மத்திய கிழக்கில் போர் தீவிரமடைந்துள்ள நிலையில், ஈரானின் மேற்குப் பகுதியில் உள்ள அந்நாட்டுப் பாதுகாப்புப் படைகள் மீது தாக்குதல் நடத்துவது குறித்து, ஈரான்-ஈராக் எல்லைப் பகுதிகளில் செயல்படும் குர்திஷ் ஆயுதக் குழுக்கள் அமெரிக்க அதிகாரிகளுடன் தீவிர ஆலோசனையில் ஈடுபட்டுள்ளதாகத் தகவல்கள் வெளியாகியுள்ளன. ஈராக் குர்திஸ்தான் பிராந்தியத்தைத் தளமாகக் கொண்டு இயங்கும் இந்தக் குழுக்கள், ஈரானிய இராணுவத்தின் வலிமையைக் குறைக்கவும், தரைவழித் தாக்குதல்களை முன்னெடுக்கவும் திட்டமிட்டுள்ளதாகச் சர்வதேச ஊடகங்கள் செய்தி வெளியிட்டுள்ளன. அமெரிக்கா மற்றும் இஸ்ரேலின் வான்வழித் தாக்குதல்கள் ஈரானின் முக்கிய இலக்குகளைச் சிதைத்து வரும் வேளையில், இந்தத் தரைவழி நகர்வு முக்கியத்துவம் வாய்ந்ததாகக் கருதப்படுகிறது.

ஈரானின் உச்ச தலைவர் உள்ளிட்ட உயர்மட்டத் தலைவர்கள் கொல்லப்பட்டுள்ள நிலையில், தற்போது ஏற்பட்டுள்ள அதிகார வெற்றிடத்தைப் பயன்படுத்தி மக்கள் எழுச்சியைத் தூண்டுவதே இந்தக் குழுக்களின் முதன்மை நோக்கமாகும். இதற்காக அமெரிக்கப் புலனாய்வு அமைப்பான சிஐஏ (CIA) மூலம் தங்களுக்குத் தேவையான நவீன ஆயுதங்கள் மற்றும் இராணுவ உதவிகளை வழங்குமாறு குர்திஷ் தரப்பிலிருந்து கோரிக்கை விடுக்கப்பட்டுள்ளது. ஈரானின் மேற்கு மாகாணங்களில் தங்களின் செல்வாக்கை நிலைநாட்டவும், ஈரானியப் பாதுகாப்புப் படைகளை அங்கிருந்து அப்புறப்படுத்தவும் இந்த ஆலோசனைகள் உதவக்கூடும் என எதிர்பார்க்கப்படுகிறது.

இந்த விவகாரம் குறித்து அமெரிக்க ஜனாதிபதி டொனால்ட் ட்ரம்ப், ஈராக் குர்திஸ்தானின் உயர்மட்டத் தலைவர்களுடன் தொலைபேசி வாயிலாகப் பேச்சுவார்த்தை நடத்தியுள்ளதாகத் தெரிகிறது. ஈரானின் இராணுவ மற்றும் எல்லைப் பாதுகாப்புச் சாவடிகள் மீது இஸ்ரேல் ஏற்கனவே வான்வழித் தாக்குதல்களை நடத்தி, குர்திஷ் படைகள் உள்ளே நுழைவதற்கான பாதையைத் தயார் செய்து வருவதாகவும் ஆய்வாளர்கள் சுட்டிக்காட்டுகின்றனர். இருப்பினும், இந்த இராணுவ நடவடிக்கை குறித்த இறுதி முடிவு இன்னும் எடுக்கப்படவில்லை என்றும், அதன் காலம் மற்றும் தீவிரம் குறித்துத் தொடர்ந்து விவாதிக்கப்பட்டு வருவதாகவும் தகவல்கள் தெரிவிக்கின்றன.

அதேசமயம், ஈரானியத் தரப்பிலிருந்து குர்திஷ் குழுக்களின் முகாம்கள் மீது ட்ரோன் தாக்குதல்கள் நடத்தப்பட்டு வருகின்றன. ஈராக் மற்றும் ஈரானியப் பாதுகாப்பு அதிகாரிகள் தங்களின் பொதுவான எல்லைப் பாதுகாப்பை உறுதி செய்வது குறித்து ஆலோசித்து வரும் நிலையில், குர்திஷ் குழுக்களின் இந்த நகர்வு பிராந்தியத்தில் ஒரு புதிய உள்நாட்டுப் போருக்கான வித்தாக அமையக்கூடும் என அஞ்சப்படுகிறது. அமெரிக்கா மற்றும் இஸ்ரேலின் ஆதரவுடன் குர்திஷ் படைகள் ஈரானுக்குள் நுழைந்தால், அது மத்திய கிழக்கின் அரசியல் நிலப்பரப்பை முற்றாக மாற்றியமைக்கும் என அரசியல் வல்லுநர்கள் கணித்துள்ளனர்.