தமிழக அரசியலில் பெரும் பரபரப்பை ஏற்படுத்திய பொதுத்தேர்தல் முடிவுகளுக்குப் பிறகு, பல்வேறு கட்சிகளைச் சேர்ந்த முக்கியத் தலைவர்கள் தமிழக வெற்றிக் கழகத்தில் (த.வெ.க) தொடர்ந்து இணைந்து வருகின்றனர். அந்த வரிசையில், இந்திய கம்யூனிஸ்ட் கட்சியின் (CPI) 55 ஆண்டுகால மூத்த தலைவரும், முன்னாள் மாநில துணைச் செயலாளருமான சி. மகேந்திரன் இன்று அதிகாரப்பூர்வமாக த.வெ.க-வில் இணைந்தார். சென்னை பனையூரில் உள்ள அக்கட்சியின் தலைமை அலுவலகத்தில் நடைபெற்ற நிகழ்வில், த.வெ.க பொதுச்செயலாளரும் அமைச்சருமான என். ஆனந்த் முன்னிலையில் அவர் தன்னை முறைப்படி கட்சியில் இணைத்துக் கொண்டார்.
கம்யூனிஸ்ட் இயக்கத்தில் தனது 18 வயது முதல் மக்கள் போராட்டங்களில் பங்கேற்று சிறைவாசம் சென்றவரான சி. மகேந்திரன், ‘சி.எம்’ என்று அரசியல் வட்டாரங்களில் பரவலாக அறியப்படுபவர். கடந்த 2015-ஆம் ஆண்டு நடைபெற்ற ஆர்.கே.நகர் இடைத்தேர்தலில் அப்போதைய முதலமைச்சர் ஜெயலலிதாவை எதிர்த்து கம்யூனிஸ்ட் கட்சி சார்பில் போட்டியிட்டவர் என்பது குறிப்பிடத்தக்கது. கடந்த 2023-ஆம் ஆண்டு சேலத்தில் நடைபெற்ற கட்சியின் மாநிலக் குழு கூட்டத்திற்குப் பிறகு, உட்கட்சி விவகாரங்கள் காரணமாக அனைத்துப் பொறுப்புகளில் இருந்தும் விடுவிக்கப்பட்ட அவர், வெறும் கௌரவ உறுப்பினராக மட்டுமே நீடித்து வந்த நிலையில் தற்போது த.வெ.க-விற்கு மாறியுள்ளார்.
த.வெ.க-வில் இணைந்த பின்னர் செய்தியாளர்களிடம் பேசிய சி. மகேந்திரன், “ஊழலை ஒழிக்க முடியும் என்ற பெரும் நம்பிக்கையை தமிழ்நாட்டின் முதலமைச்சர் விஜய் தந்துள்ளார். சாதி, மதம், ஏழை, பணக்காரன் என்ற பாகுபாட்டை த.வெ.க-வின் தேர்தல் வெற்றி தகர்த்தெறிந்துள்ளது. எனது கொள்கைக்கும் லட்சியத்திற்கும் இந்த இயக்கம் முரண்பாடானது அல்ல” என்று நெகிழ்ச்சியுடன் குறிப்பிட்டார். மேலும், தான் கட்சி மாறினாலும் தனது கம்யூனிச அடையாளமான ‘சிவப்புத் துண்டை’ எப்போதும் தோளிலிருந்து மாற்றப் போவதில்லை என்றும், சிவப்புத் துண்டோடுதான் த.வெ.க-வில் தொடர்ந்து செயல்படுவேன் என்றும் அவர் திட்டவட்டமாகத் தெரிவித்தார்.
ஏற்கனவே அதிமுக மற்றும் பாஜகவைச் சேர்ந்த பல முன்னாள் அமைச்சர்கள் மற்றும் முக்கியப் புள்ளிகள் த.வெ.க-வை நோக்கி நகர்ந்து வரும் சூழலில், தற்போது இடதுசாரி பின்னணி கொண்ட ஒரு மூத்த தலைவர் அக்கட்சியில் இணைந்துள்ளது அரசியல் நோக்கர்களிடையே கூர்ந்து கவனிக்கப்படுகிறது. சி. மகேந்திரனின் இந்த வருகை, முதலமைச்சர் விஜய் தலைமையிலான த.வெ.க-வின் கொள்கை பரப்பிற்கும், அதன் அடித்தளத்தை மேலும் வலுப்படுத்துவதற்கும் ஒரு முக்கிய மைல்கல்லாகப் பார்க்கப்படுகிறது.
