மத்திய கிழக்கில் அமெரிக்கா மற்றும் இஸ்ரேல் முன்னெடுத்து வரும் 'ஆபரேஷன் எபிக் பியூரி' (Operation Epic Fury) இராணுவ நடவடிக்கை இந்தியப் பெருங்கடல் வரை விரிவடைந்துள்ளது. இலங்கையின் காலி (Galle) கடற்பரப்பில் சர்வதேச கடல் எல்லைக்குள் பயணித்துக் கொண்டிருந்த ஈரானியக் கடற்படையின் 'ஐரிஸ் டெனா' (IRIS Dena) என்ற அதிநவீன போர்க்கப்பல் மீது அமெரிக்க நீர்மூழ்கிக் கப்பல் டார்பிடோ (Torpedo) ஏவுகணைத் தாக்குதல் நடத்தி அதனை மூழ்கடித்துள்ளது. இந்தத் துயரச் சம்பவத்தில் கப்பலில் இருந்த 180 மாலுமிகளில் 148 பேர் நீரில் மூழ்கி உயிரிழந்திருக்கலாம் என அஞ்சப்படுகிறது. இரண்டாம் உலகப் போருக்குப் பிறகு அமெரிக்க நீர்மூழ்கிக் கப்பல் ஒன்று எதிரி நாட்டுப் போர்க்கப்பலை மூழ்கடித்த முதல் சம்பவம் இதுவெனப் பென்டகன் தெரிவித்துள்ளது.

இலங்கை கடற்படை மற்றும் விமானப்படை இணைந்து காலி கடற்பரப்பில் பாரிய தேடுதல் மற்றும் மீட்புப் பணிகளை முன்னெடுத்து வருகின்றன. இதுவரை 32 மாலுமிகள் உயிருடன் மீட்கப்பட்டு காலி கராப்பிட்டிய போதனா மருத்துவமனையில் அனுமதிக்கப்பட்டுள்ளனர். சுமார் 87 மாலுமிகளின் உடல்கள் மீட்கப்பட்டுள்ளதாக முதற்கட்ட தகவல்கள் தெரிவிக்கின்றன. இந்தியாவிலுள்ள விசாகப்பட்டினத்தில் நடைபெற்ற சர்வதேசக் கடற்படை அணிவகுப்பில் (MILAN 2026) பங்கேற்றுவிட்டுத் தாயகம் திரும்பிக் கொண்டிருந்த போதே இந்தக் கப்பல் இலக்கு வைக்கப்பட்டுள்ளது. அமெரிக்கப் பாதுகாப்புச் செயலாளர் பீட் ஹெக்செத் இதனை "அமைதியான மரணம்" (Quiet death) என்று வர்ணித்துள்ளதுடன், ஈரானின் கடற்படை வலிமையைச் சிதைப்பதே தங்களின் நோக்கம் என்றும் குறிப்பிட்டுள்ளார்.

இதேவேளை, போரின் தீவிரம் இப்போது அண்டை நாடுகளுக்கும் பரவியுள்ளது. ஈரானில் இருந்து துருக்கியின் வான்பரப்பை நோக்கிக் கடந்த புதன்கிழமை ஏவப்பட்ட ஒரு பாலிஸ்டிக் ஏவுகணையை நேட்டோ (NATO) வான் பாதுகாப்பு அமைப்புகள் நடுவானில் சுட்டு வீழ்த்தியுள்ளன. இந்த ஏவுகணையின் சிதறல்கள் துருக்கியின் ஹதாய் (Hatay) மாகாணத்தில் விழுந்த போதிலும், உயிர்ச்சேதங்கள் ஏதும் ஏற்படவில்லை எனத் துருக்கியப் பாதுகாப்பு அமைச்சகம் தெரிவித்துள்ளது. அமெரிக்கா மற்றும் இஸ்ரேலின் தாக்குதல்களுக்குப் பதிலடியாக ஈரான் தனது ஏவுகணைகளைத் துருக்கி மற்றும் வளைகுடா நாடுகள் மீது ஏவி வருவது பிராந்தியத்தில் பெரும் பதற்றத்தை உருவாக்கியுள்ளது.

உலகளாவிய ரீதியில் இந்தப் போர் விரிவடைந்து வருவதால், ஐக்கிய இராச்சியம் மற்றும் பிரான்ஸ் ஆகிய நாடுகள் தங்களின் போர்க்கப்பல்களை மத்திய தரைக்கடல் பகுதிக்கு அனுப்பியுள்ளன. ஈரான் தனது ஏவுகணைப் பலத்தைப் பயன்படுத்தி அமெரிக்காவிற்கு அழுத்தம் கொடுக்க முயன்றாலும், அமெரிக்கா தனது வான்வழி மற்றும் கடல்வழி ஆதிக்கத்தைத் தொடர்ந்து நிலைநாட்டி வருகிறது. ஈரானின் உச்ச தலைவர் உள்ளிட்ட உயர்மட்டத் தலைவர்கள் ஏற்கனவே கொல்லப்பட்டுள்ள நிலையில், தற்போது நிலவும் அதிகாரப் போட்டி மற்றும் தற்பாதுகாப்பு நடவடிக்கைகள் ஈரானை ஒரு இக்கட்டான சூழலுக்குத் தள்ளியுள்ளன.