ஈரான் ஆதரவு பெற்ற யேமனின் ஹூதி கிளர்ச்சியாளர்களுக்கு எதிராக சவூதி அரேபியா வான் மற்றும் கடல் வழித் தாக்குதல்களைத் தாண்டி, நேரடியாகத் தரைவழியாகப் படையெடுத்துச் சென்று பிரம்மாண்ட இராணுவத் தாக்குதலை (Ground Invasion) நடத்தத் தயாராகி வருவதாக சர்வதேச ஊடக அறிக்கைகள் அதிர்ச்சித் தகவலை வெளியிட்டுள்ளன. யேமனின் மத்தியப் பகுதியில் உள்ள அல்-பைதா (Al-Bayda) மாகாணத்தைக் கைப்பற்றவும், செங்கடல் பகுதியில் ஹூதிகளின் பிடியைத் தகர்க்கவும் சவூதி படைகள் கிழக்குப் பகுதியிலிருந்து தரைப்படை வீரர்களைப் பெரிய அளவில் நகர்த்தி வருவதாகப் தகவல்கள் தெரிவிக்கின்றன.
கடந்த வாரம் சவூதி அரேபியாவுக்கு எதிராக ஹூதி கிளர்ச்சியாளர்கள் கடல்சார் வர்த்தகத் தடையை (Maritime Blockade) அறிவித்ததைத் தொடர்ந்து, சவூதி எண்ணெய் டேங்கர் கப்பல்கள் மற்றும் சுத்திகரிப்பு நிலையங்களைக் குறிவைத்து ஹூதிகள் ஏவுகணை மற்றும் ட்ரோன் தாக்குதல்களைத் தீவிரப்படுத்தினர். ஹோர்முஸ் நீரிணையில் ஏற்கனவே ஏற்பட்டுள்ள வணிக முடக்கத்திற்கு நடுவே, செங்கடலின் மூலோபாய முக்கியத்துவம் வாய்ந்த ‘பாப் எல்-மண்டேப்’ (Bab el-Mandeb) கடல் வழியையும் ஹூதிகள் முடக்க முயல்வது சவூதியின் கச்சா எண்ணெய் ஏற்றுமதிக்கு மிகப்பெரிய அச்சுறுத்தலாக மாறியுள்ளது.
இதனை எதிர்கொள்ளும் வகையில், கடல்சார் வணிகப் பாதைகளைப் பாதுகாப்பதற்காகத் துருக்கி, பாகிஸ்தான், எகிப்து உள்ளிட்ட 14 நாடுகளை உள்ளடக்கிய சர்வதேசக் கடல்சார் பாதுகாப்புப் படை கூட்டணியை உருவாக்கும் முயற்சியிலும் ரியாத் தீவிரமாக இறங்கியுள்ளது. அதேவேளையில், யேமனில் பல ஆண்டுகளாக நிலவி வந்த தற்காலிக அமைதி ஒப்பந்தம் முறிந்து, ஹூதிகளின் கட்டுப்பாட்டில் உள்ள துறைமுக நகர் அல்-ஹுதைதா (Hodeidah) மீது சவூதி போர் விமானங்கள் ஏற்கனவே கடுமையான குண்டுமழை பொழிந்து வருகின்றன.
மத்திய கிழக்கில் அமெரிக்கா மற்றும் ஈரானுக்கு இடையே உச்சக்கட்ட போர்ப் பதற்றம் நிலவி வரும் தற்போதைய சூழலில், சவூதி அரேபியா நேரடியாக யேமனுக்குள் தரைப்படையை இறக்கினால் அது ஒட்டுமொத்த பிராந்தியத்திலும் மிக மோசமான போராக உருவெடுக்கும் எனக் சர்வதேச அரசியல் வல்லுநர்கள் எச்சரிக்கின்றனர். எண்ணெய் விநியோகச் சங்கிலி கடுமையாகப் பாதிக்கப்பட்டுப் உலகளவில் எரிபொருள் விலை மீண்டும் விண்ணைத் தொடும் அபாயம் ஏற்பட்டுள்ளதால், ஐநா மற்றும் சர்வதேச நாடுகள் இந்த மோதலைத் தடுக்க அவசர ஆலோசனைகளில் ஈடுபட்டு வருகின்றன.
