தமிழக முதலமைச்சரும், தமிழக வெற்றிக் கழகத்தின் (தவெக) தலைவருமான சி. ஜோசப் விஜய்யின் 52-வது பிறந்தநாளை முன்னிட்டு தமிழகம் முழுவதும் கட்சி நிர்வாகிகள் மற்றும் தொண்டர்கள் பல்வேறு நலத்திட்ட உதவிகளையும் வினோத வழிபாடுகளையும் முன்னெடுத்து வருகின்றனர். தமிழகத் தேர்தல் வெற்றியைத் தொடர்ந்து, முதலமைச்சராகப் பொறுப்பேற்ற பின்னர் வரும் முதல் பிறந்தநாள் என்பதால், தமிழக எல்லைகளைத் தாண்டியும் உலகளாவிய நகரங்களில் தவெக தொண்டர்கள் இதனை கோலாகலமாகக் கொண்டாடி வருகின்றனர். இந்த நிலையில், மதுரையில் தவெக-வின் இஸ்லாமிய நிர்வாகிகள் மதங்களைக் கடந்த மனிதநேயத்தை வலியுறுத்தும் வகையில் பாண்டிகோவிலில் நடத்திய சமத்துவப் பிரார்த்தனை அரசியல் வட்டாரத்தில் நெகிழ்ச்சியையும் கவனத்தையும் ஈர்த்துள்ளது.
மதுரை மாகாணத்தில், நடிகர் விஜய்யின் நற்பணி மன்றக் காலம் தொட்டு கடந்த 30 ஆண்டுகளுக்கும் மேலாகத் தளபதியின் பெயராலும், அவரது வழிகாட்டுதலின் படியும் ஏராளமான மக்கள் நலத்திட்டங்கள் தொடர்ந்து செயல்படுத்தப்பட்டு வருகின்றன. தற்போது அவர் தமிழகத்தின் நிரந்தர முதலமைச்சராகப் பொறுப்பேற்றுச் சிறப்பான, நேர்மையான ஆட்சியை நடைமுறைப்படுத்திக் கொண்டிருக்கிறார். அவரது இந்தத் தலைமை தமிழ்நாட்டிற்கு ஒரு நல்லாட்சியாகவும், வளம் பொருந்திய பொற்காலமாகவும் அமைய வேண்டும் என்றும், முதல்வர் விஜய் நீண்ட ஆயுளுடனும் ஆரோக்கியத்துடனும் வாழ வேண்டும் என்றும் தவெக நிர்வாகிகள் இந்த மும்மத கொள்கை வழிபாட்டைத் திட்டமிட்டனர்.
இந்தச் சமத்துவ வழிபாட்டின் ஒரு பகுதியாக, தவெக இஸ்லாமிய நிர்வாகிகள் முதலில் பள்ளிவாசலுக்குச் சென்று சிறப்புத் தொழுகை மற்றும் துவா நடத்தினர். அதனைத் தொடர்ந்து, ஆன்மீக முக்கியத்துவம் வாய்ந்த மதுரை பாண்டிமுனி ஆலயத்திற்கு (பாண்டிகோவில்) வருகை தந்து, மும்மத நல்லிணக்கத்தை பறைசாற்றும் வகையில் முதலமைச்சரின் நல்லாட்சிக்காக மனமுருகிப் பிரார்த்தனை செய்தனர். மேலும், இதன் தொடர்ச்சியாகத் திருச்சபைக்கும் (சர்ச்) சென்று மெழுகுவர்த்தி ஏந்தி மும்மத கொள்கையின் அடிப்படையில் தங்களின் கூட்டுப் பிரார்த்தனையைத் தவெகவினர் முழுமையாக்கினர்.
இந்த நிகழ்வின் போது செய்தியாளர்களிடம் பேசிய தவெக இஸ்லாமிய நிர்வாகிகள், “இதற்கு முன்பு தமிழகத்தை ஆண்ட கட்சிகள் எல்லாம் குறிப்பிட்ட மதங்களுக்கு மட்டும் ஆதரவு தெரிவிப்பது அல்லது மத அரசியல் செய்வது போன்ற போக்குகளைக் கொண்டிருந்தன. ஒரு தொகுதியில் தேர்தல் சீட் கொடுக்கும் போது கூட, அங்கு எந்த மதத்தைச் சார்ந்தவர்கள் அதிகமாக இருக்கிறார்கள் என்று கணக்குப் பார்த்துதான் சீட் கொடுக்கும் அவலம் இருந்தது. ஆனால், இன்று எங்களது தலைவர் விஜய் அந்தப் பழைய அரசியல் கணக்குகளை எல்லாம் அடித்து நொறுக்கி, மனிதர்கள் எல்லாரும் ஒரே இனம், ஒரே குலம் என்ற சமத்துவ ஆட்சியை நிலைநாட்டியுள்ளார். அதற்கு மதுரை பாண்டிகோவிலில் இஸ்லாமியர்களாகிய நாங்கள் நடத்திய இந்தச் சமத்துவ வழிபாடே சாட்சி” என உணர்ச்சிப்பொங்கத் தெரிவித்தனர்.
