களுக்குத் தேவையான உதவிகளை வழங்கத் தயாராக இருப்பதாகவும் தெரிவிக்கப்பட்டுள்ளது.

இதற்கிடையில், இந்தத் தாக்குதல் தொடர்பாகப் பதற்றமடையத் தேவையில்லை என்றும், இந்தியாவிற்குத் திரும்ப விரும்பும் பயணிகள் தங்களின் விமானப் பயணத் திட்டங்களைச் சரிபார்த்துக்கொள்ளுமாறும் தூதரகம் அறிவுறுத்தியுள்ளது. தாக்குதலுக்குள்ளான அல்-கர்ஜ் பகுதி ஒரு முக்கியத் தொழில் மையமாக இருப்பதால், அங்கு பாதுகாப்பு நடவடிக்கைகள் தீவிரப்படுத்தப்பட்டுள்ளன. மத்திய கிழக்கில் நிலவும் தற்போதைய பதற்றமான சூழலில், இந்திய அரசின் வெளிவிவகார அமைச்சகம் நிலைமையை உன்னிப்பாகக் கவனித்து வருவதாகவும், இந்தியர்களின் பாதுகாப்பை உறுதி செய்வதில் முழு கவனம் செலுத்தி வருவதாகவும் தகவல்கள் தெரிவிக்கின்றன.