ஈரானின் அணுசக்தி திட்டங்கள் குறித்து அமெரிக்காவுக்கும் ஈரானுக்கும் இடையே ஜெனிவாவில் தீவிரமான பேச்சுவார்த்தைகள் நடந்து வந்த அதே வேளையில், மறுபுறம் அமெரிக்க அதிபர் டொனால்ட் டிரம்ப் மற்றும் இஸ்ரேலிய பிரதமர் பெஞ்சமின் நெதன்யாகு ஆகியோர் ஈரான் மீது தாக்குதல் நடத்த ரகசியமாக திட்டமிட்டிருந்தது தற்போது வெளிச்சத்திற்கு வந்துள்ளது. "ஆபரேஷன் எபிக் ப்யூரி" (Operation Epic Fury) எனப்படும் இந்த இராணுவ நடவடிக்கைக்கான ஆயத்தப் பணிகள் கடந்த சில மாதங்களாகவே திரைமறைவில் நடந்து வந்ததாக பாதுகாப்பு வட்டாரங்கள் தெரிவிக்கின்றன.

ராஜதந்திர ரீதியிலான தீர்வுகள் எட்டப்படும் என்று உலகம் எதிர்பார்த்திருந்த நிலையில், இந்த திடீர் தாக்குதல் சர்வதேச சமூகத்தை அதிர்ச்சியில் ஆழ்த்தியுள்ளது. பேச்சுவார்த்தைகள் ஒருபுறம் நடந்தாலும், ஈரானின் அணு ஆயுதத் திறனை முழுமையாக முறியடிக்க இராணுவ நடவடிக்கை மட்டுமே ஒரே வழி என்பதில் டிரம்ப் மற்றும் நெதன்யாகு உறுதியாக இருந்ததாகக் கூறப்படுகிறது. இந்தத் தாக்குதல் ஈரானிய ஆட்சியை வீழ்த்துவதை இலக்காகக் கொண்டு மிக நுணுக்கமாகத் திட்டமிடப்பட்டிருந்தது இப்போது உறுதியாகியுள்ளது.

இந்த ரகசிய திட்டமிடலின் ஒரு பகுதியாக, மத்திய கிழக்கில் அமெரிக்காவின் இராணுவ பலம் கடந்த சில வாரங்களாகவே அதிகரிக்கப்பட்டது. இது குறித்து டிரம்ப் கூறுகையில், பேச்சுவார்த்தைகள் தோல்வியடைந்தால் தற்காப்பு நடவடிக்கைக்குத் தயாராக இருக்க வேண்டும் என்ற நோக்கிலேயே இந்தத் திட்டங்கள் வகுக்கப்பட்டதாகத் தெரிவித்தார். ஆனால், பேச்சுவார்த்தை மேசையில் ஈரான் சில விட்டுக்கொடுப்புகளைச் செய்யத் தயாராக இருந்தபோதே இந்தத் தாக்குதல் நடத்தப்பட்டது விமர்சனங்களை எழுப்பியுள்ளது.

தற்போது இந்தத் தாக்குதலால் பிராந்தியத்தில் போர் பதற்றம் உச்சக்கட்டத்தை எட்டியுள்ளது. ஓமன் நாட்டின் மத்தியஸ்தத்தில் நடந்த வந்த அமைதிப் பேச்சுவார்த்தைகள் முற்றிலும் முறிந்துள்ளன. அமெரிக்கா மற்றும் இஸ்ரேலின் இந்த அதிரடி நடவடிக்கை, சர்வதேச உறவுகளில் பெரும் தாக்கத்தை ஏற்படுத்தியுள்ளதோடு, எதிர்காலத்தில் ஈரானுடன் மீண்டும் ஒரு ஒப்பந்தம் ஏற்படுவதற்கான வாய்ப்புகளை கேள்விக்குறியாக்கியுள்ளது.