கோவை அவிநாசி சாலையில் உள்ள அரசு மருத்துவக் கல்லூரியின் பட்டமளிப்பு விழாவில், தமிழக வெற்றிக் கழகத்தின் (தவெக) அரசியல் பிரசாரப் பாடல் ஒலிக்கவிடப்பட்ட சம்பவம் தமிழக அரசியல் களத்தில் பெரும் புயலைக் கிளப்பியுள்ளது. அரசு மருத்துவக் கல்லூரி போன்ற ஒரு பொதுவான கல்வி நிறுவனத்தில், அதுவும் அமைச்சர்கள் முன்னிலையிலேயே தவெக கட்சியின் பிரசாரப் பாடல் இசைக்கப்பட்டது கடும் விமர்சனங்களுக்கு உள்ளாகியுள்ளது. இச்சம்பவத்திற்கு பாஜக தேசிய மகளிர் அணித் தலைவியும், முக்கியத் தலைவருமான வானதி சீனிவாசன் தனது கடுமையான கண்டனத்தைப் பதிவு செய்துள்ளார்.
கோவை அரசு மருத்துவக் கல்லூரியில் நடைபெற்ற இந்த பட்டமளிப்பு விழாவில், மாணவர்களுக்குப் பட்டங்களை வழங்குவதற்காகத் தமிழகச் சுகாதாரத்துறை அமைச்சர் கே.ஜி. அருண்ராஜ், அமைச்சர் சம்பத்குமார் மற்றும் கோவை மாவட்ட ஆட்சியர் பவன் குமார் உள்ளிட்ட முக்கிய அரசு உயர் அதிகாரிகள் பங்கேற்றனர். விழா மேடையில் மாணவர்களுக்குப் பட்டங்கள் வழங்கப்பட்டுக் கொண்டிருந்த அந்த உன்னதமான தருணத்தில், தவெக கட்சியின் அதிகாரப்பூர்வ பிரசாரப் பாடலான ‘நான் தன்னந்தனி ஆளு’ மற்றும் தவெக தலைவர் விஜய் நடித்த ‘ஜனநாயகன்’ திரைப்படப் பாடல்களும் ஒலிக்கவிடப்பட்டன. இந்த வீடியோ காட்சிகள் சமூக வலைத்தளங்களில் வெளியாகி, பொதுமக்கள் மற்றும் அரசியல் கட்சியினர் மத்தியில் கடும் அதிர்ச்சியை ஏற்படுத்தியது.
இந்த விவகாரம் குறித்துக் காட்டமாக அறிக்கை வெளியிட்டுள்ள வானதி சீனிவாசன், “நேற்று காஞ்சிபுரம் பள்ளி, இன்று கோவை அரசு மருத்துவக் கல்லூரி எனத் தமிழ்நாட்டில் உள்ள கல்விக்கூடங்களைத் தொடர்ந்து அரசியல் மேடைகளாக மாற்றி வருவது ஆளுங்கட்சிக்கு அழகல்ல” என்று தவெக அரசைச் சாடியுள்ளார். மேலும், “ஒரு அரசு நிகழ்ச்சியில் என்ன மாதிரியான பாடல்களை ஒலிக்கவிட வேண்டும் என்ற அடிப்படை புரிதல் கூட கல்லூரி நிர்வாகத்திற்கு இல்லையா? நிகழ்ச்சி நிரல் தயாரிப்பில் இதுபோன்ற அரசியல் சார்ந்த பிரசாரப் பாடல்களை அனுமதித்தது யார்?” என்று கல்லூரி நிர்வாகத்திற்கும் அவர் அடுக்கடுக்கான கேள்விகளை எழுப்பியுள்ளார்.
அரசியலமைப்புச் சட்டத்தின் மீது சத்தியப்பிரமாணம் செய்து பதவியேற்ற அமைச்சர்கள் மற்றும் மாவட்ட ஆட்சியர் முன்னிலையிலேயே, ஒரு கட்சியின் பிரசாரப் பாடல் அரசு விழாவில் ஒலிபரப்பப்பட்டதை வேடிக்கை பார்த்துக் கொண்டிருக்க முடியாது என்றும் அவர் எச்சரித்துள்ளார். “கல்விக்கூடங்கள் என்பது மாணவர்கள் அரசியல் பாகுபாடின்றி கல்வி கற்கும் புனிதமான இடங்கள்; அங்குத் தங்களின் அரசியல் ஆதாயத்திற்காகக் கட்சியின் பாடல்களைப் புகுத்தி, மாணவர்களின் கவனத்தைச் சிதறடிக்க வேண்டாம்” எனத் தவெக அரசுக்கு வானதி சீனிவாசன் வார்னிங் கொடுத்துள்ளார். இந்த சர்ச்சையைத் தொடர்ந்து, கல்லூரி தரப்பில் தவறுதலாக இப்பாடல் ஒலிக்கப்பட்டதா அல்லது திட்டமிட்டுப் பாடப்பட்டதா என்பது குறித்து விசாரணை நடத்த வேண்டும் என்ற கோரிக்கையும் வலுத்து வருகிறது.
