தமிழக வெற்றிக் கழகத்தின் ஆட்சி நிர்வாகம் மற்றும் கட்சி அமைப்பு ரீதியான மாற்றங்கள் பெரும் பரபரப்பை ஏற்படுத்தி வரும் நிலையில், தர்மபுரி, கிருஷ்ணகிரி, வேலூர் மற்றும் திருப்பத்தூர் ஆகிய மாவட்டங்களைச் சேர்ந்த சுமார் 10 சட்டமன்ற உறுப்பினர்கள், மாவட்டச் செயலாளர் பொறுப்பைக் கேட்டுத் தலைமைக்கு கடும் நெருக்கடி கொடுத்து வருவதாகத் தகவல்கள் கசிந்துள்ளன. கட்சிப் பணிகளை வலுப்படுத்த 234 தொகுதிகளுக்கும் தனித்தனியாக மாவட்டச் செயலாளர்களை நியமிக்கத் தலைமை திட்டமிட்டுள்ள நிலையில், இந்த எம்.எல்.ஏ-க்களின் கோரிக்கை தவெக-வின் உயர்மட்டக் குழுவினரிடையே அதிருப்தியை ஏற்படுத்தியுள்ளது.
நடந்து முடிந்த சட்டப்பேரவைத் தேர்தலில் தனிப்பெரும் கட்சியாக உருவெடுத்தாலும், அறுதிப் பெரும்பான்மை கிடைக்காத சூழலில் மற்ற கட்சிகளின் ஆதரவுடன் தவெக ஆட்சி நடத்தி வருகிறது. இந்நிலையில், பல ஆண்டுகளாகக் கட்சிக்காக உழைத்த அடிமட்டத் தொண்டர்கள் மற்றும் ரசிகர் மன்ற நிர்வாகிகளை ஓரங்கட்டிவிட்டு, புதிதாக இணைந்து எம்.எல்.ஏ ஆனவர்கள் பதவிகளைக் கைப்பற்ற முனைவது தொண்டர்கள் மத்தியில் பெரும் கொந்தளிப்பை ஏற்படுத்தியுள்ளது. ஏற்கனவே அமைச்சரவை மற்றும் ஆட்சி அமைப்பதில் உள்ள சிக்கல்களுக்கு மத்தியில், தற்போது இந்த உட்கட்சிப் பூசல் ஆட்சியின் ஸ்திரத்தன்மைக்கே சவாலாக மாறியுள்ளது.
இந்த 10 எம்.எல்.ஏ-க்களும் மாவட்டச் செயலாளர் பதவியைத் தர மறுத்தால் மாற்றுக்கட்சியில் இணையத் தயாராகி வருவதாகவும், அதற்கான ‘கிரீன் சிக்னல்’ பெற்றுவிட்டதாகவும் அரசியல் வட்டாரங்களில் பரபரப்பான பேச்சு அடிபடுகிறது. தங்கள் தொகுதிகளில் உள்ள ஏற்கனவே இருக்கும் மாவட்டச் செயலாளர்களுக்கும், தங்களுக்கும் இடையிலான கருத்து மோதல்களே இப்படியான முடிவுக்குக் காரணம் என்று அவர்கள் தரப்பு நியாயப்படுத்துகிறது. இருப்பினும், கட்சியின் கட்டமைப்பைச் சீர்குலைக்கும் வகையில் எம்.எல்.ஏ-க்கள் நெருக்கடி கொடுப்பது, கட்சித் தலைமையின் அடுத்தகட்ட நகர்வுகளைச் சிக்கலாக்கியுள்ளது.
உடனடியாக 234 தொகுதிகளுக்கும் மாவட்டச் செயலாளர்களை நியமிக்கத் தலைமை முனைப்பு காட்டி வந்தாலும், பழைய நிர்வாகிகளின் எதிர்ப்பு மற்றும் எம்.எல்.ஏ-க்களின் இந்த மிரட்டல் காரணமாகப் பட்டியல் வெளியிடுவதில் தாமதம் ஏற்பட்டுள்ளது. ஒருபுறம் ஆட்சி நிர்வாகம், மறுபுறம் உட்கட்சி மோதல் என இருமுனை நெருக்கடியில் தவெக தலைமை சிக்கியுள்ள நிலையில், அதிருப்தியில் இருக்கும் எம்.எல்.ஏ-க்களைச் சமாதானப்படுத்துவார்களா அல்லது ஒழுங்கு நடவடிக்கை எடுப்பார்களா என்ற எதிர்பார்ப்பு தவெக தொண்டர்கள் மத்தியில் எழுந்துள்ளது.
